2
Kwade Gaibu Hige Aniyona
Tau Guguya 2:1-11
1 Nuwagu yai yawa, “Haga nuwagu ya lau watan,
ya lau ya kwadekwade gaibu
be loholoho sidohana haba E lobahi.”
In moho laulau te, hige aniyona.
2 E ita lobahi mate, liuliuhwa gaibu, laulau yauyaulena.
Na kwade gaibu lisina yai, ibege loholoho ya lobahi.
3 Hola loholoho aniyona E yoꞌoi.
Logena be nomnom yauyaule yo kwade hesa - hesa E anpateidi.
E gado bena E siba somo ya loholoho dodoga lisidi yai,
ai maihala tupotupona tanoꞌubu yai te.
4 Ginauli mahudoꞌina E ginauli.
Egu luma E ginaulidi
yo wain E umahidi gabudi yai.
5 Gabu E lau ginauli be ganahewadi yai
fuwafuwa nene hesa - hesa E umahidi.
6 Hoꞌowa ipuna E ginauli,
ainiya haba hoꞌowa E yahi
be umaꞌuma laulau idahedi E fanom hoꞌowadi.
7 Egu tau lau fayofayo tatau yo wawahin E unedi,
yo egu tau lau fayofayo haisa mate egu luma yai sa tubu.
Egu bulumakau yo sipi baiwadi sa ouli,
habahim dodoga haisa Yelusalem yai.
8 Siluba yo gole aiʼegu E abidi. Babaꞌisa yo nuʼu boludi edi gogo loholohodi hinaga E abidi. Tau wana tatau yo wawahin E fasinabodi hinaga. Tau lau fayofayo wawahin boludi E faidi sa famala doha lalahugu.
9 Yau E hasai wananaha habahim dodoga haisa Yelusalem yai.
10 Matagu yai somo E ita mate E fanuha bena E abi,
yo nuwagu moho tanoꞌubu kwadena.
In moho nuwagu ya loholoho egu paisowa lisina yai
paꞌana egu abi peꞌipeꞌi logena maisagu.
11 Fuyanna ginauli mahudoꞌina nimagu yai E ginauli yo somo E ankamkamnaꞌen be loholoho E abi, E mainene sipoi be E lobahi mate ginauli mahudoꞌina te, hige aniyodi. Doha hwayau E tafotafo watan, hige agu loge. Maihala yai hige somo laꞌi ya abi. Ginauli mahudoꞌina ganahewana yai te mate E sibasiba wananaha.
Sibasiba yo Yauyaule Hige Aniyodi
Tau Guguya 2:12-16
12 Habahim egu nuwanuwatuhu E bui be sibasiba E ita sipoi.
Kabakabaleya yo gelogeloma hinaga E nuwatuhu fadosidi.
Kin, somo haꞌa ya ginauli mate,
tau lau fadamahina haba somo hesa ya ginauli?
13 E nuwatuhu lobahi mate sibasiba ya loholoho wananaha,
habahim yauyaule,
doha mala ya loholoho wananaha,
habahim kamumu.
14 Tau sibasiba ena aba lau ya sibai
na yauyaulena higeꞌe.
In moho E nuwatuhu lobahi mate,
luwaluwagadi edi fuya ofi nenena esega.
15 Habahim nuwagu yai yawa,
“Yau haba E peꞌi doha
doga yauyaulena.”
Be sibasiba lebena yai somo haba E abi?
Ite hinaga hige aniyona.
16 Logena doga sibasibana haba doha yauyaulena,
sa nuwa fuiyen maꞌamaꞌaen.
Lahaidi sa laolaoma ibege ti nuwatuhuidi.
Doga sibasibana hinaga bena ya peꞌi,
doha doga yauyaulena!
Paisowa Hige Aniyona
Tau Guguya 2:17-26
17 Logena mwahuli te, E ꞌwaiyoꞌoꞌen,
paꞌana paisowa maihala yai ya faꞌankamkamnagu.
Mahudoꞌina hige aniyona doha hwayau E tafotafo watan,
na hige agu loge.
18 Ginauli mahudoꞌidi E ginaulidi maihala yai mate,
E waiyoꞌoꞌedi wananahaidi,
paꞌana ibe E lau afuledi,
mate doga hesa muligu yai haba aiꞌena.
19 Doga sibasibana e yauyaulena, sai ya sibai?
Ma adidiligu yai, egu sibasiba yo adidili yai,
paisowa mahudoꞌidi E ginaulidi maihala yai.
In moho haba ya tanuwagaidi.
Ite hinaga hige aniyona.
20 Paisowa yai E abi peꞌipeꞌi,
E nuwatuhui be nuwagu ya kuꞌu.
21 Doga gonowana ena sibasiba yai ena paisowa ya ginauli,
na habahim ya lau afulen, be sai hige i kamna heyayaꞌen, aiꞌena.
Ite ya heyaya wananaha yo hinaga hige aniyona.
22 Maihala yai taumoho ya paisowa peꞌipeꞌi,
na lisina yai somo ya lobahi?
23 Ena mwahuli fuyadi yai mate ena paisowa ya fakamna heyaya.
Ai iꞌipadi ya nuwanuwatuhu hinaga hige i anyawasi.
Ite hinaga hige aniyona.
24 Doga hige gonowana somo loholohona i ginauli,
na bena moho ya nom yo ya an,
yo hinaga bena nuwana ya loholoho ena paisowa lisidi yai.
Ite hinaga E ita mate, Yaubada ena gigibwali yai ya ginaulidi.
25 Paꞌana ibe in higeꞌe, haba somo ya an?
E haba sidohana nuwana ya loholoho?
26 Sai Yaubada nuwana ya fafaloholoho,
mate sibasiba, sonoga yo kwade ya felen,
in moho, tau heyaya mate Yaubada gogo loholohodi,
fafatabudi paisowadi lisidi yai ya fakamna heyayadi,
na ai mulina haba sa fele lawen Yaubada nuwana tau faloholohona lisidi.
Ite hinaga hige aniyona,
doha hwayahwayau ya tafotafo watan,