2 Kin 17

Asiliya edi Kin, Isalaela ya Tohaidi be ya Lawedi ena Nuꞌu

2 Kin 17:5–6

5-6 Kin Hosiyeya ena boliman fafaligigi fatina yai Isalaela ya ita watan mate fuyana yai Asiliya edi Kin, Isalaela mahudoꞌina ya eli halahalaen. Boliman faihona Samaliya taonna sa fasai bulubuluhi. Asiliya edi kin, Samaliya dodogadi ya tohaidi, be ya lawedi Asiliya. Haisa ya famiyadi Hala Taonna yai, na haisa Habo Hoꞌowana sadaina yai ya famiyadi Gosan Nuꞌuna ganahewana yai. Na hahaisa mate Mediya taondi yai ya famiyadi.*Guyau, Isalaela dodogadi ena panipanisidi doha, paꞌana iti yaubada bwalabwala sa famuli watanidi.

Isalaela sa Lawedi Nuꞌu Hesa, Paꞌana Yaubada Hahaisa sa Famuli Watandi

2 Kin 17:7-12

7 Isalaela dodogadi mate, beyabeyana Guyau ya abi hasaedima Idipi edi Kin Falo ena gigibwali yai. In moho, Yaubada ena laulau hige ti famuli watan yo ginaulidi te, sa tubu paꞌana Isalaela heyaheyaya sa ginaulidi Guyau edi Yaubada matana yai. 8 Yaubada hahaisa sa fadebasaedi yo nuꞌu matadi yai Guyau haꞌa ya weꞌaidi, edi laulau sa lau watanidi, doha Isalaela edi kin edi laulau. 9 Duhu balabalamumu ganadi yai edi yaubada bwalabwala aba fadebasaedi sa ginaulidi. Simosimo yai, Isalaela laulau haisa sa ginaulidi edi Yaubada matana yai mate hige ti dudulai.

Tau gati edi aba itaꞌita lau ya lau wee–, duhu balabalamumu ganadi yai edi yaubada bwalabwala aba fadebasaedi sa ginaulidi.

10 Umeꞌehu tabudi yo yaubada bwalabwala Asela duhudi sa faꞌobiyodi piupiu hiti mahudoꞌina yai yo oyagi laꞌilaꞌidi logulogudi yai. 11 Piupiu hiti aba fadebasaedi mahudoꞌidi yai omwaga sa gabudi, doha beyabeyana nuꞌu matadi yai, be Yaubada ya weꞌaidi. Laulau heyaheyayadi sa ginaulidi be Yaubada sa fanuwa halahala. 12 Iti oitau sa fadebasaedi, in moho, Guyau ya falibadi iyen,

Umi tabu doha ite au ginauli.

Taꞌowawa Dodogadi Samaliya yai sa Gogo

2 Kin 17:24-29

24 Babilon, Kuta, Awa, Hamata, yo Sefwalawaim dodogadi Asiliya edi kin ya ledima be Samaliya taonidi yai ya famiyadi, Isalaela dodogadi falau damahidi. Samaliya nuꞌuna sa abi, enehedi, be amainiya sa gogo. (2 Kin 17:6)

25 Fuyana amainiya sa miya bwaꞌibwaꞌi hige Guyau ti fafadebasae, yo fede laiyon ya fatamali lawedi be dodoga haisa sa wunuidi.

26 Asiliya edi Kin wasa te sa faliba tiyen,

Tau falau damahi wa duidi sa lau Samaliya taonidi sa gogo mate, nuꞌu ni yaubadana somo ya fanufanuha hige ti sibai. Logena laiyon ya fatamali lawedi be sa wunuwunuidi.

27 Yo fede Asiliya edi kin liba ya tole, iyen,

Tau antalasam Samaliya yai haꞌa te tohaidi, be eda fayofayo tau abina mate, esega au dui i fuyo Samaliya i miya. Be nuꞌu ni yaubadana somo ya fanuha haba dodoga ya fatalahadi.

28 Logena, tau antalasam esega sa abi Asiliya yai, sa dui ya lau Beteli taonna yai ya gogo, be sidohana Yaubada fafadebasaena ya fatalahadi. 29 In moho pele esega - esega edi aba miya yai edi yaubada bwalabwala sa ginaulidi taon hahaisa yai, be Samaliya edi oitau aba faꞌobiyodi yai sa famwaitodi piupiu hiti yai.

<- 2 Kin 16 2 Kin 18 ->