1 Pedro 5

Ri utz niqui'en ri uc'uay bey chiquivech ri quiniman ri Jesucristo

1 Vacami c'a, ninjo' yenpaxa'aj ri uc'uay ivichin ri ec'o chi'icojol, ri yin mismo jun chique rije', y yin jun tzijoy richin ri k'axomal[a] ri xintz'et[b] chi xuk'asaj ri Jesucristo, y voyo'en chi yin jun ri xquic'uje' chupan ri nimalaj ruk'ij ri xtik'alajrises. 2 Que'iyuk'uj rutinamit ri Dios[c] ri yo'on pan ik'a', man tina' chi xa jun eka'n chivij, xa pan ivánima talex-vi chi ye'iyuk'uj[d] achel nrojo' ri Dios chive. Man ti'en roma ch'acoj méra, xa tiq'uenc'ot ivánima tibana' ri samaj. 3 (Chuka', ka) man ti'en chi achel can ta rix ajaf[e] pa quivi' ri eyo'on pan ik'a', xa quixoc ejemplo chiquivech ri rutinamit ri Dios. 4 Y tok xtipe chic jun bey ri Jesucristo, ri más Nimalaj Yuk'unel[f] pa ruvi' rutinamit ri Dios, rix xtic'ul jun sipanic ri can c'o ruk'ij y man jun bey xtiq'uis.

5 Y rix ri más c'a rix ac'ola' na, tinimaj quitzij ri e'uc'uayon rutinamit ri Dios, chi'ivonojel tikasaj-ivi'[g] richin ninimaj itzij chivech. Roma ruch'abel ri Dios ri tz'iban can nu'ij:

Ri Dios nuk'at chiquivech ri niquina-qui' chi c'o quik'ij.

Jac'a ri niquina' chi manak oc quik'ij, yeruto' riq'uin ri ru-favor.[h]

6 Roma c'a ri', nin-ij chive chi tikasaj-ivi'[i] chuxe' ruchuk'a' ri nimalaj Dios, richin quiri' rija' xtu'on chi nic'uje' ik'ij tok xterila' ruk'ijul. 7 Ronojel ri al nina' pan ivánima,[j] tiya' can pa ruk'a' ri Dios, roma rija' can c'o pa ránima ri ic'aslen. 8 Tina' utz ri achique yixtajin riq'uin, can ta rix q'ues pa ruvi' ri ic'aslen. Roma ri itzel[k] ri royoval chike, nibiyaj achel jun león ri nisiq'uin nucanoj achique ta na jun nuxil che eyaj. 9 Pero riq'uin cof cukul ic'u'x[l] riq'uin ri Dios, rix tik'ata' chuvech. Roma iveteman chi ri quiniman ri Jesucristo pa jalajoj tak lugares chuvech ri roch'ulef, junan chi k'axomal niquik'asaj[m] iviq'uin. 10 Pero man richin ta q'uiy k'ij[n] xtik'asaj k'axomal. Y tok ik'asan chic ri k'axomal, ri Dios ri niyo'on ronojel ruvech favor, ri xoyon ivichin richin chi ja jun rix xtic'uje' ik'ij chupan ri nimalaj ruk'ij[o] ri man jun bey xtiq'uis, roma xa jun ibanon riq'uin ri Jesucristo, rija' xtutz'akatisaj ri ic'aslen, xtu'on chive chi cof xquixc'uje' chirakan, xtuya' ruchuk'a' ri ivánima, y xtu'on chi cof rix pa'el riq'uin. 11 Y ja ta c'a rija' ri xtiyo'ox nimalaj ruk'ij, y richin ta c'a rija' ri nimalaj uchuk'a' richin nu'on gobernar jumul-jumul.[p] Amén.

Ri ruq'uisbel tak saludo

12 Riq'uin ruto'ic ri Silvano[q] ri can cukul nuc'u'x riq'uin, nutz'iban-e ri ca'i-oxi' ch'abel re' chive,[r] richin yixinpaxa'aj y nin-ij-e chive chi re nutz'iban-e chupan ri vuj re', jare' ri kitzij ru-favor ri Dios, roma c'a ri', ticovij-ivi' chupan.

13 Ri quiniman ri Jesucristo ri niquimol-qui' pa rubi' ri Dios pa Babilonia,[s] ri junan echa'on iviq'uin, niquitak-e i-saludo. Quiri' mismo nu'on-e ri Marcos[t] ri can achel nuc'ajol pa rubi' ri Ajaf. 14 Tibanala' saludar ivi' chivech, y tik'alajin iviq'uin chi kitzij nijo-ivi'[u] chivech. Can ta nic'uje' uxlanen pan ivánima chi'ivonojel rix ri xa jun ibanon riq'uin ri Jesucristo.[v] Amén.

<- 1 Pedro 4