APOCALIPSIS 19

Re vinak can niquiya' ruk'ij re Dios chila' chicaj

1 Y tak xe'banataj-yan ronojel re', jare' tak yen Juan xinc'axaj quich'abal je q'uiy vinak chicaj y can nivajin, y re vinak re' jun pa quichi' niquibij:

Titioxij cha re Kajaf Dios, roma ja reja' re xbano chaka che xojcolotaj[a] chach re kamac, chin reja' re poder, c'o ruk'ij, y chuka' can ruc'amon-va che nibex cha che camas nem.[b]

2 Titioxij cha re ka-Dios[c] roma reja' can ja re katzij y re choj nucusaj tak nuban juzgar,

y can xuya'[d] re castigo pa rue' re ixok itzel ruc'aslen,

roma ja reja' re xbano chique re vinak re jec'o chach re ruch'ulef chin xe'ka pa mac, ancha'l re mac quichin ixoki' y achi'a', re xquicanola-qui' chin xe'macun.

Chuka' reja' can xe'ruquimisaj re rusamajela' re Dios, mare' re ka-Dios can xuya' ruq'uixel cha.

3 C'are' re vinak re can nivajin quich'abal chicaj, chuka' xquibij chic: Titioxij cha re Dios, roma re Babilonia tz'amon ruc'atic, y re rusibil[e] can chin nojel tiempo nijote'.

4 Y che je veinticuatro[f] rejeta'k tak achi'a' re jec'o chicaj y re je caje' re camas q'uiy quinak'avach c'o, jare' tak xe'xuque-ka y re nic'aj-quivach c'a pan ulef xka-va-ka chin xquiya' ruk'ij re Dios re tz'uyul chach re lok'olaj ch'acat. Y re rejeta'k tak achi'a' y re je caje' re camas q'uiy quinak'avach c'o, xquibij: Amén.[g] Can titioxij cha re Dios.

5 Y jare' tak c'o jun re xbech'o-pa anche' c'o-va re lok'olaj ch'acat chin re Dios, y ja quire' nubij:

Chiyixnojel yex re yix rusamajela' re Dios,

can tiya' ruk'ij re ka-Dios.[h]

Yex re can ninimaj rutzij re Dios, tiya' ruk'ij.

Che cocoj y che nima'k tibana' quire'.

6 Y yen Juan xinc'axaj chuka' che can ancha'l che camas je q'uiy vinak re can nivajin quich'abal chicaj. Re quich'abal can nivajin can ancha'l ye'vajin re rakan tak ya'[i] y can ancha'l chuka' ye'k'ajan re tempestades y niquibij:

Titioxij cha re Kajaf Dios, re c'o ronojel poder riq'uin, roma ja reja' re nibano gobernar.

7 Camas c'a tiqui'cot[j] re kánma y can kojtze'en y takaya' ruk'ij re Dios,

roma xbeka-yan re k'ij chin che re je rajc'ual re Dios re je ancha'l jun k'apoj xtan re nic'ule'[k] riq'uin re Jesucristo re Jun ancha'l oveja.

Y re k'apoj xtan can rubanon chic rubanic chin re ruc'ulubic.

8 Can xya' c'a k'ij cha re k'apoj ixok chin che xuvak-yan-ri' riq'uin re tziak[l] camas ch'ajch'oj y niyiq'uiloj, tziak re nibex lino cha, re camas jabal.

Y re tziak re', xa ja re c'aslen choj[m] quic'uan re je rajc'ual chic re Dios.

Re je'vayon chupan re namak'ij chin re ruc'ulubic re Jesucristo.

9 Y re ángel xubij chua: Tatz'ibaj che otz-quibanoj[n] re je'vayon chupan re namak'ij chin re ruc'ulubic re Jesucristo re can ancha'l oveja, xcha'.

Y re ángel re' can xubij chuka' chua: Re tzij re ximbij chava, can ja re Dios biyon y can katzij-va.

10 Y yen can jare' tak xinxuque'[o] chach re ángel re' y re nic'aj-noch c'a pan ulef xka-va-ka chin ninya' ruk'ij, pero reja' xubij chua: Man caxuque' chinoch. Man taya' nuk'ij yen. Ja re Dios re taya' ruk'ij. Roma yen xa yin jun rusamajel re Dios ancha'l rat, y ancha'l chuka' re nic'aj chic re can xquic'ul re ruch'abal re Jesús y niquitzijoj. Xa yoj junan, roma jun re nitzijon re nibex cha roma re Dios y jun re nitzijon re ruch'abal re Jesús, xa jun mismo Espíritu re niyi'o quich'abal che je ca'e'. Re Espíritu re' chin re Jesús.

Re ch'ocol chij jun quiej sak rij

11 Y tak xintzu'un chic-apo, xintz'at re rocaj jakal. Y xintz'at jun quiej sak rij, ch'ocolben roma re Jun re rubini'an Katzij[p] y can nuban re nubij. Re Jun re ch'ocolbeyon re quiej sak rij, can pa rubiyal nuban juzgar[q] y nuban guerra quiq'uin re ye'tzelan richin. 12 Re nak'arach can je ancha'l rurep-k'ak.[r] C'o q'uiy coronas rucusan, y chire' tz'iban-a re rube'.[s] Y re be'aj re', can man jun anchok chach nak'ax-va, xa can xe chach reja' nak'ax-va. 13 Re rutziak rucusan, nojnak rij che quic'.[t] Y c'o chic jun rube', y re' ja re Ruch'abal[u] re Dios. 14 Y re ejércitos chin chila' chicaj can je'binak riq'uin, quicusalon tziak re nibex lino cha, y re' jun utzulaj tziak y camas ch'ajch'oj y can bo'j.[v] Y can conojel re ejército re', je'ch'ocol-a chiquij quiej sak quij. 15 Y re pa ruchi'[w] reja' ndel-va-pa jun espada re camas ray. Y can riq'uin re' xtukasaj[x] quik'ij re vinak re jec'o pa tak naciones. Y can ja reja' re xtibano gobernar[y] riq'uin ronojel poder pa quive' re vinak. Y can xque'ruyitz'[z] roma xque'ruban juzgar. Can ancha'l tak niyitz' cha'kan re uva chupan re ancha'l pila, can quire' xtuban reja' chique. Can nuc'ut chakavach re rubanic re namalaj castigo re xtuya' re Dios re c'o ronojel poder riq'uin. 16 Y re Jun re rubini'an Ruch'abal re Dios, rucusan jun rutziak nem rakan, y chij re' tz'iban chic jun rube', y ja quire' nubij: Rey quichin conojel reyes y jun namalaj Ajaf.[aa] Y re ca'e' be'aj re' tz'iban pa xulan-ka ba' cha re rutziak.

17 Y can jare' xintz'at jun ángel pa'al pa rue' re k'ij. Re ángel re' jun pa ruchi' xubij chique re chicop c'o quixic' re ye'ba pa cak'ik' re ye'biyaj chicaj: Quixampa. Timola-pa-ivi', roma re Dios nuya' jun namalaj va'in chiva.[bb] 18 Re vay re xtuya' re Dios ja re qui-cuerpo re reyes, qui-cuerpo re capitanes, qui-cuerpo re achi'a' re camas quichuk'a', qui-cuerpo chuka' re quiej y re je'ch'ocolbeyon[cc] quichin, re qui-cuerpo conojel re vinak, vinak re je'lak'on re nibex esclavos chique y re vinak can je libre-va, che cocoj y che nima'k, xcha' re ángel.

19 Y yen Juan xintz'at chic re nabey itzel chicop y xe'ntz'at re reyes re jec'o chach re ruch'ulef, y chuka' camas je q'uiy re ejércitos re can quichibil-qui' quibanon. Y conojel re' can quimalon-qui' chin niquiban guerra[dd] riq'uin re Jun re ch'ocol chij re quiej sak rij y quiq'uin chuka' re je'tzakatal chij. 20 Y re nabey itzel chicop xtz'am-a, chibil re jun ache re nibin che nutzijoj re nubij re Dios cha y xa man katzij-ta. Re jun aj-tz'ucuy-tzij re', re can chach re nabey itzel chicop xe'rubanala-va milagros re man jun bey je'tz'eton-ta. Y riq'uin re', xe'ruk'ol re vinak chin che xquic'ul re qui-seña re nic'aj-quivach o chij quik'a'. Y re vinak re' can xquiya' chuka' ruk'ij re ru-imagen re itzel chicop. Y mare' re chicop y re jun re xk'olo quichin re vinak, can xe tal choj quire' je c'as xe'sunc'utis pa k'ak'[ee] re ruxalon-ri' riq'uin azufre. 21 Y jac'a re nic'aj chic vinak re je'binak quiq'uin re je ca'e' re', xe'quimisas conojel. Xe'quimisas riq'uin re espada re ndel-pa pa ruchi' re Jun re ch'ocol chij re quiej sak rij. Y conojel re qui-cuerpo re xe'quimisas, can jac'a re chicop c'o quixic' re ye'ba pa cak'ik' re xe'tijo.[ff] Can xquinojsaj quipan riq'uin re ti'ij re'.

<- APOCALIPSIS 18 APOCALIPSIS 20 ->