Ri nabey carta ri xutz'ibaj can ri apóstol San Juan

1 Nintz'ibaj c'a chive chirij ri Jun ri can c'o-vi-pe.[a] Ri Jun ri can c'o-pe tok man jani c'o ta re ruvach'ulef. Pero roj can xkac'axaj ri ruch'abel. Can xkatz'et[b] rija', roma xkatzu' riq'uin ri runak' tak kavech. Y can xkachop riq'uin ri kak'a'. Y ja rija' ri Ch'abel[c] ri niyo'on c'aslen. 2 Ri niyo'on c'aslen[d] xoc'ulun c'a, y xkatz'et. Y romari' nikatzijoj chive ri xkatz'et.[e] Nikatzijoj chive ri Jun ri can c'o-vi-pe[f] riq'uin ri Katata' Dios, y xoc'ulun chikacojol. 3 Roj can katzijon c'a chive ri xkatz'et y ri xkac'axaj, richin chi quixoc achi'el roj chi junan kavech[g] riq'uin ri Tata'ixel y riq'uin ri Jesucristo ri Ruc'ajol. 4 Y nikatz'ibaj c'a ronojel re' chive roma can nikajo-vi chi tz'aket ta ri quicoten ri xtic'oje' iviq'uin.[h]

5 Y vacami c'a nikatzijoj chive ri xubij can ri Jesucristo chike roj, chi ri Dios can sakil[i] vi, y man jun k'eku'n ri c'o riq'uin. 6 Y vi nikabij chi junan chic kavech riq'uin ri Dios, y xa kac'uan jun c'aslen richin ri k'eku'n,[j] man kitzij[k] ta c'a ri nikabij chi junan kavech riq'uin ri Dios, roma xa man ja ta ri kitzij ri nikaben. 7 Ri Dios can c'o-vi pa sakil, y vi roj chupan re kac'aslen yojbiyin pa sakil, can junan c'a kavech quiq'uin ri quiniman chic. Y chuka' ri ruquiq'uel[l] ri Jesucristo ri Ruc'ajol ri Dios nrelesaj ronojel ri kamac.

8 Y vi nikabij chi can man jun kamac,[m] kayon roj nikak'ol-ka-ki'. Roma man kitzij ta ri nikabij. 9 Y vi nikak'alajirisaj c'a ri kamac[n] richin chi yojcuy, ri Dios can nucuy-vi ri kamac y nuch'ajch'ojirisaj ri kánima chire ri man e choj tak banobel ta. Roma rija' can choj vi y man nujel ta ri ruch'abel. 10 Y jac'a vi nikabij chi man jun mac nikaben, can nikaben chi man kitzij ta ri nubij ri Dios.[o] Y ri ruch'abel man c'o ta pa kánima.

1 JUAN 2 ->