1 Iyesus b́ shuuts shoydek't sha'iru ay asho b́ bek'tsok'on, guri abaats kesht beeb́dek'i, b́ danifwots b́maants t'iinbodek'i. 2 Hank'o et tnwere daniyo dek'b́twi.
11 [f] «T jangosha err ashaashwots itn boc'ashor bogiishor, kooton it shúútso bot'afiwor derek itne. 12 [g] Dari mengstotse it daatsit k'awntso een b́wottsotse gene'ore, ayide gene'ore. Itiyere shin teshts nebiyiwotsi mank'o gishewo boats betsrne.»
13 [h] Manats dabt Iyesus hank'owa bíet, «It datsatsi beerok'o itne, ernmó beero b́shaawo b́ t'ut'etka wotiyal b́shaawo aak'alrniya aaniy daatso b́faliti? Úromaants juweyar ashon net'eyoniyere okoon shinomaants egoshor woteratse. 14 [i] Itiye datsansh sháán itne, guri abaats ageets kitu ááshosh falratsane. 15 [j] Ashuwots c'eesho c'eeshde'er mootse fa'a ash jamwotssh b́sháánitwok'o girgijiyatsa bogedfoni bako oosh shirots dashan geraknee. 16 [k] Mank'o ashuwots it sheeng fino be'ear it nih darotstso bo mangiytwok'o, it sháánonwere ash jami shinatse shááne.»
21 «Yoots dúr teshts ashuwotssh eteetso shishrte, manwere ‹úd'k'aye, ash úd'tsats angshetwe› eteeke. 22 Taamó itsh keewirwe, bíeshwi fayitw jamats angsha angsheti, ando bí'eshush, ‹Nee woterawani!› err c'ashetwo angshirwots shinatse bíats angsheti, ‹Dartsani› err c'ashetu jamo gahanem tawotsa b́kinditwok'o bíats angsheti. 23 Eshe nee n wosho gizi wosh t'intseyiru t'arp'ezok Ik'osh n door, niyats iirts eshwo b́ beewo n gawitka wotiyal, 24 n wosho gizi wosh t'intsiru tarap'ezmanok gerk'rar, amr shini n eeshunton manewe, maniyere okoon aanar n wosho t'intswe. 25 N balngaro neen s'amire angishi moo maants b́ damfere weerindatse káári n balangaronton ik wotowe. Man woto b́k'zal n nbalangaro danyosh, danyonwere polisosh, polisonu beshde'er b́ ime tipi moots n kinditi. 26 Aroniye neesh ti keewiri, niyats angshets santimi tebu day ni'ishfetsosh b́ jamon manitse keyatsne.»
31 [p] «B́ máátsu fakshitu jamo bin b́fakshtsok'o kitsit frmo bish ímee» etre. 32 [q] Taamó «Widi jangon b́wotiyala bako, b́ máátsu fakshitu jamo widets bwotitwk'owa bin b́woshiti, fakshetsu deke'etu jamonwere widetsiye b́wotiti.»
38 « ‹Ááwi shegro ááwa, gáshi shegro gásha› eteetsok'o shishrte. 39 Taamó hank'o etirwe itsha, gond itats finiru ashuwotsats weero wersh k'ayere. Ernmó nk'ani malalo jabitwosh ngiri malalo ananshde ime. 40 Ash iko nkito dek'osh geeyar niyatse b́moshal, n kotiyonor b́dek'etwok'o bísh k'ayk'rowe. 41 Ash iko ‹Taanton kuro kurde ik kilo metrok'o amee,› err neen b́shefiyal, nemon kuro kurde git kilometro bínton amee. 42 [v] Niyoke k'onitwosh ime, niyoke gushosh geyirwosh k'aze etk'aye.»
43 Manats dabt Iyesus hank'owa bí'eti, « ‹N giyo shune, n balngaro shid'ee› eteetsok'o shishrte. 44 [w] Taa it balngarwotsi shunere, iti gishirwotssh Ik'o k'onwere» etirwe. 45 Han it k'aliyal, darotse fa'o it nihsh nana'úwotsi wotitute. Bíye gondwotsnat sheengwotssh aawo kishirwee, mank'o kááwwotsnat k'uurwotssh bí awsho butsirwee. 46 Iti shunir ashuwots s'uzi it shunal eeg k'awntse it detsi? Morretswots[x] mank'o k'alirunoshna 47 It eshwots s'uzi jamo it aatitka wotiyal eshe aawne bogo it finirwoni? Ik' ash woterawotswor mank'o k'alirunoshna? 48 [y] Eshe daritstso it nih s'een b́wottsok'o itwere s'eenwotsi wotoore.
<- Matiwos Dooshishiyo 4Matiwos Dooshishiyo 6 ->- a Isa. 61:2
- b Dub. 37:11
- c Isa. 55:1-2
- d Dub. 24:3-4
- e 1 P'et'. 3:14
- f 1 P'et'. 4:14
- g 2 Zen. 36:16; Wosh. 7:25
- h Luk'. 14:34-35
- i Yoh. 8:12; 9:5
- j Mar. 4:21; Luk'. 8:16; 11:33
- k 1 P'et'. 2:12
- l Luk'. 16:17
- m Kesh. 20:14; Iwi. 5:18
- n Mat. 18:19; Mar. 9:47
- o Mat. 18:8; Mar. 9:43
- p Iwi. 24:1-4; Mat. 19:7; Mar. 10:4
- q Mat. 19:9; Mar. 10:11-12; Luk'. 16:18; 1 K'or. 7:10-11
- r Lew. 19:12; Taaw. 30:2; Iwi. 23:21
- s Yak'. 5:12; Isa. 66:1; Mat. 23:22
- t Isa. 66:1; Dub. 48:2
- u Lew. 19:12; Taaw. 30:2; Iwi. 23:21
- v Iwi. 15:8; Ari. 24:29
- w Ari. 25:21-22
- x Morretswots: Eto Griki mas'aafotse t'ilish ko'ifwotsi etfe.
- y Lew. 19:2; 18; Iwi. 18:13