2 CORINTIOS 5

1 Kayo'on-vi c'a kánima que ri kach'acul, ri racho ri kánima chuvüch ri ruch'ulef, stape' (aunque) xa ncom, ri kánima nuc'ul chic c'a jun racho riq'uin ri Dios. Y ri jay ri' ja ri Dios ri banayun. Ri jay ri' richin c'a chi jumul y ja ri chila' chicaj c'o-vi. 2 Y jari' ri nbanun chin ri kánima que njilon chupan ri ch'aculaj ri c'unük racho. Juis vi c'a ri rayibül kiq'uin que ri kánima ntoc ta yan chupan ri jun chic racho ri c'o chila' chicaj. 3 Riq'uin ri' ri kánima c'o ta c'a rutziek, y man ta ch'anül. 4 Roj nkujilon y nkac'usaj c'a pokonül riq'uin ri ch'aculaj ri kac'uan, ri c'unük racho ri kánima. Nkujilon y nkac'usaj pokonül roma, pero man roma tüj ri' nkajo' que ri kánima ntel ta e yan chupan. Ri nkajo' c'a, ja ri npu'u ta yan ri jun chic racho ri kánima y nucuchu' ta ka pe rij ri nabey racho, richin quiri' ri racho ri kánima, ri ch'aculaj ri xa nq'uis, nc'uje' yan ta c'a chupan ri jun chic racho ri kánima, ri ch'aculaj ri xa man nq'uis tüj. 5 Ri Dios nrajo' que nc'uje' kac'aslen ri man nq'uis tüj y rubanun cheke que riq'uin ronojel kánima koyoben-apu. Y chuka' ruyo'on ri Lok'olüj Espíritu cheke richin retal que ketzij que nyekila' ri c'aslen ri man nq'uis tüj.

6 Romari' roj kayo'on kánima chi jumul, koyoben-apu jampe' c'a nkac'ul ri jun chic racho ri kánima. Roma ketaman que tok c'a rojc'o vi chupan ri ch'aculaj re', y man jani rojc'o tüj chupan ri ketzij kacho, man jani nkuc'uje' tüj c'a riq'uin ri Ajaf Jesús. 7 Roma vocomi, roj xa man nkatz'et tüj ruvüch. Roj xa roma kayo'on kánima riq'uin, romari' katz'amon bey. 8 Roj kayo'on-vi kánima, y juis c'a nkajo' que más utz xa man ta rojc'o chic chupan ri ch'aculaj ri kac'uan, xa riq'uin ta chic ri Ajaf Dios nkuc'o-vi nkajo'. 9 Romari' nkatij c'a chuka' kak'ij que nkabün ri rurayibül ri Dios richin que nkuka' chuvüch. Nkajo' que nkuka' chuvüch tok c'a rojc'o chupan ri ch'aculaj ri kac'uan y chuka' tok roj manak chic chupan. 10 Roma konojel roj nc'atzinej que nkujapon chuvüch ri ape' nbün juzgar ri Cristo, richin quiri', chikajujunal nkac'ul c'a rutojic ri kabanun tok xojc'uje' chupan ri ch'aculaj chuvüch ri ruch'ulef, si utz o man utz tüj ri xekabanala'.

Ri Pablo riq'uin jun ch'ajch'oj ránima nbün ri rusamaj ri Dios

11 Roj c'o-vi c'a chikac'u'x ri Ajaf Dios, romari' c'o xbiri' kiq'uin y nkusamüj c'a richin que yec'o ta c'a más ri nyetaken richin. Ri Dios retaman-vi c'a kavüch roj achique roj. Y ninvoyobej que quiri' ta nk'alajin chuka' chivüch rix, y quiri' ta chuka' nina' rix pa tak ivánima, achique roj. 12 Man tinuc c'a que nkutajin chubixic quiri' chive xaxe richin que nkujic'ul ta roj, man quiri' tüj. Ri nkajo' ja ri nkaya' k'ij chive que tina' juis quicot pa tak ivánima koma roj, roma man jun ch'aculaj kiq'uin. Richin quiri' rix jari' ri nibij cheque ri nyebin que ye rusamajela' ri Dios, pero xa man quiri' tüj. Rije' nquibün que ye utz chiquivüch ri vinük, pero pa tak cánima xa man quiri' tüj. 13 Roma ri nyenucun que roj roj locos, yin ninbij c'a cheque que si quiri', roj locos chubanic rusamaj ri Dios y richin que nuc'ul ta c'a chuka' ruk'ij ri Dios. Y si yec'o nyenucun que man roj locos tüj, pa ruchojmil nkabün ri rusamaj ri Dios richin quiri' c'o utz nuc'ün-pe chive rix. 14 Y romari' ja ri Cristo nkurujo', jari' ri nbanun cheke que quiri' nkabün, roma ri Cristo juis nkurujo', que xa koma konojel roj aj-maqui' tok rija' xcom. Y romari' chanin vi c'a chuka' nkanuc que roj xojcom-vi c'a riq'uin rija', roma pa kaq'uexel roj xcom-vi. 15 Rija' koma vi c'a konojel tok xcom, richin que roj ri c'a c'o kac'aslen man xaxe tüj roj ri tikanuc-ki'. Man quiri' tüj. Xa richin c'a que pa tak kac'aslen xaxe ta c'a nkanuc ri xcom pa kaq'uexel y xbec'astüj-pe chuka' koma roj. 16 Romari' tok roj ri vocomi y ri chikavüch apu man jun chic ri nkatz'et, cachi'el ri rubanun can tok c'a man jani jalatajnük tüj ri kac'aslen, tok xaxe nkatz'et ri jaru' titzu'un jun vinük. Ri Cristo xa quiri' vi chuka' xkabün chin, y xkanuc que rija' xa cachi'el achique na vinük. Pero vocomi man quiri' tüj chic nkanuc pari'. Vocomi ketaman chic c'a achique rija'. 17 Achique na c'a vinük ri rutaken chic ri Cristo, xjalatüj-vi c'a rubanic. Xban-vi c'a jun c'ac'a' vinük chin. Ronojel ri itzel ri xerubanala' pa nabey tok man jani xutakej, xecanaj-vi can c'a, y xutz'om c'a e jun c'ac'a' c'aslen y c'ac'a' ri nyerubanun ri ye utz vi.

18 Y ronojel c'a re', riq'uin vi c'a ri Dios xalüx-vi-pe. Rurayibül vi c'a rija' que roj junan ta kavüch riq'uin. Pero richin que nbanatüj ri samaj ri', ri Dios xucusaj ri Cristo. Ri samaj c'a ri xbün ri Cristo, nbün c'a que ri vinük junan quivüch riq'uin ri Dios. Y ri samaj ri ruyo'on ri Dios cheke roj richin que nkabün, ja ri nkaya' rutzijol cheque ri vinük que c'o jun rubanic rija' que ri nquitakej rija' junan ta quivüch nbün riq'uin ri Dios. 19 Ri Dios richin que xbün ri samaj richin que ri vinük junan ta quivüch riq'uin, ja ri Cristo ri xucusaj y c'o riq'uin ri Cristo richin que xbün ri samaj ri'. Y cheke roj xuchilabej c'a que nkak'alajrisaj ri tzij ri ntiquer nbün que junan ta quivüch ri vinük riq'uin ri Dios. Ri Dios nrajo' que ri vinük man jun tüj quimac nk'alajin chuvüch rija'. 20 Roj roj cha'on-vi c'a roma ri Cristo y nkurutük richin que pa rubi' rija' nkuch'o-vi. Pa rubi' c'a ri Cristo nkabij chive que tibana' que junan ta ivüch riq'uin ri Dios. Y tok quiri' nkabij chive, ja vi ri Dios ri nch'o iviq'uin. 21 Quiri' nkabij, roma ri Cristo xban-vi chin que ja rija' ri xuc'uan ri kamac konojel roj, y rija' man jun bey xbün tüj jun mac. Quiri' xban chin richin que konojel ta roj nban cheke roma rija' que man jun kamac nk'alajin chuvüch ri Dios roma rija' xcuy yan ri kamac.

<- 2 CORINTIOS 4 2 CORINTIOS 6 ->