6 Jalla nekztanaqui nii anjilaqui wejtquiz cjichic̈ha:

—Tii chiita takunacaqui werarac̈ha, zuma lijitumapanc̈ha. Tuquitan Yooz Jiliriqui niiz̈ puntu parliñinacz̈quiz chiikatchic̈ha. Jalla nii Yoozpachaqui niiz̈ anjila cuchanz̈quichic̈ha, niiz̈ sirwiñinacz̈quiz tjeezjapa, c̈hjulut wajilla wataquic̈ha, jalla nii.

7 Jesucristuqui wajillaj tjonla.

Jakziltat tii liwruquiz cjijrta Yooz taku catokac̈haja, jalla niiqui cuntintuz̈ cjequic̈ha.

8 Wejr Juanqui jalla tinaca cherchinc̈ha, niz̈aza nonzinc̈ha. Jalla nii nonz̈cu, cherz̈cu, nii wejtquiz tjeezñi anjilz̈ yujcquiz quillzinc̈ha, niiz̈quiz rispitzjapa. 9 Jalla nekztanaqui nii anjilaqui wejtquiz chiiz̈inchic̈ha, tuz̈ cjican:

—Ana niz̈ta paa. Wejrqui Yoozquin zakal sirwuc̈ha, am irata, niz̈aza Yooz parti parliñi jilanacaz̈ irata, niz̈aza tii liwruquiz cjijrta Yooz taku catokñinacaz̈ irata. Jalla niz̈tiquiztan Yoozquinkaz rispita.

10 Nekztanaqui wejtquin cjichizakazza:

—Tii liwruquiz cjijrta Yooz taku ana chjojzaka joojoowa. Wajillaz̈ tii taku cumplis tjuñi z̈catz̈inz̈quic̈ha. 11 Jalla nii timpu tjonan, jakziltat anazuma paacan z̈ejlc̈haja, jalla niiqui anazuma kaj paala. Niz̈aza jakziltat anazuma kuzziz z̈ejlc̈haja, jalla niiqui anazuma kuzziz kaj kamla. Niz̈aza jakziltat zuma kamañchiz z̈ejlc̈haja, jalla niiqui zuma kamañchiz kaj cjila. Niz̈aza jakziltat Yoozquinkaz kuzziz z̈ejlc̈haja, jalla niiqui Yoozquinkaz kuzziz kaj cjila.

Nekztan tsjii joraqui cjichic̈ha:

12 —Nuz̈upan wejrqui wajillal tjonac̈ha. Jalla nuz̈ tjoncan premiuchiz tjonac̈ha. Zapa mayniz̈quiz tjaa-ac̈ha, ninacaz̈ kamtiquiztan jama. 13 Wejrtc̈ha primirquiztanpacha wiricama, niz̈aza wejrtc̈ha kalltiñtqui, niz̈aza z̈erzniñtqui, jaknuz̈t tsjii litra “A”quiztan kalltic̈haja, niz̈aza “Z”quin z̈erzaja, jalla niz̈ta.

14 Jakziltat persun ujnacquiztan pertuntaz̈laja, jalla ninacaqui limpu ajunta zquitchiztakazza. Jalla nii pertunta z̈oñinacakaz cuntintuz̈ cjequic̈ha. Niz̈aza z̈eti tjaañi muntiz̈ frutunacquiztan lulasac̈ha. Niz̈aza ew wajt zanquiztan luzasac̈ha. 15 Pero wajt zancu jalla tiz̈ta z̈oñinacaz̈ eclaquic̈ha: tsjii kjutñi kuz tjaañi z̈oñinaca, yat'irinaca, adulteriuquiz ojklayñinaca, z̈oñi conñinaca, z̈oñiz̈ paata yooznacz̈quin rispitñinaca, niz̈aza tjapa incallñinaca, niz̈aza tjapa toscar taku pecñinaca. Jalla nii anazuma z̈oñinacaz̈ wajt zancu eclaquic̈ha.

16 —Wejr Jesucristutc̈ha. Wejt anjila cuchanz̈quichinc̈ha, tjapa icliz z̈oñinacz̈quiz tii takunaca ticlarzjapa. Wejtquiztan David jiliriqui tjoniñc̈ha. Niz̈aza Davidz̈ majchmaatinacz̈quiztan wejrqui tjoniñc̈ha. Wejrtc̈ha weenzlak kjantat llijñi warawaraz̈takaz.

17 Espíritu Santuqui Jesucristuz̈quiz kuzziz z̈oñinacz̈tan “Jesucristuqui tjonla” cjic̈ha.

Niz̈aza jakziltat tii chiita taku nonznac̈haja, jalla niizakaz “Jesucristuqui tjonla” cjila.

Jakziltat kjaztakaz Yooz zuma kamaña ancha pecc̈haja, picha, Yoozquiztan zuma kamaña tanzjapa. Nuz̈ullakaz tanznasac̈ha. Zuma z̈eti tjaañi kjaztakazza nii zuma kamañaqui.

18 Jakziltat tii liwruquiz cjijrta Yooz taku nonz̈aja, jalla niiz̈quiz chiiz̈inz̈cuc̈ha, tuz̈ cjican: Jakziltat tii cjijrta Yooz taku yapac̈haja, jalla ninacz̈quiziqui tii liwruquiz cjijrta anawalinacaz̈ wataquic̈ha. 19 Niz̈aza jakziltat tii liwruquiz cjijrta Yooz taku t'upznac̈haja, jalla niiz̈ tjuu Yooz liwruquiztan jurtaz̈ cjequic̈ha; niz̈aza zuma Yooz wajtquiz anaz̈ luzasac̈ha; niz̈aza tii liwruquiz cjijrta zumanaca ana niiz̈tajapa cjequic̈ha.

20 Jalla tii takunaca ticlarñiqui tuz̈ cjic̈ha:

—Ultimupan wejrqui wajillal tjonac̈ha.

Wejrzakaz cjiwc̈ha:

—Jalla nuz̈oj cjila. Amén. Jesucristo Jiliri, jalla nuz̈ tjona.

21 Uc̈hum Jesucristo Jiliriqui tjapa anc̈hucaquiz zumaj cjiskatla. Nuz̈oj cjila. Amén.

<- APOCALIPSIS 21