1 Fuyanna Pentekosi lahaina yai Tau kawawananaha mahudoꞌidi sa faꞌoigogo tefa esega yai. *X-ref to table of Jewish Feasts.2 Maꞌesega na dagugu laꞌilaꞌi doha hwayahwayau galewa yai ya lidima be aba taꞌataꞌai lumana ya tafo nuhuli. 3 Habahim somo doha oyagi balebalelemna ya faidabadabalalai be doga esega - esega ya talu hewana yai. 4 Yaubada, Yaluwana Tabuna mahudoꞌidi ya famohafudi be gigibwalina yai sa fatubu alina hudoꞌi - hudoꞌi yai sa libaliba.
Pita Ena Wasa
Paisowa 2:5-21
5 Fuyana yai Diusi iti Yaubada tau ꞌwasabuwenna nuꞌu mahudoꞌina yai sa faꞌoigogo esegahidi Yelusalem yai.†Safaluma Yaubada sa fadebasae, na Buka haisa tiyen, Yaubada tau ꞌwasabuwenna.6 Dagugu sa atahiyen be baiwa laꞌilaꞌi ya faꞌoigogoma be somo - somo sa libalibaen mate, esega - esega alina yai ya atahi lobahi. 7 Sa tauhiti ma lau noꞌodi tiyen,
Hola au atahi. Dodoga mahudoꞌidi sa libaliba te mate Galili dodogadi. 8 Sidohana be esega - esega te atahi alinada yai sa libaliba? 9 Ita eda aba laoma mate: Patiya yai, Mediya yai, na haisa Elam yai. Ita hahaisa mate Mesopotamia yai, Diudeya, Kapadosiya, Pontusi yo Eisiya yai, 10 yo Figiya, Pamfiliya, Idipi yo Libiya tefadi yai, Sailin nuꞌuna sadasadaina yai te laoma. Na hahaisa mate tau antaumana Loma yai sa laoma Yelusalem. 11 Diusi yo taꞌowawa safaluma Diusi edi laulauꞌuꞌula sa laulau watan, yo Keliti yo Alabiya, mahudoꞌida te atahi mate Yaubada laulau gigigibwalidi yo noꞌo ginaulidi, te atahiyedi alinada yai!
12 Sa noꞌo yo sa nuwa ponopono be sa fafatiꞌo fuyoꞌidi tiyen,
Ite aniyona somo?
13 Na hahaisa sa lau faliuhwaꞌedi tiyen,
Sa nom yauyaule?
14 Habahim Pita yo tau faꞌona wasawasa safuhudohudoꞌi esega sa obiyo fahi na ya liba laꞌilaꞌi baiwa lisidi iyen,
Falegu Diusi yo salumadi mahudoꞌimiu Yelusalem yai ami miyamiya, au ataꞌatahi laoma lisigu na aniyona somo haba emi E liba. 15 Emi nuwatuhu bena tatau te sa nom yauyaule. Higeꞌe! Itete hola 9 koloki ma hwalahwalalana. 16 Itete fuya bwaꞌibwaꞌina yai Peloweta Diyoweli haꞌa ya libaen:
ꞌwasina yo oyagi balebalelemdi yo madagafu E fataumahatadi.
20 Maihala haba ya kamukamumu,
na Guyau ena fuyoma lahaina haꞌa ya sigisigima.
21 Yena sai Guyau hesana ya ataꞌatahi
haba ya mwahuli.” (Diyoweli 2:28-32)
Pita Baiwa Laꞌilaꞌi ya Guguyaidi
Paisowa 2:22-41
22 Pita iyen,
Isalaela dodogadi, au ataꞌatahi! Ganahewamiu yai Yesu Nasaleta ena dudulai Yaubada ya fawananaha, logena lisina yai noꞌo yo fafaꞌilala ya ginaulidi mate umi ami sibaidi. 23 Yaubada ena nuwatuhu yai Yesu ya fasinabo nonohai be sa tole afulen nimamiu yai, na dodoga heyaheyayadi sa saguhimiu be ami tutu fapatu kolosi yai. 24 In moho Yaubada ya famwahuli fuyoi peꞌi kamkamnana yai paꞌana peꞌi hige gonowana i abi didini. 25 Kin Deiwidi haꞌa ya libaen iyen,
“Fuya ouꞌouli Yaubada sadaigu yai E itaꞌitai.
Paꞌana In maꞌegu,
be ibege agu waiyunu ya ꞌwasabuwedi.” (Samsi 16:8)
26 Lisina yai nuwagu ya amna be E kwade
yo E fadebasae.
Yo E gogo susunuma mate taugu haba ya anyawasi,
27 paꞌana ibege tau peꞌipeꞌi edi nuꞌu yai u lau afulegu,
yo ibege em Fatabu Dogana u ita afulen,
be tauna i molu ai boꞌusa.
28 Mwahuli edaꞌedana haꞌa wa faꞌitagu;
Yo Um ai matam haba E kwade wananaha. (Samsi 16:8-11)
29 Afa haidagu, E faliba komakomaꞌinimiu mate ada ulu tubu Deiwidi haꞌa ya peꞌi be sa boꞌusai na boꞌusana mate hola otana amaiteꞌi. 30 In mate peloweta na ya sibai mate Yaubada haꞌa ya angwala lisina yai haba Deiwidi laulauwewena hesa ya famala Baꞌisa gonogonowana doha in Deiwidi. (2 Samuwela 7:12-17 yo Samsi 132:11)31 Fuya matada yai somo haba ya tubu, mate Deiwidi haꞌa ya sibai, be ya liba iyen,
“Keliso haba ya mwahuli fuyo,
yo ibege ai boꞌusa i ita afulen
be silanna i molu.” (Samsi 16:10)
32 Boꞌusa yai Yaubada, Yesu te ya famwahuli fuyoi, be matamai yai haꞌa ꞌe ita. 33 Tamana Yaubada ya tole hitiꞌi be sibana yai aba fafaꞌatiti yai ya taꞌai. Ena liba fasunuma mate Yaluwa Tabuna ya felen, Yesu. Logena ya fagoi lidiyen hewada yai mate, haꞌa ami ita yo ami atahiyen.*Yena sibana yai ya taꞌai, aniyona mate ena dudulai haba ya felen. Au itaꞌita lau Maleko 10:37 yo Paisowa 7:55 hinaga.34 Deiwidi hige i hasai galewa. In moho ya liba iyen, “Guyau Yaubada ya libalau egu Guyau lisina iyen, ‘Ai sibagu u taꞌai, 35 ya lau ee–, am waiyunu E toledi ai ahem ubudi doha ahem aba tolena.” (Samsi 110:1 yo Maleko 12:36)
36 Lisina yai Isalaela mahudoꞌidi bena sa siba komakomaꞌi mate Yesu te, In ami tutu fapatu, logena Yaubada ya tole Guyau yo Keliso.
37 Dodoga liba te sa atahiyen. Yo fede aluwadi sa potifahi be Pita yo tau faꞌona wasawasa hahaisa sa falibadi tiyen,
Afa haidamai somo haba te ginauli?
38 Pita alinadi ya bui iyen,
Esega - esega u nuwabui be u babasito Yesu Keliso hesana yai haba em heyaheyaya ya nuwa afulen na Yaubada ena ainauya, Yaluwa Tabuna wa abi. 39 Liba fasunuma te ya laowa umi, nanatumiu yo safalumadi iti eda lofalofa yai tau miya enehemiu yo safalumadi Guyau eda Yaubada ya yogaimiu, enehemiu.
40 Habahim, Pita ya lauguguya lofalofa na ya liba adidili lau tau ataꞌatahi lisidi yai iyen,
Yaubada au anꞌetai be hiti heyayana ganahewadi yai te, haba ya saguhimiu be ami anfaleꞌedi.
41 Safalumadi ena liba sa lau watan mate sa fababatisodi na lahaina yai dodoga laꞌina tausan faihona sa lobahi be sa falau esegahi tau faꞌona wasawasa edi pei yai be edi pei ya laꞌi.
Tau Kawawananaha sa Oiꞌoigogo Esega
Paisowa 2:42-47
42 Edi fuya sa peidi tau faꞌona wasawasa edi lau faꞌata yai yo edi faꞌoigogo yai sa anꞌangogo yo sa laulauꞌuꞌula gogo. 43 Noꞌo ginaulidi boludi yo fafaꞌilala hudoꞌi - hudoꞌi tau faꞌona wasawasa sa laulau ginauli be dodoga sa ꞌwasabu. 44 Tau kawawananaha mahudoꞌidi sa fafaꞌoigogo fuya ouꞌouli yo ginauli mahudoꞌina lebedi yai sa faifaisagusagu fuyoꞌidi. 45 Edi tanohi yo edi ginauli sa uneꞌune afuledi na monidi sa abidi be faledi tau kawawananaha salumadi ginauli hahaisa lebedi yai, higeꞌe mate edi sa soi. 46 Lahai esega - esega sa faꞌoigogo ai Dubu Tabuna dobidobina yo edi ai luma sa kalahe gogo ma nuwa taludi yo ma kwadedi, 47 lahai esega - esega salumadi sa anꞌeta be Yaubada ya famwahulidi mate sa falau esegahidi, be tau kawawananaha edi pei ya laꞌi. Yaubada sa fadebasae, yo dodoga edi abi loholoho sa kwadedi.
