Link to home pageLanguagesLink to all Bible versions on this site
15
Re je vuku' ángeles re xque'yi'o re tijoj-pokonal pa rue' re ruch'ulef
1 Y c'are' xintz'at che jec'o je vuku' ángeles re xe'k'alajin chicaj y can man jun bey chuka' je'tz'eton-ta. Re vuku' ángeles re' yi'on ja'jun tijoj-pokonal[a] pa quik'a' chin che ye'bequik'aja-pa tak xtapon re k'ij. Y ja ruq'uisibal tak tijoj-pokonal re' re nuya' re Dios pa rue' re ruch'ulef. Roma jare' re ruyoval re Dios re xtujamak'ij pa quive' re man xe'niman-ta richin.

2 Y chuka' yen xintz'at che c'o jun ancha'l mar re ancha'l vidrio titzu'un,[b] xalon riq'uin k'ak'. Y jec'o je'pa'al pa rue'. Conojel re je'pa'al pa rue' re ancha'l mar, ja re man xe'ka-ta pa ruk'a' re nabey itzel chicop[c] y re ru-imagen, y chuka' man xquijo-ta che xya' qui-seña o re ru-número re rube' re itzel chicop nic'aj-quivach o chij quik'a'. Y conojel re' je'pa'al pa rue' re ancha'l mar, je'quic'ualon arpas, y re arpas re' chin re Dios. 3 Y niquibixaj re rubix re Moisés re rusamajel re Dios y re rubix re Jesucristo re ancha'l oveja. Y ja quire' niquibij:

Kajaf Dios, rat can jac'a re nima'k tak cosas re man jun bey je'tz'eton re ya'ban,[d]
y c'o ronojel poder pan ak'a'.
Can katzij y choj re abey,[e]
y ja rat re yat qui-Rey conojel re can je avajc'ual chic.
4 Can conojel niquixibij-qui' chavach,[f]
y conojel chuka' niquiya' ak'ij rat re yat Kajaf.
Y xaxe c'a rat re ac'uan jun ch'ajch'oj c'aslen.
Y mare' can che jun ruch'ulef xtipa chuyi'ic ak'ij,
roma xquitz'at y xk'alajin-yan chiquivach che can pa rubiyal naban juzgar.
Quire' niquibij.

5 Y tak ntz'eton chic-ka ronojel re', xintz'at che chicaj xjakataj[g] re jay re anche' nuc'ut-va-ri' re Dios.[h] 6 Y chire' xe'be'el-va-pa re je vuku' ángeles re yi'on ja'jun tijoj-pokonal pa quik'a'. Y re quitziak re je'quicusalon, ja re tziak re nibex lino[i] cha, jun tziak camas sak y chuka' can niyiq'uiloj. Y chiquic'o'x k'axnak jun cinturón re banon cha k'anapuak. 7 Y jare' tak jun chique re je caje' re camas q'uiy quinak'avach[j] c'o, can cada jun chique re vuku' ángeles xuyala-a ja'jun copa re banon cha k'anapuak chique, y re copas re' can je'nojnak-a riq'uin re andex rubanic re tijoj-pokonal re nuya' re Dios. Ja Dios re' re nojel tiempo c'o.

8 Re rachoch re Dios chila' chicaj can xnoj[k] riq'uin jun ancha'l sib,[l] ja seña re' chin nik'alajin re ruk'ij y re ru-poder[m] re Dios. Y can man jun nitiquir ndoc-apo chire' pa rachoch. Xa can c'aja tak c'achojnak chic can ruyi'ic re vuku' tijoj-pokonal coma re ángeles.

<- APOCALIPSIS 14APOCALIPSIS 16 ->