Lau Kapole Diuda, Guyau sa Lau Kapoleꞌen Buka ite Isalaela edi nuwa heyaya laꞌilaꞌi Yelusalem lisina yai, dedena. Boliman 586 B.C. yai (B.C. aniyona mate Boliman fisa hola Yesu hige i tubu) mate adi waiyunu sa lau be edi taon laꞌilaꞌi Yelusalem sa anfaheyayai be Isalaela dodogadi sa lawedi ganamuli nuꞌudi yai. Edi ginauli loholohodi hinaga sa abidi. Bukana tau ulina hige ti sibai in moho dodoga haisa edi nuwatuhu mate Delamaiya ya uli.
1
Yelusalem edi Nuwa Heyaya
Lau Kapole 1:1-7
1 Beyabeyana Yelusalem yai, doga ya ouli wananaha,
na aho ite, afaꞌafana!
Hesana beyabeyana ya laꞌi nuꞌu hahaisa ganahewadi yai,
na aho ite doha hwabuhwabu.
Beyabeyana in doha hatafele,
na aho ite ya famala tau lau fayofayo.
2 Diuda dodogadi maihonadi sa tan eloꞌelolosi.
Tau gadogadosisiyedi mahudoꞌidi sa lau afuledi,
hige tau abi famatanodi.
Afa haidadi mahudoꞌidi sa sana mulimuliyedi,
sa famala adi waiyunu.
3 Be sa lawedi sa famala edi tau lau fayofayo
yo mwahu sa fabaheidi.
Mulimuli dodogadi ganahewadi yai sa miya
na hige aba anyawasi loholohona ti lobahi.
Waiyunu mate, Diuda dodogadi sa weꞌa dudu lidi bee–,
sa fasai bulubuluhidi.
Hige edi aba gela hesa.
4 Iti kapole–, Saiyon edaꞌedadi mate afaꞌafadi.
Itaꞌitadi doha ti tantan,
paꞌana hige sai laꞌi i lau watanidi
i lau be Yaubada i fadebasae.
Yelusalem Taonna aba luhuluhu launa afaꞌafana.
Tau antalasam sa tan nuwa heyaya,
yo wawahin hasahasaladi sa tan eloꞌelolosi.
5 Ana waiyunu sa famala ena baꞌisa,
habahim sa miya gwaugwau.
Ena heyaya debadi yai, Guyau ya fakamkamna
na nanatuna sa tohaidi be sa lawedi nuꞌu eda lofalofa.
6 Beyabeyana Yelusalem itaꞌitana olina,
na aho ite higeꞌe.
Ena babaꞌisa doha suisui guliguliyamna,
tauna sa belubelu paꞌana hige kalahe,
ma belubeluna ya gela tau faꞌoyowa matadi yai.
7 Edi kamkamna lahaidi yai,
yo fuyana sa leuleu yo sa saisai mate,
ginauli loholohodi mahudoꞌidi beyabeyana
iti enehedi sa nuwatuhuidi.
Isalaela dodogadi hige tau saguhidi
fuyanna waiyunu sa fasai bulubuluhidi.
Yelusalem ena heyaheyaya yai