Re nabey carta re xutz'ibaj can re apóstol San Juan

1 Nintz'ibaj-a chiva chij re Jun re can c'o-va.[a] Re Jun re can c'o-va tak c'amaje-na tic'ue' re ruch'ulef. Pero yoj can xkac'axaj re ruch'abal. Y can xkatz'at[b] chuka', roma xkatzu' riq'uin re kanak'avach, y can xkatz'am riq'uin kak'a'. Y re' ja re Jesucristo re nibex Ch'abal[c] cha re niyi'o c'aslen. 2 Re niyi'o c'aslen[d] xc'ue' vova' chuch'ulef, y yoj xkatz'at. Y mare' nakatzijoj chiva re xkatz'at.[e] Nakatzijoj chiva re Jun re can c'o-va[f] riq'uin re Karta' Dios, y xpa vova' chuch'ulef y xc'ue' chakacojol. 3 Yoj can nakatzijoj chiva re xkatz'at y re xkac'axaj, chin che quixoc ancha'l yoj, roma yoj junan kavach[g] riq'uin re Karta' Dios y riq'uin re Jesucristo re Ruc'ajol. 4 Y nakatz'ibaj-a ronojel re' chiva roma can nakajo-va che can-ta jabal yixqui'cot pa tak ivánma.[h]

5 Y vocame nakatzijoj chiva re xubij can re Jesucristo chaka yoj, che re Dios jare' re sakil,[i] y man jun k'oko'm c'o riq'uin. 6 Y vo xa nakabij che junan chic kavach riq'uin re Dios, y xa kac'uan jun c'aslen chin re k'oko'm,[j] man katzij-ta[k] nakabij che junan kavach riq'uin re Dios, roma xa mana-ta re' re yojtajin chubanic. 7 Re Dios can c'o-va pa sakil, y vo xa yoj chupan re kac'aslen yojbiyin pa sakil, can junan kavach quiq'uin re quiniman chic re Jesucristo re Ruc'ajol re Dios. Y chuka' re ruq'uiq'uel[l] re Jesucristo nulisaj ronojel re kamac.

8 Y vo xa nakabij che man jun kamac,[m] kayon yoj nakak'ol-ki'. Roma re nakabij man katzij-ta. 9 Y vo xa nakasekresaj re kamac[n] chin che yojcuy, re Dios can nucuy-va re kamac y nuch'ojersaj re kánma y nulisaj ronojel re kabanabal re man otz-ta je'kabanalon. Roma reja' camas otz y can choj-va y man nujal-ta re ruch'abal. 10 Y jac'a vo xa nakabij che man jun mac nakaban, can nakaban che man katzij-ta nubij re Dios,[o] y re ruch'abal man c'o-ta pa tak kánma.

1 JUAN 2 ->