SAN MATEO 4

Conda e diablo cꞌani ani upijchꞌi e Jesús

Marcos 1:12-13; Lucas 4:1-13

1 Entonces e Jesús qꞌuejcha ixin tama inteꞌ choquem lugar umen Unawalir e Dios tiaꞌ tuaꞌ apijchna ani umen e diablo.

2 Y yajaꞌ quetpa e Jesús cuarenta día y matucꞌa cay ucꞌuxi tama e día y nien tama e acbꞌar, pero conda cꞌapa e cuarenta día era jajpna umen e winar. 3 Y tamar era cꞌotoy e diablo tut e Jesús tuaꞌ upijchꞌi ani y che:

—Jay erachet que net jax Uyunenet e Dios aren e tun era tuaꞌ aquetpa ingojr pan, che e diablo.

4 Pero e Jesús che:

—Chꞌar tzꞌijbꞌabꞌir tama uyojroner e Dios que: “Inteꞌ winic machi tuaꞌ aturuan tamar taca e pan, sino que tamar inteꞌ inteꞌ ojroner lo que alocꞌoy tama uyej e Dios”, che e Jesús.

5 Entonces e Satanás uqꞌueche ixin e Jesús esto tama e chinam Jerusalem y utꞌabꞌse uturbꞌa tujor e templo. 6 Entonces ojron e diablo y che:

—Jay erachet que net jax Uyunenet e Dios, tobꞌen quiqui ta rum porque chꞌar tzꞌijbꞌabꞌir tama uyojroner e Dios que:

E Dios uyebꞌta watar uyangelobꞌ tuaꞌ ucojcuet.

Turobꞌix tuaꞌ uchuquiet taca ucꞌabꞌobꞌ tuaꞌ machi ayobꞌi oꞌc tama ingojr tun. Bꞌan chꞌar tzꞌijbꞌabꞌir tama uyojroner e Dios,

che e diablo.

7 Y e Jesús uyare e diablo y che:

—Machi, porque chꞌar tzꞌijbꞌabꞌir ubꞌan que: “Ira amajres Adiosir tuaꞌ uche e mabꞌambꞌanir”, che e Jesús.

8 Entonces e diablo uqꞌueche ixin e Jesús esto tujor inteꞌ nuxi witzir y cay uwirse wacchetaca tunor e chinamobꞌ lo que ayan tama tunor or e rum taca tunor lo que galan tamar. 9 Y che e diablo:

—Chꞌujcun awira tunor e nuxi lugar era. Pues nen cꞌani inwajqꞌuet tunor era jay net icotuan ojytzꞌi niut, che e diablo.

10 Y che e Jesús:

—Loqꞌuen tara Satanás, porque chꞌar tzꞌijbꞌabꞌir tama uyojroner e Dios que: “Ojytzꞌin ut Awinquirar Dios y chen jax taca lo que ucꞌani jaxir”, che e Jesús.

11 Entonces locꞌoy ajni e diablo tut e Jesús, y wacchetaca tariobꞌ cora angelobꞌ tuaꞌ utacriobꞌ e Jesús.

Ucajyesnibꞌir upatnar e Jesús tama e departamento Galilea

Marcos 1:14-15; Lucas 4:14-15

12 Pues conda e Jesús cꞌotoy unata que osena e Juan tama e cárcel sutpa ixin esto tama e departamento Galilea otronyajr. 13 Pero machi quetpa tama e chinam Nazaret sino que ixin tuaꞌ aturuan tama e chinam Capernaum xeꞌ turu tutiꞌ inteꞌ nuxi jaꞌ. Y jax e lugar era tiaꞌ turuanobꞌ e Zabulón y e Neftalí tama e onian tiempo. 14 Bꞌan numuy tuaꞌ acꞌapa achempa lo que chꞌar tzꞌijbꞌabꞌir tama uyojroner e Dios umen e profeta Isaías:

15 Ayan meyra gente xeꞌ aturuanobꞌ tama e lugar xeꞌ tuaꞌ ani e Zabulón y xeꞌ aturuanobꞌ tama e lugar xeꞌ tuaꞌ ani e Neftalí,

y ayan tin e aturuanobꞌ tutiꞌ e nuxi jaꞌ y tin e aturuanobꞌ teinxejr e xucur Jordán,

y tin e aturuanobꞌ tama e departamento Galilea xeꞌ majax tuobꞌ e Israel.

16 Pues e gente era quetpobꞌ tamar lo que lar tacar inteꞌ incsibꞌaner xeꞌ war che que ma chequer tutobꞌ lo que erach, pero era cay uwirobꞌ e janchꞌaquenar xeꞌ ejpray meyra.

Y tin e aturuanobꞌ tama e choquem lugar xeꞌ intaca war ucojcobꞌ uchamer, cꞌotoy cuxpobꞌ otronyajr conda uwirobꞌ e janchꞌaquenar era xeꞌ jax lo que erach.

Bꞌan chꞌar tzꞌijbꞌabꞌir tama uyojroner e Dios.

17 Pues tama e tiempo era e Jesús cay uchecsu uyojroner e Dios y che:

—Ustesic ibꞌa tut e Dios porque watarix e día conda Cadiosir tuaꞌ acꞌotori tara tor e rum, che e Jesús.

Conda e Jesús upejca cuatro ajchucchayobꞌ

Marcos 1:16-20; Lucas 5:1-11

18 Pues tama inyajr conda e Jesús war axana tutiꞌ e nuxi jaꞌ xeꞌ ucꞌabꞌa Galilea uwira chateꞌ ijtzꞌimbꞌirobꞌ. Inteꞌ ucꞌabꞌa Simón xeꞌ ucꞌabꞌa Pedro ubꞌan, y inteꞌ ucꞌabꞌa Andrés. Jaxirobꞌ ajcoromobꞌ xeꞌ war upojchiobꞌ uchijrobꞌ tama e jaꞌ. 19 Entonces ojron e Jesús y che:

—Laric tanipat y nen tuaꞌ inwajcꞌox e cꞌotorer tuaꞌ uyubꞌiox ixcorma tamar, pero mixto jax chay tuaꞌ ichuqui, sino que winicobꞌ tuaꞌ ipejca tamar uyojroner e Dios, che e Jesús.

20 Y wacchetaca uyactobꞌ uchijrobꞌ y ixiobꞌ taca e Jesús.

21 Y nacpat era conda e Jesús warto axana tutiꞌ e nuxi jaꞌ era uwira otro chateꞌ ijtzꞌimbꞌirobꞌ. E sacumbꞌir ucꞌabꞌa Santiago y e ijtzꞌimbꞌir ucꞌabꞌa Juan. Y utatobꞌ ucꞌabꞌa Zebedeo. Y turobꞌ tama ubarcuobꞌ taca utatobꞌ, war uyustesobꞌ uchijrobꞌ conda checta tari e Jesús tutiꞌ e jaꞌ. Y tamar era e Jesús upejcobꞌ tuaꞌ axiobꞌ tupat jaxir. 22 Y wacchetaca uyactobꞌ ubarcuobꞌ y utatobꞌ tuaꞌ axiobꞌ tupat e Jesús.

Conda e Jesús ucanse meyra gente

Lucas 6:17-19

23 Entonces ixin e Jesús tama tunor or e lugar tama e departamento Galilea, war acanseyan tama tunor e sian sinagoga. Y war ucansiobꞌ que watarix e día conda Cadiosir tuaꞌ watar tuaꞌ acꞌotori tara tor e rum, y war utzꞌacpes tunor tin e war ucojco inteꞌ inteꞌ muaquir. 24 Y cay unatobꞌ tunor e gente tama e departamento Siria que e Jesús ayan ucꞌotorer. Entonces cay qꞌuejcha cꞌotoyobꞌ tunor tin e ajmuacobꞌ. Y ayan tin e chucur umen inteꞌ mabꞌambꞌan mein, y ayan tin e intaca achamay achꞌan, y ayan tin e chamen ucuerpo. Pero e Jesús utzꞌacpes tunorobꞌ.

25 Y meyra gente cay xanobꞌ tupat e Jesús. Y tujam tunor e gente era ayan tin e tariobꞌ tama e departamento Galilea, y ayan tin e tariobꞌ tama e departamento Decápolis, y ayan tin e tariobꞌ tama e chinam Jerusalem, y ayan tin e tariobꞌ tama tunor or e departamento Judea, y ayan tin e tariobꞌ teinxejr e xucur Jordán.

<- SAN MATEO 3 SAN MATEO 5 ->