55
Tau Gadomagu adi Yoga
Isaiya 55:1-5
1 Safaluma gadomiu sa magu, mahudoꞌimiu au laoma,
au laoma hoꞌowa ami au nom;
yo hige emi moni, au laoma,
au uneꞌune be au kalahe!
Au laoma be wain yo miluki fafamaisa gesana yo hige uneꞌune au une.
2 Anꞌan heyaheyayadi tabu emi moni ainiya au pei gaibuidi,
yo somo hige boga yahayaha, tabu ainiya emi maliyaho au pei gaibuidi.
Hola au ataꞌatahi,
be kalahe loholohona ami au an,
haba kalahe loholohona yai emi amna loholoho ami abi.
3 Egu liba au atahi na au laoma lisigu,
haba ami mwahuli.
Haba yali otaꞌota fahina E ginauli ai lebemiu,
yo Deiwidi lisina yai egu gadosisi otaꞌota fahina haba E felemiu.
4 Au ita! E faꞌobiyo be nuꞌu ouꞌouli edi baꞌisa yo tau fafadudulai.
In egu wikinisi dodoga lisidi yai.
5 Umi haba ami yogalau nuꞌu hahaisa lebedi,
nuꞌudi mate hige au sibaidi.
Yo umi hige au sibaidi, in moho haba sa laoma,
paꞌana yau Guyau Isalaela edi Yaubada Tabuna,
yo yau E ita faloholohomiu.
Yaubada Ena Liba Mate Sa Gigibwali
Isaiya 55:6-11
6 Yaubada ena peloweta iyebom “Guyau hola au yoꞌoi.
Au yoga lau lisina, hola sadaimiu yai.*Delamaiya 29:13 Yena ma nuwa ofifahimiu ami yoꞌoigu, haba ami lobahigu.
7 Emi laulau yo nuwatuhu heyaheyayadi ti otawa.
Au timuli bui Guyau eda Yaubada lisina.
Haba ya nuwatohatohaemiu
be emi heyaheyaya ya nuwa afuledi.”
8 Guyau iyebom:
“Egu nuwatuhu yo egu laulau mate hige doha enehemiu.
9 Gonogonowana doha galewa ya hasai wananaha habahim tanoꞌubu,
be egu nuwatuhu yo egu laulau mate sa hasai wananaha habahim enehemiu.
10 Usa yo sinou galewa yai sa beꞌuma.
Be hige ti fuyo hasa,
na hola tanoꞌubu sa fahoꞌowa.
Be umaꞌuma haba sa anꞌan yo sa lau liꞌe,
tau umaꞌuma enehena.†Suau Wana hesana “Ena Ainauya” ami ita.
11 Egu liba mate doha. Hige ya liba gaibu.
Be somo E fatamali, mate ma aniyodi.
Somo E libaen haba sa ginauli watanidi.