Paulo ena Lauwasi Fafaluwagana
15
Paisowa 15:1 - 18:22
Oigogo Yelusalem yai
Paisowa 15:1-21
1 Tatau haisa Diudeya yai sa laoma Antiyoka, be tau kawawananaha sa faꞌatadi. Mose ena laugagayo yai sa uli, tiyen,
Yena mwagisamiu dududi ꞌwapidi hige tomotomodi, Yaubada hige gonowana i fofofahimiu.
2 Tatau ni, maꞌedi Paulo yo Banabasi lau faꞌata te sa faibayahoꞌen, yo fede, Paulo, Banabasi yo tau kawawananaha haisa sa fasinabodi, be sa hasai Yelusalem be tau faꞌona wasawasa, yo babada haisa amainiya lebedi yai, lau faꞌatana te sa fatiꞌoidi.
3 Tau kawawananaha sa duidi sa lau, be Fonisiya yo Samaliya Nuꞌudi sa bayawaidi, na sidohana taꞌowawa edi nuwanuwa bui, enehedi sa liba. Wasa te, kwade laꞌilaꞌi ya leyama tau kawawananaha lisidi. 4 Sa mahano Yelusalem yai, tau kawawananaha, tau faꞌona wasawasa, yo babada sa lautoꞌiyedi, be ginauli mahudoꞌina Yaubada lisidi yai ya ginauli, edi sa liba.
5 Na tau kawawananaha haisa, iti Falesiya dodogadi edi pele yai, sa mwaito be tiyen,
Taꞌowawa bena mwagisadi dududi ꞌwapidi tomodi yo bena Mose ena laugagayo sa lau watan.
6 Tau faꞌona wasawasa yo babada sa oigogo be fatiꞌo te sa fadosidi. 7 Sa fadosi fuya lofalofa, habahim, Pita ya mwaito, be ya dede, iyen,
Afa haidagu, ami sibai mate Yaubada, beyabeyana haꞌa umi ganahewamiu yai yau ya fasinabogu, bena wasa loholohona te taꞌowawa ai moꞌagu sa atahiyen, be haba sa kawawananahaꞌen.*Bolima 10 haꞌa sa ofi, na laulau te ya tubu Pita lisina yai (Paisowa peina 10) 8 Yaubada doga mahudoꞌina ena nuwatuhu ya sibai, be fuyanna Yaluwa Tabuna ya feledi mate ya faꞌita lobahidi, iti in enehena, doha ita. 9 Iti yo ita gonogonowada. Edi kawawananaha yai, nuwadi ya faꞌaꞌadi. (Paisowa 10:34; 1 Pita 1:22-23)
10 Aho te sidohana be Yaubada ami anpate waloloi? Manana ami fafabala. Mwahu, tau kawawananaha ami feledi te, hige gonowana afa wahada yo ita haba ta bahei! (Paisowa 15:5; Matiu 11:29; 23:4)
11 Higeꞌe! Guyau Yesu ena anꞌansoi lisina yai te kawawananaha be ya fofofahida gonogonowana doha iti. (Loma 3:23-24)
12 Mahudoꞌidi sa famakano, be sa ataꞌatahi. Na Banabasi yo Paulo sidohana Yaubada ya fapaisowadi, be fafaꞌilala yo noꞌo sa lau ginauli taꞌowawa lisidi yai, wasana edi sa liba.
13 Sa libaliba ofi mulina yai, Diyemsi iyen, (Maleko 6:3)†Diyemsi itete mate Yesu tasina.
Haidagu, au ataꞌatahima! 14 Sidohana, Yaubada taꞌowawa ya modeꞌedi, be haisa ya abidi, enehena mate, Saimon haꞌa ya falibada, 15 Peloweta edi liba ya fawananaha, doha Buka Tabuna yai sa uli, tiyen,
16 “Ite ai mulina haba E fuyoma,
be Deiwidi ena Palai Tabuna E faꞌobiyo fuyoi.
Ena heyaheyaya haba E fadudulaidi,
na haba E faꞌadidili fuyoi.
17 Be haba dodoga haisa, Guyau sa yoꞌoi,
Logedidi, taꞌowawa, safalumadi E yogaidi be iti, enehegu, (Eimosi 9:11-12)
18 Doha haꞌa beyabeyana, Guyau ya libaen.”
19 Diyemsi hinaga iyen,
Logena, nuwagu yai E fadosi mate, taꞌowawa salumadi sa nuwabui, tabu ta famwahudi.
20 In moho, bena te uliꞌuli lau lebedi, be te falibadi mate,
somo oitau lebedi yai sa antalasamedi, tabu ti anidi.
Tabu ꞌwasiꞌwasina ti anidi,
yo suisui gadodi filifilisidi hinaga tabu ti anidi. (Aba Fatubu 9:4-6)
Yo luma gwaꞌu hudoꞌi - hudoꞌi hige Yaubada ena laugagayo yai, tabu ti ginaulidi. (Auꞌaulaha 20:14; Lewitikusi 18:6-20; Lewitikusi 20:10-21; Loma 1:24-27; I Tesaloniya 4:3; Paisowa 15:20 yo 29)
21 Paꞌana, beyabeyana ya laoma ee–, aho ite, mate Mose ena laugagayo sa fatifatili Sabati ouꞌouli aba oiꞌoigogo lumadi yai yo taon hesa - hesa yai sa laulauguguyaꞌen.
Taꞌowawa Dodogadi edi Wasa sa Uli, be sa Fatamali
Paisowa 15:22-35
22 Habahim tau faꞌona wasawasa yo babada, maꞌedi tau kawawananaha mahudoꞌidi, sa lau fadosi be dodoga ganahewadi yai sa fasinabodi, na sa fatamalidi sa lau Antiyoka maꞌedi Paulo yo Banabasi. Yo fede, babada luwaga, Diudasi (hesana hesa mate Basaba) yo Sailasi sa faꞌobiyodi, babada, 23 be lisidi yai uliꞌuli sa fatamali:
Ai afa haidamiu,
Tau faꞌona wasawasa yo babada, ema lautoꞌi ꞌe fatamaliyawa,
umi taꞌowawa lisimiu yai, salumadi Antiyoka, Siliya Nuꞌuna yai yo Silisiya yai tau miya.
24 ꞌE atahiyen mate ganahewamiu yai dodoga haisa sa laowa, sa anꞌeli dogodogoꞌemiu, be nuwamiu sa famodedi. In moho, ai hige ai eheꞌedi. (Taitusi 1:10-11)‡Buka hahaisa yai mate, lausoisoi tefana te hige ti uli: “Umi bena mwagisamiu dududi ꞌwapidi tomotomodi yo laugagayo bena ami lawelawen.”
25 Mahudoꞌimai nuwamai esega, be dodoga haisa ꞌe fasinabodi. Afa haidamai loholohodi, Banabasi yo Paulo, maꞌedi ꞌe fatamalidi sa laowa lebemiu. 26 Guyau Yesu Keliso debana yai, sa nuwa afuledi, heyaheyaya yai. (Paisowa 13:50)
27 Logena, somo ꞌe uliꞌuliꞌi te, Diudasi yo Sailasi, moꞌadi yai haba sa fawananaha ai lisimiu. 28 Yaluwa Tabuna lisina yai ꞌe nuwatuhu fadosi mate ya loholoho, yo ai hinaga, tabu bena laugagayo haisa ti famwahumiu. Ginaulidi moho te, ibodi, au lau watanidi:
29 Somo, oitau lebedi yai sa antalasamedi, tabu au anidi;
Tabu ꞌwasiꞌwasina au anidi
yo suisui gadodi filifilisidi, hinaga tabu au anidi.
Yo luma gwaꞌu hudohudoꞌi hige Yaubada ena laugagayo yai, tabu au ginauli.§Taumoho yo waihin sa nahi, na yena sa eno bili mate, Yaubada ya kawaloholohoꞌedi. Aba Fatubu yai sa uli: “Logena, taumoho tamana yo tinana ya lau afuledi, ma lahuna sa miya, be sa famala esega.” (Aba Fatubu 2:24)
Yena ami lau watanidi, ibege heyaya au fahoina.
Aiyon.
30 Wasa tau lawenina sa duidi be sa lidi Antiyoka. Amainiya tau kawawananaha boludi sa faꞌoigogodi, be uliꞌuli wa sa feledi. 31 Fuyanna edi liba faꞌadidili, wasana sa fatili, nuwadi sa amna! 32 Diudasi yo Sailasi mate iti peloweta hinaga, be edi liba mahudoꞌina yai dodoga sa liba faꞌadidilidi. 33 Amainiya sa miya ee–, habahim, haidadi sa fatamali fafuyodi ma nuwa loholohodi sa fuyo, safalumadi sa fatamalidi, lebedi. 34 Na Sailasi nuwatuhu ya abi, be ya miya.*Uliꞌuli haisa yai mate, lausoisoi te hige ti uli.
35 Paulo yo Banabasi sa miyamiya Antiyoka yai, be dodoga haisa maꞌedi, Guyau libana te sa lau faꞌataen yo sa lauguguyaꞌen.
Lauwasi Fafaluwagana 15:36 - 18:22
Paulo yo Banabasi sa Faibaiyaho.
Paisowa 15:36-41
36 Lahai fisa mulidi yai, Paulo ya libalau Banabasi lisina, iyen,
Ta fuyo, taon hahaisa yai haidada ta kepaidi, be somo yai Guyau libana eda aba lauguguyaꞌenna, sidohana edi paipaisowa haga ta itadi.
37 Banabasi ya fanuha bena Diyon Maleko maꞌedi sa lau.†Maleko mate Banabasi nubaina. Au italau, Kolosi 4:10 yo Paisowa 12:12 hinaga. 38 In moho, Paulo ya dudu wananaha be Diyon Maleko hige maꞌedi ti lau, paꞌana Pamfiliya yai ya lau afuledi, be adi paisowa wa hige maꞌedi ti lawen, be ti faꞌofi. 39 Sa faibayaho wananaha, yo fede, sa faitamo dailidi. Banabasi, Maleko ya foyahi, be waga yai sa lau Saipelesi Bonabonaluwana. 40 Paulo, Sailasi ya fasinabo, mulina yai tau kawawananaha sa fele afuledi Guyau ena itaꞌita wata yai, habahim, sa lau. 41 Edi lau yai Siliya yo Silisiya Nuꞌudi sa antaumanaidi, be tau kawawananaha amainiya nuwadi sa liba faꞌadidilidi.
<- Paisowa 14Paisowa 16 ->
- a Bolima 10 haꞌa sa ofi, na laulau te ya tubu Pita lisina yai (Paisowa peina 10)
- b Diyemsi itete mate Yesu tasina.
- c Buka hahaisa yai mate, lausoisoi tefana te hige ti uli: “Umi bena mwagisamiu dududi ꞌwapidi tomotomodi yo laugagayo bena ami lawelawen.”
- d Taumoho yo waihin sa nahi, na yena sa eno bili mate, Yaubada ya kawaloholohoꞌedi. Aba Fatubu yai sa uli: “Logena, taumoho tamana yo tinana ya lau afuledi, ma lahuna sa miya, be sa famala esega.”
- e Uliꞌuli haisa yai mate, lausoisoi te hige ti uli.
- f Maleko mate Banabasi nubaina. Au italau, Kolosi 4:10 yo Paisowa 12:12 hinaga.