1 «Ariko weyini k'ombo taane, mitwotsi goshtso tnihiye, 2 Ti atse fa'o shuu shuraw jabjamwotsi tnih k'ut'de juuk'ritwe, shuu shuwitu jaabo ayide b́shuwitwok'o k'anzde'er s'ayintsitwe. 3 Itwere itsh tiaap'ts aap'atse tuutson and s'ayinwots itne. 4 Taan beewere,, taawere itn beetwe, jaabo weyini k'ombats kup'ar beeratse wotiyal biyal shuu shuwo b́falrawok'owa itwoor taan beyo itk'azal shuu shuwo falratste.

5 «Taa weyini k'ombo taane, itwere jaabwots itne, ti ats deshar beetwonat taawere bín t beetwoniye ay shuwo shuwitwee, eshe ti'aalo eegor k'alo falratste. 6 Tiats deshar beerawo jaabwots uromaants juwere b́shuk'eti. Mank'o wottso jabwotsi kakude'er taawots juwere bomis'eti. 7 Taan itbeyink'e ti aap'tswotswere ititse bobeyink'ere itgeyiru jamo itk'onor daatsitute. 8 Ay shuwo it shuwink'ere manatse tuutson t nih mangiyank'ee, itwere t danifwotsi it wottsok'o kitsiyank'te. 9 Niho taan b́shuntsok'o taawere itn shunre, manshe tshunon beewere,. 10 Taa t nih tzaziyo t kottsok'onat b́ shunon t beyirwok'o itwere ti tzaziyo it kotal t shunon beetute. 11 Jaman itsh tkeewiye tgeneeú'wo ititse wotar it geneúwo s'een b́wotishe. 12 Yoh. 13:34; 15:17; 1 Yoh. 3:23; 2 Yoh. 5 T tzaziyoniye taa iti t shuntsok'o itiwere it atsatseyo it shunetwok'owe. 13 Asho b́ kasho b́ mashots shegro beshide imoniyere bogts shuno deshatse. 14 Itwere ti imts tzaziyo it s'eentsiyal t mashots itne. 15 Guutso doonzo b́finirwo b́danawotse, haniyere hakon guutswotso eraatse, s'uznmó tnihoke tshishts jamo itsh tkitstsotse t mashotsi etreitsha, 16 Taana iti marat'dek'i bako it taan marat'de'atste, amr ay shuwo itshuwitwok'o, itshuwonwere beetk b́wotitwok'o itn tnaashiy. Manshe niho t shútson it k'onts jamo itsh imetwe. 17 Eshe taa itin tiazazir it atsatsewo it shunetwok'owe.

18 «Datsan itn b́ shit'al itiyere shino taan b́shit'tsok'o dande'ere. 19 Datsank it wotink'ere datsan b́tokk wottswotsi shunak'e b́teshi. Ernmó datsank woto it k'aztsotsnat taa datsanatse iti marat' t dek'tsosh datsan itn shit'etwee. 20 Mat. 10:24; Luk'. 6:40; Yoh. 13:16 Guutso doonzoniyre bowatse etaat itsh t keewtso gawwre, taan bogiishitka wotiyal itnowere gishitune, ti aap'o bokotink'e it aap'ono kotetune. 21 Taan woshtso bodanawotse t jangosh jaman itats k'alitunee. 22 Taa waat boosh keewratse wotink'e morro boats woteratse b́teshi, ernmó and bo morrosh weebo deshatsne. 23 Taan shit'irwo t nihnowere b́ shit'iri, 24 K'osh ash fineraw fino bo dagotse fino tk'azink'ere morro boosh woteratse b́ teshi, andmó jaman bobek'iyakon taano t nihno shit'rne. 25 Hanwere b́ wottso ‹Ik jagalo taan shit'rne› ett nemotse guut'etso b́ s'eenetwok'owe.

26 «Ernmó nihoke keshetwonat taawere nihoke itsh twoshitwo itn kup'itwo ari S'ayn shayiro b́ woor bí t jango gawitwe. 27 Itwere baltson tuwat taanton it teshtsotse gawitute.

<- Yohans Dooshishiyo 14Yohans Dooshishiyo 16 ->