Ri na'ey carta ri xutz'ibaj ri apóstol San Pedro

1 Yin Pedro, ru-apóstol ri Jesucristo, nintak-e ri vuj re' chive rix ri man rixc'o ta pan itinamit, roma xa banon chive chi iquiran-e-ivi' pa tak tinamit ri ec'o pa tak roch'ulef Ponto, Galacia, Capadocia, Asia*Hch. 2:9. y Bitinia. 2 Ri Katata' Dios xixrucha',*2 Ts. 2:13. achel ri runojin-pe pan ivi', roma ri Lok'olaj Espíritu rubanon ch'ajch'oj che ri ivánima. Quiri' xu'on chive richin yixniman tzij, y richin ni'an ch'ajch'oj che ri ic'aslen riq'uin ri ruquiq'uel*He. 12:24. ri Jesucristo ri xbin tok xbajix chuvech cruz. Xtic'uje' ta c'a q'uiy favor y uxlanen pan ivánima.

3 Tikaya' ruk'ij ri Dios, ri ru-Dios y Rutata' ri Kajaf Jesucristo. Rija' riq'uin ri jani na nupokonaj kavech, xu'on chike chi xojalex chic jun bey,*Stg. 1:18. richin chi nic'ase' riq'uin kánima ri nimalaj favor ri koyo'en-apu.*1 Ts. 4:14. Y ri' roma xc'astaj-pe ri Jesucristo chiquicojol ri anima'i', 4 richin quiri' nikacochij riq'uin rija' jun sipanic ri man jun bey xtik'ey,*Mt. 6:20. man jun bey xtich'abakir, ni man jun bey xtiq'uis-ka ruk'ij. Y ri xticochij, chila' chicaj yacon-vi chive rix 5 ri rix chajin-apu*Jn. 10:28, 29. roma ruchuk'a' ri Dios roma cukul ic'u'x riq'uin rija'. Rix chajin-apu c'a tuka na ri tiempo ri ruchojmirisan ri Dios richin yixcolotaj-e, ri xtik'alajin chupan ri ruq'uisbel k'ij.

6 Y jari' ri nibano chi jani na niquicot ri ivánima, masque vacami c'o ca'i-oxi' k'ij nic'atzin yixk'ax chupan jalajoj ruvech k'axomal,*Mt. 5:12; Ro. 12:12. 7 richin yixtz'etetaj*Sal. 66:10. si kitzij cukul ic'u'x riq'uin ri Jesucristo. Roma ri cukul ic'u'x riq'uin, más c'o rakale'n que chuvech ri oro ri masque xa richin niq'uis, pero nich'ajch'ojrises pa k'ak'.*Is. 48:10. Y riq'uin chi yixilitaj chi cukul ic'u'x riq'uin, can ta xtinimirises ibi', xtiyo'ox ik'ij, y xtiquicot ri Dios iviq'uin tok ri Jesucristo xtuc'ut chic ri' jun bey chikavech.

8 Rix can nijo' ri Jesucristo masque man jun bey itz'eton*1 Jn. 4:20. ruvech. Iyo'on-apu ivánima riq'uin,*Jn. 20:29; 2 Co. 5:7. y masque man nitz'et ta ruvech vacami, pero can qui' ivánima yixquicot roma xa jun ibanon riq'uin. Hasta man nivil ta achique rubixic ni'en riq'uin ri yixquicot achel yequicot ri ec'o chicaj. 9 Roma riq'uin ri cukul-apu ic'u'x rix riq'uin ri Jesucristo, nicolotaj ri ivánima.

10 Ri ru-profetas ri Dios ri ech'ovinak can pa ruvi' ri favor*Gn. 49:10; Dn. 2:44; Hag. 2:7. ri ic'ulun rix vacami, can xquitij quik'ij richin xcajo' xquetemaj más ruchojmil ri yixcolotaj. 11 Xcajo' xquetemaj (achique, acu'x) ri' y achique tiempo xtibanataj ri ni'ix-pe pa cánima roma ri Espíritu richin ri Jun ri xtutak-pe ri Dios chucolic ri rutinamit, tok xu'ij chique ri achique chi k'axomal xteruk'asaj,*Sal. 22:6; Is. 53:3; Dn. 9:26. y ri jalajoj ruk'ij xtic'uje' tok k'axnak chic chupan ri k'axomal. 12 Pero chique ri profetas xk'alajrises chi man pa qui-tiempo ta*Dn. 12:9; He. 11:39. rije' xtiyo'ox-vi ri favor ri bin chique chi tiquitzijoj, xa chike konojel ri kaniman ri Jesucristo xtiyo'ox-vi ri favor ri ja jun chive rix nitzijos-vi vacami coma ri yetzijon ri utzulaj ch'abel ri nu'ij achique ruchojmil yixcolotaj. Y ri yetzijon richin, yeto'ox roma ri Lok'olaj Espíritu ri takon-pe chicaj. Ja jun ri ángeles nicajo' chi can ta k'alaj-k'alaj chiquivech achique rubanic ri favor ri'.

13 Roma c'a ri', rix quixc'ase' utz-utz pa ruvi' ri achique ninojij, tik'ila-ivi' chuvech ri man utz ta, y riq'uin ronojel ivánima tivoyo'ej-apu ri favor ri xtuya' ri Dios chive chupan ri k'ij tok xtik'alajin chic jun bey ri Jesucristo. 14 Y achel ac'ola' yeniman tzij, man chic quixka pa ruk'a' ri man utz ta*Ef. 4:18; 1 P. 4:2-4. ri xirayij xi'en tok man jun iveteman chirij ri Dios chiri'. 15 Quixoc c'a achel ri xoyon ivichin. Rija' can ch'ajch'oj vi ránima; quiri' mismo rix, ch'ajch'oj*2 Co. 7:1; 1 Ts. 4:7; 2 P. 3:11. tibana' che ronojel ri ni'en pan ic'aslen. 16 Roma ruch'abel ri Dios ri tz'iban can, quire' nu'ij: Ch'ajch'oj tibana' che ri ivánima rix, roma yin can ch'ajch'oj vi ri vánima,*Lv. 11:44. nicha' ri Dios.

17 Y si rix Katata' yixcha' che ri Jun ri chi nimalaj conojel xtunic'oj quic'aslen, y rija' ja ri achel kabanalo'n chikajununal ri rajil-ruq'uexel xtuya' chike,*Mt. 16:27. romari' riq'uin (ximbiri'il, ximbiri'y) tic'uaj-vi ri ic'aslen ri ajani k'ij yixc'uje-e choch'ulef. 18 Tuka chi'ic'u'x chi ja chupan ri itzel c'aslen ri quic'utun can chivech ri ivati't-imama' xixeleses-vi-pe.*Ez. 20:18. Y man xixcol ta pe riq'uin cosas ri xa niq'uis, achel ri oro o ri plata. 19 Rix xixcol-pe*Ap. 5:9. riq'uin ri nimalaj rakale'n ruquiq'uel ri Jesucristo, ri xcamises pa kaq'uexel achel nicamises jun alaj oveja*Jn. 1:29. man jun ruyabil y tz'akat ruk'a-rakan. 20 Roma na'ey chi x-an ri roch'ulef,*2 Ti. 1:9; Tit. 1:2, 3; Ap. 13:8. chojmirisan chic pe chi ri Jesucristo can xturuk'asaj na vi k'axomal. Pero c'a ja chupan ri ruq'uisbel tak tiempo*Gá. 4:4. xk'alajrises richin ito'ic. 21 Y roma rija' tok cukul ic'u'x riq'uin ri Dios, ri xbano che chi xc'astaj-pe chiquicojol ri anima'i' y chi can c'o ruk'ij, richin quiri' mana-ta juc'an cukul-vi ic'u'x, y nis-ta riq'uin chic jun ivoyo'en-vi-apu favor, xa can ta riq'uin ri Dios ivoyo'en-vi.

22 Rix riq'uin ruto'ic ri Lok'olaj Espíritu ich'ajch'ojin ri ic'aslen riq'uin ri iniman ri kitzij,*Hch. 15:9; Stg. 4:8. richin chi man xe ta riq'uin ichi' ni'ij chi nijo-ivi' chivech. Ronojel c'a ivánima tijo-ivi'*He. 13:1; 1 P. 3:8. riq'uin jun ch'ajch'oj ivánima. 23 Roma rix, rix alaxnak chic*Jn. 1:13; 3:3; Stg. 1:18; 1 Jn. 3:9. jun bey chupan jun c'ac'ac' c'aslen ri man niq'uis ta, y man chupan ta jun c'aslen ri xa niq'uis achel ri c'aslen choch'ulef. Ri c'ac'ac' c'aslen ri xic'ul, petenak roma ruch'abel ri Dios, ri ch'abel ri c'o richin jumul. 24 Achel ruch'abel ri Dios ri tz'iban can, ri quire' nu'ij: