APOCALIPSIS 5

Re Jesucristo ancha'l jun oveja y can ruc'amon-va che nurec' re vuj baton ruchi'

1 Y xintz'at che re Jun re tz'uyul chach re lok'olaj ch'acat, c'o jun vuj[a] baton ruchi' ruc'uan pa rajquik'a'. Re vuj re', nojnak rach y rij che letra, y banon sellar riq'uin vuku' sello.[b] 2 Y can jare' tak xintz'at jun ángel re c'o poder pa ruk'a' y jun pa ruchi' nich'o, y nubij: Can man jun re ruc'amon chin nulisaj re vuku' sello chin che nurec' ruchi' re vuj.

3 Xa can man jun re ruc'amon-ta chin nurec' ruchi' re vuj. Man jun c'o chupan re rocaj, y ni xe-ta chach re ruch'ulef y ni xe-ta chuxe-ka re ruch'ulef. Astapa' xaxe chin che nutz'at-ta ba'. 4 Y yen Juan camas yinok', roma man jun re ruc'amon-ta chin che nurec' ruchi' re vuj y nuban-ta leer. Can man jun c'o, astapa' xaxe chin che nutz'at-ta ba'. 5 Y jun chique re rejeta'k tak achi'a' xubij chua: Man catok', roma re vuj can c'o c'a Jun re ruc'amon chin nulisaj re vuku' sello y nurec' ruchi', roma ja reja' re ch'aconak y can junan riq'uin jun león.[c] Reja' can rey-rumam can re Judá[d] y rey-rumam can chuka' re Rey David, xcha' chua.

6 Y c'are' xintz'at che re Jun re', jare' re ancha'l oveja re xk'ax-yan chach re camic.[e] Reja' pa'al chire' pa quinic'ajal re Jun re tz'uyul chach re lok'olaj ch'acat, re je caje' re camas q'uiy quinak'avach c'o, y re rejeta'k tak achi'a'. Y re ancha'l oveja re' c'o vuku' ruc'ua' y vuku' nak'arach.[f] Y re vuku' nak'arach re', ja re vuku' espíritu chin re Dios re je'takon chach re ruch'ulef chin ye'samaj.[g] 7 Xpa re ancha'l oveja re k'axnak chic chach re camic, xbo'rc'ama-pa re vuj baton ruchi' re c'o pa rajquik'a' re tz'uyul chach re lok'olaj ch'acat. 8 Y jac'a tak xbo'rc'ama-pa re vuj baton ruchi', re je caje' re camas q'uiy quinak'avach c'o y re je veinticuatro rejeta'k tak achi'a', xe'xuque-ka chach re ancha'l oveja re k'axnak chic chach re camic. Y reje' je'quic'ualon arpas[h] y chuka' je'quic'ualon re je'banon cha k'anapuak re c'o pom chupan. Y jare' re qui-oraciones[i] conojel re je rajc'ual re Dios. 9 Y re je caje' re camas q'uiy quinak'avach c'o y re rejeta'k tak achi'a', c'o c'a jun c'ac'a bix niquibixaj,[j] y re bix re' nubij:

Rat re can yat ancha'l jun oveja can ruc'amon-va[k] chin xbac'ama-pa re vuj, y can ruc'amon-va chuka' chin ya'lisaj re ru-sellos,

roma rat can xaquimisas, y riq'uin re aq'uiq'uel[l] xojacol konojel chin xojoc chin re Dios,

xabanchique-ta c'a re ka-raza y re kach'abal, y chuka' xabanchique-ta c'a re katenemit y re ka-nación.[m]

10 Y xaban chaka che xojoc reyes y sacerdotes[n] chin re Karta' Dios,

y junan xtakaban gobernar pa rue' re ruch'ulef.

11 Y tak xintzu'un chic-apo, xintz'at che camas je q'uiy ángeles re quisutin rij re Jun re tz'uyul chach re lok'olaj ch'acat, y re je caje' re camas q'uiy quinak'avach c'o y re rejeta'k tak achi'a'. Y re ángeles re jec'o chire', can pa millones,[o] y xinc'axaj 12 che jun pa quichi' niquibij:

Re Jesucristo re ancha'l oveja re xquimisas,

can ruc'amon-va che c'o ru-poder,[p] c'o rubiyomal y c'o na'oj riq'uin.

Reja' ronojel nitiquir nuban.

Y chuka' ruc'amon che niya' ruk'ij, y can ruc'amon che nibixax rube', y reja' can ruc'amon-va chuka' che nibex cha che camas nem, ye'cha'.

13 Y xinc'axaj chuka' che ronojel re je'rubanon re Dios re jec'o chupan re rocaj, re jec'o chach re ruch'ulef, re jec'o chuxe-ka re ruch'ulef, y re jec'o chupan re mar, niquibij:

Re tz'uyul chach re lok'olaj ch'acat y quire' chuka' re ancha'l oveja re xk'ax-yan chach re camic,

jare' re otz che nibixax rube' y reja' can otz-va chuka' che nibex cha che camas nem, c'o ruk'ij y c'o ru-poder[q] chin nojel tiempo, xe'cha'.

14 Y re je caje' re camas q'uiy quinak'avach c'o, xquibij: Amén.

Y re je veinticuatro rejeta'k tak achi'a' can jare' xe'xuque-ka chin xquiya' ruk'ij[r] re can nojel tiempo c'o ruc'aslen.

<- APOCALIPSIS 4 APOCALIPSIS 6 ->