Tin e tawar tuaꞌ ubꞌani uwira e jun xeꞌ tzꞌotbꞌir ut
1 Entonces inwira que ayan inteꞌ jun xeꞌ tzꞌotbꞌir tama unojcꞌabꞌ tin e turu tama e turtar. Y e jun era tzꞌijbꞌabꞌir tama inxejr inxejr y cachar siete veces taca siete ut sello tama utiꞌ e jun era tiaꞌ atzꞌojta imbꞌijc imbꞌijc axin. 2 Y nacpat era inwira que ayan inteꞌ ángel xeꞌ meyra ucꞌotorer xeꞌ war aꞌru taca inteꞌ nuxi nuc y che:
—¿Chi tawar tuaꞌ uwechꞌe e jun era y tuaꞌ uwejru uselloir? che e ángel.
3 Pero mamajchi tajwina nien tut e qꞌuin y nien tama or e rum y nien yebꞌar or e rum xeꞌ tawar tuaꞌ uwechꞌe e jun era y nien tuaꞌ uwira ut lo que ayan tamar. 4 Y tamar era nen cay aruen meyra porque mamajchi tajwina xeꞌ tawar tuaꞌ uwechꞌe e jun era y nien tuaꞌ uwira ut. 5 Entonces inteꞌ tujam e veinticuatro nuquir winicobꞌ cay uyaren y che:
—Irix iyaru. Porque ayan inteꞌ xeꞌ tawar tuaꞌ uwechꞌe e jun era y tuaꞌ ulocse e siete sello lo que ayan tamar. Porque jaxir bꞌan cocha inteꞌ león xeꞌ locꞌoy tama uchꞌajnarir e Judá xeꞌ jax inteꞌ utata viejobꞌir tuaꞌ e gente xeꞌ tuobꞌ e Israel, y jaxir jax inteꞌ sitzbꞌir tuaꞌ e rey David xeꞌ turuan tama e onian tiempo, y jaxir ucucruix tunor ucꞌotorer e Satanás. Jaxir tawar tuaꞌ uwechꞌe e jun era y tuaꞌ uwejru uselloir, che e nuquir winic era.
6 Y tamar era inwira ut Niwinquirar xeꞌ bꞌan uwirnar cocha inteꞌ Cordero xeꞌ chequer que chamesna ani. Pues jaxir war awawan tut e turtar xeꞌ turu tuyuxin e cuatro animalobꞌ xeꞌ bꞌixirobꞌ y xeꞌ turu tuyuxin e veinticuatro nuquir winicobꞌ. Y ayan siete ut ucacho tama ujor y ayan siete unacꞌut tamar xeꞌ quetpa bꞌan cocha e siete Nawal xeꞌ erach tuaꞌ e Dios xeꞌ ebꞌetbꞌir ixin tama tunor or e rum. 7 Entonces ixin e Cordero y uchꞌami e jun xeꞌ qꞌuechbꞌir tama unojcꞌabꞌ tin e turu tama e turtar. 8 Y conda uchꞌami e jun e cuatro animalobꞌ xeꞌ bꞌixirobꞌ y e veinticuatro nuquir winicobꞌ pacwanobꞌ tut jaxir. Y inteꞌ intiobꞌ tama e veinticuatruobꞌ era ayan uyinstrumentuobꞌ tuaꞌ alajbꞌobꞌ tamar xeꞌ ucꞌabꞌa arpa, y inteꞌ intiobꞌ ayan inteꞌ inteꞌ uchꞌeuobꞌ xeꞌ chembꞌir taca e oro. Y bꞌutꞌur tunor uchꞌeuobꞌ era taca e ujtzꞌubꞌ xeꞌ war apurutna xeꞌ lar cocha ucꞌatmayajobꞌ tin e tuobꞌ e Dios. 9 Entonces cay ucꞌaywijresobꞌ inteꞌ cꞌay xeꞌ imbꞌutz y che:
Net tawaret tuaꞌ achꞌami e jun era y tuaꞌ awejru uselloir,
porque net chamesnet tuaꞌ acorpeson, y amanion taca achꞌichꞌer tuaꞌ uyubꞌion caquetpa umaxtac e Dios non xeꞌ turon tama tunor or e rum
xeꞌ tarion tama tunor e sian chꞌajnarir, y xeꞌ tarion tama tunor e ojroner lo que ayan tara tor e rum,
y xeꞌ tarion tama tunor e sian chinamobꞌ lo que ayan tara tor e rum ubꞌan.
10 Y net achion caquetpa inteꞌ chinam y achion caquetpa sacerdote tuaꞌ Cadiosir
y net achion cacꞌotori tama tunor or e rum,
che e veinticuatro nuquir winicobꞌ.
11 Y nacpat era inwira meyra sian angelobꞌ y umbꞌi unucobꞌ. Y tin e turu tama e turtar y e cuatro animalobꞌ xeꞌ bꞌixirobꞌ y e nuquir winicobꞌ quetpobꞌ xojybꞌirobꞌ umen e sian angelobꞌ era. Y ayan meyra sian angelobꞌ era este que inwira que ayan millones de millones. 12 Y ojronobꞌ e angelobꞌ era taca inteꞌ nuxi nuc y chenobꞌ:
E Cordero era xeꞌ chamesna
tawar tuaꞌ uchꞌami tunor e cꞌotorer y tunor e riqueza
y tunor e natanyaj y tunor e qꞌuecꞌojsiaj y tunor e honra
y tunor e tawarer y tunor e tattzꞌarsiaj,
che e sian angelobꞌ era.
13 Y umbꞌi ubꞌan unuc tunor lo que chembꞌir umen e Dios. Umbꞌi unuc tunor lo que ayan tut e qꞌuin, y tunor lo que ayan tor e rum, y tunor lo que ayan yebꞌar or e rum, y tunor lo que ayan tama e jaꞌ. Y ojronobꞌ tunor era lo que chembꞌir umen e Dios y chenobꞌ:
Catattzꞌi ucꞌabꞌa Catata Dios xeꞌ turu tama uturtar y Cawinquirar xeꞌ bꞌan cocha inteꞌ Cordero.
Y cawajcꞌox tunor e tattzꞌarsiaj y tunor e honor y tunor e tawarer y tunor e cꞌotorer iraj iraj ejcꞌar ejcꞌar,
che tunor lo que chembꞌir umen e Dios.
14 Y e cuatro animalobꞌ xeꞌ bꞌixirobꞌ chenobꞌ:
—¡Bꞌan ucꞌani yaꞌ! chenobꞌ.
Y e veinticuatro nuquir winicobꞌ pacwanobꞌ tut e turtar y cay uyujtzꞌiobꞌ ut jaxir xeꞌ turu iraj iraj.
<- APOCALIPSIS 4APOCALIPSIS 6 ->
