2 Kin 21

Diuda edi Kin, Manase

2 Kin 21:1-6, 10-16,18

1 Manase ena boliman safuhudohudoꞌi luwaga ya kin be Yelusalem ya ita watan ee–, boliman 50. Tinana hesana mate Hefasiba 2 heyaheyaya ya ginauli Guyau matana yai, na heyaheyaya ni, doha dodoga beyabeyana Kanana yai Guyau ya falakodi Isalaela matadi yai. 3 Yaubada bwalabwaladi aba fadebasaedi lumadi tamana, Hesekaiya ya anfaheyayaidi mate ya ginauli fuyoꞌidi yo galewa kipwaladi hinaga ya fadebasaedi. Antalasam aba gabugabudi katakatandi ya ginaulidi oitau Baꞌala enehena yo Aselaha oitauna duhuna hinaga ya ginauli mate gonogonowana doha Isalaela edi kin, Ahaba ya ginauli. 4 Guyau ena Luma Tabuna ganahewana yai antalasam aba gabugabudi katakatandi yaubada bwalabwala enehedi, ya ginaulidi. In moho Guyau ena Luma Yelusalem yai ni, beyabeyana haꞌa ya libaen iye “Hesagu ainiya haba ya ota.”

5 Guyau ena Luma Tabuna dobidobina luwaga*Isalaela dodogadi gonowana sa lau dobidobi esega lisina yai na dobidobi fafaluwagana hige gonowana ti lau niya. Tau antalasam moho ibodi haba sa lau niya. mate amainiya antalasam aba gabugabudi katakatandi ya ginaulidi, galewa kipwaladi enehedi. 6 Natuna ya antalasamen oyagi alaꞌalana yai. Ayahan ya anpate yo nesu itaꞌita ya fapaisowadi be haba doga ena aba fagiluna be ya fakasa. Dodoga sa anꞌanmasi yo yaluyaluwa†Ginaulidi te lisidi yai Mose ena laugagayo hige ti lau watan. Au itaꞌita lau Diutelonomi 18:14 ya libalibalau lebedi. Heyaya laꞌilaꞌi ya ginauli Guyau matana yai be manana ya fabala. (Diutelonomi 18:11)

10 Guyau ena tau paisowa, yo peloweta moꞌadi yai iyen,

11 Diuda edi kin Manase, heyaheyaya lalalaꞌi ya ginaulidi, sa ouli wananaha, habahim Amoli dodogadi, tau miya bwaꞌi.

Ena oitau debadi yai Diuda ya foya ponolidi.

12 Debana yai, Isalaela edi Guyau yo edi Yaubada iyen,

Heyaheyaya hesa haba E leyama Yelusalem yo Diuda Nuꞌu a ai lisidi. Haba safaluma sa atahiyen mate sa tauhiti. 13 Lufa E fapaisowa Samaliya yo Ahaba ana boga lisidi yai, mate haba E fapaisowa be Yelusalem E lufa. Yau haba Yelusalem E sau afulen doha disi ya sau na ya fabui homo. (Maleko 4:24)

14 Egu dodoga ota fahidi, safalumadi hige ti wunuidi, haba E taꞌai mulimuliyedi yo E fele afuledi adi waiyunu Asiliya lisidi yai be edi tanohi yo edi ginauli mahudoꞌidi haba sa lau kwayaidi. 15 Doha ite haba E ginauli paꞌana heyaya haꞌa beyabeyana sa ginauli matagu yai, fuyanna wahawahadi Idipi edi fuya lau afulenna ya laoma ee–, aho te, na hola otadi lisina yai, managu sa fabala.

16 Oitau fadebasaedi lisidi yai Manase Diuda dodogadi ya foya ponolidi be heyaheyaya sa ginauli Guyau matana yai. Falau maimaitina, Manase tau laulau dudulai ya wunuidi be ꞌwasinadi Yelusalem ya nuhuli, ya leu ee–, dudu, na ya sai ee–, dudu.‡

18 Manase ya peꞌi mate Usa gabuna yai sa boꞌusai, kin ena luma loholohona dobidobina yai. Na natuna Amon ya falau damahi.

Amon ya Famala Diuda edi Kin Hesa

2 Kin 21: 19-24

19 Amon ena boliman 22 ya obiyo kin be Yelusalem ya ita watan boliman luwaga. Tinana hesana Mesulemeta, Halusi natuna na ena nuꞌu Dotiba.§Na nuwana, Dotiba mate Galili Nuꞌuna ganahewana yai.

20 Amon hinaga heyaheyaya ya ginaulidi Guyau matana yai, doha tamana Manase. 21 Tamana ena laulau ya laulauwedi be ya laulauꞌuꞌula lau ena oitau lisidi. 22 Afa wahawahana edi Guyau Yaubada, ya ꞌwaiyoꞌoꞌen. Ena laulau hige i laulawen.

23 Baꞌisa ena tau paisowa lalaꞌi, simosimo yai sa oilibaen bena sa wunui, yo fede, sa wunui ena luma loholohona yai.*Kin ena luma laꞌilaꞌina yo loholohona hesana hesa mate “palesi” alina dimdim yai. 24 Habahim Diuda dodogadi haisa, Baꞌisa Amon tau wunuina sa wunuidi. Na natuna, Diyosaiya sa faꞌobiyo kin, tamana falau damahina.

<- 2 Kin 20 2 Kin 22 ->