1 Can tinojij jabal che re Karta' Dios camas yojrajo'. Roma can xuban chaka che ruc'amon nibex rajc'ual re Dios chaka,[a] y can quire-va, can yoj rajc'ual-va reja'. Y re vinak re man quiniman-ta re Dios man quitaman-ta kavach, roma reje' man quitaman-ta rach re Dios. 2 Hermanos, yex re camas yixinjo', vocame yoj rajc'ual chic re Dios. Pero can c'amaje-na tik'alajin anchique forma xtakabana' tak xte'c'ulum-pa re Jesucristo. Xaxe kataman che xkojoc ancha'l reja',[b] tak xtakatz'at[c] andex rubanic reja'. 3 Y yoj re kayaben re k'ij re', katz'amon rujosk'esic[d] re kac'aslen. Roma re Jesucristo can ch'ajch'oj-va.

4 Conojel re ye'macun, man niquinimaj-ta re ru-ley re Dios. Roma re mac jare' re nibano che man nanimaj-ta re ru-ley re Dios.[e] 5 Y yoj kataman che re Jesucristo xpa chach re ruch'ulef chin xucuy re kamac.[f] Reja' cama-va jun mac xuban. 6 Y vo xa yoj jun kabanon riq'uin reja', kayi'on chic c'a can rubanic re mac. Pero vo xa c'a yojmacun,[g] can k'alaj che man kataman-ta rach reja'.[h] 7 Yex re can yix ancha'l ch'utak vajc'ual, man quixk'olotaj. Roma vo xa xtakac'uaj jun c'aslen choj,[i] yoj choj chuka' ancha'l re Jesucristo. Roma reja' can choj-va. 8 Pero vo xa man xtakaya-ta can re mac, xa can yoj richin re itzel.[j] Roma reja' can je'rubanalom-pa re mac. Y mare' tak xpa re Ruc'ajol re Dios, chin nuq'uis[k] re samaj re nuban re itzel.

9 Yoj re yoj rajc'ual chic re Dios, kayi'on chic can rubanic re mac,[l] roma re Dios xuya' re ruc'aslen chaka y xujal re kana'oj. Y roma re c'aslen re c'o kaq'uin yoj can riq'uin re Dios pitinak-va, nuban chaka che man chic yojmacun-ta. 10 Y can k'alaj re anchique re je rajc'ual re Dios. Y can k'alaj chuka' anchique re je rajc'ual re itzel. Jac'a re man quic'uan-ta jun c'aslen choj y man ye'quijo-ta re hermanos, jare' re man je richin-ta re Dios.

11 Re tzij re' can ic'axam-pa. Re tzij re can ic'axam-pa tak xinimaj re Jesucristo, ja re nubij che takajo-ki'.[m] 12 Y man takaban ancha'l xuban re jun ache xc'ue' ajuer can re xubini'aj Caín. Reja' can richin-va re itzel, y xuquimisaj re ruchak'.[n] ¿Y anchique roma xuquimisaj? Roma re rubanabal re ruchak' can je choj-va, y jac'a re rubanabal reja' man je otz-ta.

13 Hermanos, vo xa yixtzelas[o] coma re vinak re man quiniman-ta re Dios, man tisatz ic'o'x roma yixtzelas. 14 Yoj can yoj-elinak chic-pa chupan re camic, chin che xojak'ax chupan re c'aslen.[p] Y kataman che quire' roma can ye'kajo' re hermanos. Jac'a re man niquijo-ta-qui', can je quiminak chach re Dios. 15 Roma re ye'tzelan[q] chin jun hermano, je ancha'l re ye'quimisan.[r] Y yex itaman che re ye'quimisan man c'o-ta re c'aslen re man niq'uis-ta pa tak cánma. 16 Re Jesucristo man xupokonaj-ta xquimisas katzij yoj.[s] Y riq'uin re' xuc'ut chakavach che can nic'atzin che nakac'ut riq'uin re kabanabal che ye'kajo' re hermanos, y man takapokonaj nakaya' re kac'aslen coma reje', vo xa can nic'atzin che nakaya'. 17 Vo xa c'o ronojel kaq'uin re nic'atzin chaka, y nakatz'at jun hermano che manak ruay,[t] o manak rutziak, y can man nipa-ta pa kánma che nakato', can k'alaj che man nakajo-ta re Dios. 18 Yex re can yix ancha'l ch'utak vajc'ual, man kojovan[u] xaxe riq'uin re kach'abal. Xa can que'kato' re nic'aj chic. Y riq'uin re' can xtik'alajin che can katzij-va yojovan.

19 Y roma yojovan, nakatamaj che yoj richin re katzij[v] ch'abal, y mare' can nakana' che kabanon confiar-ki' riq'uin re Dios. 20 Y vo xa nakana' pa tak kánma che c'o jun cosa man otz-ta kabanon y xa man quire-ta, re Dios rutaman.[w] Roma reja' can rutaman-va ronojel. 21 Y yex hermanos re camas yixinjo', vo xa nakana' pa tak kánma che manak kamac chach re Dios, can man jun ximbire' kaq'uin, y can riq'uin ronojel kánma yojch'o riq'uin re Dios.[x] 22 Y tak nakaban orar, reja' nuya' chaka ronojel re nakac'utuj cha.[y] Roma ye'kaban re ye'rubij, y chuka' ye'kaban re ye'ka chach. 23 Y re nubij reja' ja che takanimaj[z] re Jesucristo re Ruc'ajol, y takajo-ki'. Quire' nubij reja' che takabana'. 24 Y vo xa ye'kaban re ye'rubij, can jun kabanon riq'uin reja',[aa] y chuka' reja' can c'o pa tak kánma. Y kataman che can c'o pa tak kánma, roma c'o re Espíritu Santo[bb] re ruyi'on chaka.

<- 1 JUAN 21 JUAN 4 ->