Hebreos 13

Ri utz chi niqui'en ri quiniman ri Jesucristo

1 Achel ri ibanon-pe chi ijo'on-pe-ivi'[a] chivech, jumul c'a quiri' tibana' rix ri junan iniman ri Jesucristo. 2 Man timestaj chi nic'atzin chi utz nic'ul quivech chi'ivacho ri epetenak naj,[b] roma ec'o jujun riq'uin xquic'ul quivech ri epetenak naj, nis-ta xquina'ej chi ángeles[c] ri xcoxkonej-e-qui' chicacho. 3 Man que'imestaj ri ec'o pa tak cárcel,[d] xa tina' chi achel ja jun rix, rix tz'apel, y man que'imestaj ri ni'an pokon chique, xa tina' chi achel ja jun rix rixc'o chupan ri pokon[e] junan quiq'uin. 4 Chi'ivonojel tina' chi can c'o rakale'n ri quic'aslen ri achi riq'uin ri rixayil, y chi eca'i', xe chiquivech tiquic'uaj-vi-qui'. Roma ja ri Dios mismo xtiyo'on castigo pa ruvi' ri man xe ta chic ri achok riq'uin c'ulan-vi nuc'uaj-vi-ri' y pa ruvi' ri nucusaj ri ru-cuerpo richin nic'uje' xa achok riq'uin na.[f] 5 Man ti'e ivánima pa ruvi' méra,[g] xa tiquicot ivánima riq'uin ri ajani ichajin vacami. Roma ri Dios quire' ru'in: Yin man jun bey xquixinxutuj can,[h] ni man jun bey xtinya' can[i] vij chivech, xcha'. 6 Y roma quiri' ru'in chike, cukul kac'u'x nkutiquer nika'ij:

Yin ja ri Ajaf nito'on vichin;

Man ninxi'ij ta vi' chuvech ri achique nicajo' niqui'en ri vinak[j] chuve,

nkucha'.

7 Man que'imestaj ri xeyuk'un ivichin pa ruvi' ruch'abel ri Dios. Tinojij rij ri rajil-ruq'uexel quic'ulun rije' riq'uin ri c'aslen ri xquic'uaj, y achel xqui'en rije' chi xcuke-e quic'u'x, quiri' mismo tibana' rix.[k] 8 Quiri' nin-ij chive roma ri Jesucristo ja achel ri ivir, quiri' ri vacami, y quiri' mismo ri chikavech apu.[l] 9 Ri jalajoj tak (tijonic, enseñanza) ri man ruc'uan ta ri' riq'uin ri nu'ij ruch'abel ri Dios, man tiya' lugar chi yixruc'uaj juc'an chic.[m] Roma más utz chi ri ivánima nuc'ul ruchuk'a' riq'uin ru-favor ri Dios,[n] y mani riq'uin ninimaj chi c'o cosas utz y c'o ri man utz ta richin yetij,[o] roma ri benak cánima pa ruvi' ri xaxe richin yetij, man jun bey c'o utz xuq'uen-pe chique.[p] 10 Roj ri kaniman ri Jesucristo, mana-ta chic quiquiq'uel chicop yesuj roma kamac chuvech ri Dios, ja yan chic ruquiq'uel ri Jesucristo ri xbin ri nitojo. Y ri sacerdotes israelitas ri yequisuj quiquiq'uel chicop roma ri mac chupan ri aj-roch'ulef racho ri Dios, manak quik'a' richin c'o favor niquiq'uen can che ri sipanic ri sujun roma ri kamac.[q] 11 Ri achique roma nin-ij quiri', jare': Ri chicop ri nuc'uax-apu quiquiq'uel chutojic ri mac chupan ri Lugar Más Lok'olaj pa racho ri Dios roma ri nimalaj sacerdote israelita, ri quich'acul ri chicop ri' ye'eleses-e pa tinamit richin yeporox.[r] 12 Romari' ri Jesús richin xu'on ch'ajch'oj che ri rutinamit[s] riq'uin ri ruquiq'uel,[t] ja jun rija' xeleses-e pa tinamit[u] y chiri' xcamises-vi. 13 Vacami, kujel c'a e roj pa tinamit, jo' riq'uin ri Jesús, xa jun tikabana' riq'uin chupan ri yok'onic ri achel x-an-e che[v] rija'. 14 Roma vave' choch'ulef manak jun katinamit ri can ta kichin jumul,[w] pero c'o jun aj-chicaj katinamit[x] ri man jani tekila', y jari' ri benak kánima chucanoxic vacami. 15 Roma c'a ri', riq'uin ruto'ic ri Jesucristo, jumul tikaya' ruk'ij[y] ri Dios, achel can ta jun sipanic ri nikasuj-apu chuvech, riq'uin ri nika'ij chiquivech ch'aka' chic chi kaniman rubi'. 16 Man tikaya' can rubanic ri utz, y nis-ta chi nikatola-ki' chikavech,[z] roma ri quiri' nika'an, jun sipanic ri ntel ránima[aa] ri Dios chi nikasuj chuvech.

17 Tinimaj quitzij ri yeyuk'un ivichin pa ruvi' ruch'abel ri Dios,[bb] tiya-ivi' chuxe' quitzij, roma ja rije' yevaran pa ruvi' ri ivánima,[cc] roma queteman chi c'o na jun k'ij nequijacha' cuenta chuvech ri Dios. Tinimaj c'a quitzij, richin quiri' yequicot yixquivaraj y mani riq'uin bis. Roma si riq'uin bis, man jun utz nuq'uen-pe chive.

18 Tibana' orar pa kavi'.[dd] Quiri' nika'ij chive roma ri kánima nuna' chi utz nkubin chuvech ri Dios, y nikarayij chi ronojel ri nika'an, can ta utz chuvech. 19 Y más ninc'utuj quemelal chive chi tibana' orar pa nuvi' yin, richin quiri' yitiquer chic yixentz'eta'[ee] cha'anin.

Ri ruq'uisbel tak saludos y ri ruq'uisbel tak ch'abel che ri vuj re'

20 Ri Dios ri niyo'on uxlanen[ff] pa tak kánima, jari' xc'ason-e chiquicojol ri anima'i' ri Nimalaj Yuk'unel[gg] quichin ri ovejas, y ri' ja ri Kajaf Jesucristo ri xbin ruquiq'uel[hh] richin xc'achoj ri c'ac'ac' ruvujil c'aslen ri man jun bey xtijalataj-e. 21 Ja ta c'a Dios ri' ri xquixto'on richin yixtiquer ni'en utzulaj tak favores, richin ni'en ri nrojo' rija'. Can ta xtusamajij pan ic'aslen ri achique nika chuvech, y ri' roma ri Jesucristo ri jumul-jumul tiyo'ox nimalaj ruk'ij. Amén.

22 Ninc'utuj c'a quemelal chive rix ri junan kaniman ri Jesucristo iviq'uin, chi ticoch'o' juba' re ch'abel yencusaj richin yixinpaxa'aj, roma xa man q'uiy ta ri achique nutz'iban-e chive. 23 Ninya' rutzijol chive chi ri Timoteo[ii] ri junan kaniman ri Jesucristo riq'uin, xa xeleses yan pe pa cárcel; y si xtuka cha'anin viq'uin, junan xquixentz'eta' riq'uin. 24 Que'ibana' saludar conojel ri yeyuk'un ivichin pa ruvi' ruch'abel ri Dios,[jj] y conojel ri ch'ajch'oj chic banon che quic'aslen roma ri Dios. Ri aj pa roch'ulef Italia ri ec'o vave' niquitak-e i-saludo. 25 Ri ru-favor ri Dios xtic'uje' ta c'a iviq'uin chi'ivonojel. Amén.

<- Hebreos 12