Vuj chirij ri xquibanala' ri apóstoles

Ri Lok'olej Espíritu can xtipe-vi

1 Nimalej Teófilo,* chupan c'a ri jun vuj ri xinben-el chave nabey, nutz'iban c'a el ri samaj ri xutiquiriba' can rubanic ri Jesús, y ri xutiquiriba' chuka' can ruc'utic chiquivech ri vinek. 2 Y xutanaba' can chupan ri k'ij tok rija' xbe chila' chicaj.† Pero tok rija' c'a man jani nibe chila' chicaj, riq'uin ri ruchuk'a' ri Lok'olej Espíritu xubij c'a chique ri ru-apóstoles ri e rucha'on, ri nic'atzin chi niquiben‡ can, tok rija' xtibe. 3 Y rija' can xutej pokon, y xcamisex. Pero tok rija' c'astajinek chic pe, xuc'utula' c'a ri' chiquivech.§ Cavinek k'ij ri xubanala' queri'. Y c'o ch'aka' chic ri xubanala' richin tetamex chi can q'ues vi. Y c'o c'a chuka' xubila' chique chirij tok ri vinek ye'oc pa rajavaren o pa ruk'a' ri Dios.

4 Y jun bey tok ri Jesús y ri e ru-apóstoles quimolon-qui', ri Jesús xubij chique: Quixc'oje' c'a re vave' pa tinamit Jerusalem,*Lc. 24:49. y tivoyobej ri nubin chive; tivoyobej c'a ri rusujun-pe ri Dios chi can nuya'.†Jn. 14:16, 26; 15:26; 16:7. 5 Roma rix ivetaman chi ri Juan riq'uin ya' xeruben bautizar ri vinek. Jac'a rix, pa ca'i-oxi' k'ij apo, riq'uin ri Lok'olej Espíritu xquixban bautizar,‡Mt. 3:11; Hch. 11:16. xcha' ri Jesús.

Tok ri Jesús xtzolin-el chila' chicaj

6 Y ri quimolon c'a qui' xquic'utuj chire ri Jesús: Ajaf, ¿man cami ja ta k'ij re' tok yojacol roj israelitas y nic'oje' chic ri k'atbel-tzij pa kak'a'?§ xecha' chire.

7 Pero ri Jesús xubij chique: C'a ja na ri Dios nibin jampe' xtibanatej ri', y man nic'atzin ta chi nivetamaj rix.*Dt. 29:29; 1 Ts. 5:1. 8 Xaxe c'a tivetamaj, chi tok ri Lok'olej Espíritu xtika-pe pan ivi', xtic'ul c'a uchuk'a', y xquinik'alajirisaj chique ri vinek pa tinamit Jerusalem, y chique ri vinek ri ec'o pa ch'aka' chic tinamit vave' pa Judea y ri pa Samaria, y chique chuka' conojel vinek pa ch'aka' chic ruvach'ulef chi nej chi nakaj, xcha' ri Jesús.

9 Y can xe chic c'a ri ch'abel ri' ri xubij can. Roma ri ec'o riq'uin ri Jesús ri chiri', can quitzuliben c'a tok xyacatej-el chiquivech pa cak'ik', y xoc-el pa jun sutz', y man chic xquitz'et ta.†Jn. 6:62. 10 Y ri apóstoles can c'a quitzuliben na c'a el ri xbe chicaj. Tok c'a xquina' xebec'ulun e ca'i' achi'el achi'a' quiq'uin, ri quicusalon sek tak tziek. 11 Y ri ca'i' achi'el achi'a' ri' xquibij c'a chique ri e ru-apóstoles can ri Jesús: Achi'a' ri yixpe pa Galilea, ¿achique roma tok yixtzu'un chicaj? Re Jesús re xitz'et chi xbe chicaj re vacami, can xtipe chic c'a jun bey. Y can achi'el re xuben-el re xbe, can que chuka' ri' xtuben ri pa ruca'n bey tok xtika-pe chila' chicaj,‡Dn. 7:13; Jn. 14:3; 1 Ts. 1:10; Ap. 1:7. xecha' chique.

Ri Matías xoc apóstol pa ruq'uexel ri Judas

12 Y ri apóstoles xe'el c'a pe ri chiri' pa ruvi' ri juyu' rubini'an Olivos, y xetzolin ri pa tinamit Jerusalem. Ri Olivos man nej ta c'o-vi chire ri Jerusalem, xa pa jun la'ek kilómetro.§ 13 Y tok xe'apon c'a, xejote-el ri pa ruca'n vik jay* (cavek jay) ri acuchi can ec'o-vi-pe: Ri Pedro, ri Jacobo, ri Juan, ri Andrés, ri Felipe, ri Tomás, ri Bartolomé, ri Mateo, ri Jacobo ri ruc'ajol ri jun achin rubini'an Alfeo, ri Simón† ri c'o quiq'uin ri achi'a' ri nibix celadores‡ chique, y ri Judas§ ri rach'alal ri Jacobo. 14 Y conojel rije' can jantape' c'a niquiben orar, junan quivech conojel, e cachibilan ri ixoki',* y chuka' ri María ri rute' ri Jesús, y ri e rach'alal† ri Jesús.

15 Y jun k'ij tok quimolon c'a qui' jun la'ek ciento veinte kach'alal, ri Pedro xbepa'e-pe chiquivech, y xubij c'a chique: 16 Vach'alal, ri jun ka-rey ri xc'oje' ojer can y xubini'aj David, rutz'iban c'a can ri ch'abel ri xeruya' ri Lok'olej Espíritu‡2 S. 23:2; He. 3:7; 1 P. 1:11. pa ránima. Chupan c'a ri vuj ri rutz'iban can rija', c'o c'a ri nich'on chirij ri Judas§Jn. 18:3. ri xuc'uan quibey ri vinek ri xebe chuchapic ri Jesús. Can c'o-vi c'a chi xbanatej ri'.*Sal. 41:9. 17 Y ri Judas†Lc. 6:16; Hch. 1:25. ri' can xoc-vi kachibil, y c'o c'a samaj ri xuben chuka'. 18 Y riq'uin ri ru-mero‡2 P. 2:15. rija' xlok' jun ulef. Ja mero ri' ri xuc'ul roma xujech-el ri Jesús. Ri Judas xucamisaj-ri'.§Mt. 27:5, 7. Rija' xcubucu', y ronojel ri rupan c'a quela' xeka-vi, tok xka' pan ulef. 19 Y tok xbanatej re', conojel c'a ri vinek aj-Jerusalem xe'etaman, y romari' tok Acéldama xbix chire ri ulef ri'. Y jari' ri bi'aj ri niquiya' rije' chire jun ulef richin quic'.*Mt. 27:8. 20 Romari' bin can chupan ri vuj rubini'an Salmos:

Man jun c'a tic'oje' chupan ri rachoch,

xa timalix can.†

Y chuka' nubij:

Toc chic jun ruq'uexel richin nipa'e' can chuvech ri rusamaj,‡ nicha'.

21 Roma c'a ri', can nic'atzin c'a chi nikacanoj jun ruq'uexel, pero can ja ri chiquicojol ri achi'a' ri can ronojel tiempo ec'o-pe kiq'uin, y ri can e benek-vi kiq'uin tok xc'oje' ri Ajaf Jesús. 22 Jun chique ri can ec'o-pe kiq'uin tok xban bautizar ri Jesús roma ri Juan, c'a tok xbe chila' chicaj,§Hch. 1:2. y xel-el chikacojol. Can nic'atzin c'a chi nuk'alajirisaj*Hch. 1:8. junan kiq'uin roj achique rubanic tok ri Jesús xbec'astej-pe chiquicojol caminaki',†Hch. 4:33. xcha' ri Pedro.

23 Y jac'ari' xquiya' quibi' e ca'i'. Xquiya-apo ri rubi' ri José ri rubini'an Barsabás y niquibij chuka' Justo chire, y ri rubi' ri Matías. 24 Y xquiben c'a orar, quere': Ajaf, rat ri natz'et ri cánima‡Jn. 2:24; He. 4:13; Ap. 2:23. conojel, tac'utu' c'a chikavech achique c'a chique re ca'i' achi'a' re' ri acha'on, 25 richin noc can apóstol§Ro. 1:5. pa ruq'uexel ri Judas, y nipa'e' chuvech ri samaj. Roma ri Judas xa xuya' can ri samaj, roma ri itzel xerubanala'. Y vacami rija' xapon yan chupan ri lugar ri ruc'amon chi napon-vi, xecha'.

26 Y ri achin c'a ri xc'oje' can pa ruq'uexel ri Judas richin noc cachibil ri julajuj apóstoles, ja ri rubini'an Matías, roma pa ruvi' rija' xka-vi*Lv. 16:8; 1 S. 14:41, 42. can ri samaj ri'.

HECHOS 2 ->