3 Nikatij kak'ij chi man ta koma roj, ec'o niquil jun roma chi man niquinimaj ta ri Dios,[d] richin quiri' man ta niyo'ox chi q'uix rusamaj ri Dios ri nkutajin riq'uin. 4 Nikajo' chi can ta nik'alajin chi kitzij roj rusamajela' ri Dios[e] chupan ronojel ri nika'an; chupan ri ajani nikacoch', chupan ri k'axomal nikak'asaj, chupan ri manak nikacusaj, chupan ri nkurulatz'atz'ej, 5 chupan ch'eyoji'l,[f] chupan ri nkuyo'ox pa tak cárcel, chupan ri nkuka pa quik'a' vinak coyoval chikij, chupan cosic pa ruk'a' samaj, chupan coch'on varan, chupan coch'on vayijal; 6 chupan ri ch'ajch'oj c'aslen ri kac'uan, chupan ri ajani keteman chirij ruch'abel ri Dios, chupan ri nikacoch' ri nipe pa kac'aslen, chupan ri utzulaj kano'oj nika'an, chupan ri xa jun kabanon riq'uin ri Lok'olaj Espíritu, chupan ri nkujo'on riq'uin ronojel kánima, 7 chupan rutzijosic ri kitzij, chupan ruchuk'a' ri Dios ri nito'on kichin,[g] chupan ri chojmilaj c'aslen ri ruyo'on ri Dios chike chi nikato-ki' chutzijosic ri ruch'abel, o tok nic'atzin chi nikato-ki' chuvech xa achique na, 8 chupan ri ni'ix chikij chi c'o man c'o kak'ij, y chupan ri utz man utz katzijol ni'an. Ec'o niqui'ij chi roj satzoy quino'oj vinak, pero xa ja ri kitzij ri nika'ij. 9 Ec'o man nkojquiya' ta pa cuenta, pero xa jabel eteman kavech.[h] Achel can rojc'o chic pa ruk'a' ri camic,[i] pero c'a roj q'ues na. Roj yo'on pa k'axomal richin nkutijox, pero man roj caminak ta pa ruk'a'.[j] 10 Masque roj yo'on chi bis, pero xa niquicot kavech;[k] achel man jun oc kachajin, pero eq'uiy kabanon beyoma' chique chirakan ri Ajaf.[l] Achel man jun oc ni'e-vi kak'a', pero xa c'o kak'a' che ronojel.

11 Ronojel ri ka'in chive rix aj-Corinto can kitzij vi; kanimirisan ri kánima chivech richin yixkajo'. 12 Roj can kajakon ri kánima chivech, y can rixc'o pa kánima. Jac'a rix, xa man jakal ta ri ivánima.[m] 13 Can achel rix valc'ua'l[n] nin-en chive tok nin-ij chi tijaka' ri ivánima richin nkojijo', achel jun rutzolic ruq'uexel ni'en chike.