1 Ide Yeisu kavetumaganena faina, Yaubada yada koyona givenuwaegedi ada giawaveiwakaneda ke giseda yegayegadeyavo Bana matane, e ada ideyavo Yaubada nodi kaveyavo seyana ada miya niwalova kanuwagana. Taidei ani yada Kauveya Yeisu Keliso Banae gikivelaubodana ide faideya. 2 Kaduwe Banae wagaine ide adafaiweya yada vetumagana wagaine Yaubada yana nuwadoga kana lulutovonina, ada taidei yana nuwadoga wagaine kamidimididi aku kaduwe kavemwamwala lakaina faina wa yada nuwavetumagana kaveitabodaboda Yaubada yana iwakana mamalina faine. 3 Ada keke yana iwakana mamalina gaga faina kada vemwamwala, aku kaduwe kavemwamwala faina uloulolo kanuwanuwagadi.[a] Faina kaalamanena kai taudeyavo kana awaegeda uloulolo wagaidiya, aga taidei ilemelemeda ke kana atuvefaila-mowa. 4 Ada kai kana atuatuvefaila-mowa wagaidiya aga taidei gina lemeda ke kana asekumaga, ada wa yada asekumaga yada nuwavetumagana adakibababala faina kana kidonena. 5 Ada kaalamanena yada nuwavetumagana keke kadase-kavovo, faina Yaubada giveleda Aluwaluwa Tabuna e ada Banae wagaine Yaubada yana nuwakabubu lakaina gibiwana wagaideya ani kalulutovonina nuwainagedeya.

6 Waitana, tova-nai ide aimo koyona giveiveimeyeda ada keke wa yada toyogina ke taudeyavo kana kibababaleda, tova-nai analauboda wagaine Keliso gielai ke gialika faideya. Ide wa yada koyona ani keke maita anafaiweya Yaubada faina Banae yana dewa yegayega-vagaidi, aku au faideya giawaegena. 7 Yaubada yana nuwakabubu ide faideya ani lakai-vagaina ayo kaliva yadi nuwakabubu tubuiyadiyavo faidiya. Gavaiyamu, gavaiyei kaliva tubuiyadi anayava faine isefaga ke taudiyavo ina awaegedi alika wagaine? Kaliva toiye gagana. Kai tubuiyadi yana dewa yegayegana ada iwakana velemoena ada inuwakabubuyena lakaina, aga wa yadi asevatu taudiyavo ina awaegedi bana faine ina alika, aiyo? 8 Aku Yaubada gikiveyegemonina Tauna yana nuwakabubu lakaina ide faideya ani taidei anafaiweya. Ide aimo tokoyona, aku Keliso faideya gialika.[b] 9 Keliso dayagina gimadu faideya ke kayegayegana Yaubada matane faina,[c] kaduwe kaalamanena velemoena Banae gina kibababaleda Yaubada yana nuwakoyo wagaine-deya e ada yada koyona analaufata keke kana nuwaga. 10 Wana itana. Nagona ide Yaubada nibainavo nonogana Banae Tauna giveseyana-vagileda Natuna yana alika wagaine. Ada Natuna yana alika wagaine bademowa kaveseyana-vagila Yaubada nodi faina, kaduwe velemoena Keliso wayawaina gimiyamiya faina, Banae anafata gina kibababale-yabuda.[d] 11 Ada keke adakibababala gagana kada nuwaga, aku kaduwe ani adafaiweya kana vemwamwala-mowa ke Yaubada kana miyalabilabinena yada Kauveya Yeisu Keliso wagaine-deya, Banae-nai yada vetubuiyana gikiveyegemonina e ada ide Yaubada nodi kaveseyana-vagila.

12 Ide Yaubada nodi kaveyavo ani faina kaduwe gana ifufu. Kaliva seyana yana koyona wagaine koyona givevuvu,[e] ada yana koyona-nai fatana ani alika.[f] Ada ide moyaida kakoyona faina, kaduwe alika gidamana tomiyababi moyaida wagaideya. 13 Tova tuwai-moena Yaubada yana veimeya aimo keke gidavele Mosese wagaine, tova-nai wagaine tomiyababi ikoyokoyona. Aku veimeya keke gida miyami faina, Yaubada kaliva yadi koyona keke gida nuwenuwedi vaita veimeya iyawelina. 14 Aku Adama[g] yana toveya ke gielai Mosese yana tova, alika kaliva giveiveimeyedi ke moyaidi ialialika. Biyavo-dina Yaubada yana veimeya keke ida yaweli anafaiweya Adama giyawelina, aku auwe ialika.[h] Aku bana Adama ani yada ebaita Keliso faine, Banae-nai aimo gina yegemona.[i] 15-16 Faina Adama ani banae kaliva anakaibe-mowa aku yana koyona wagaine ada kaliva moyaida alika kanuwagana. Aku Yeisu Keliso ani Banae kaduwe anakaibe-mowa aku yana faisewa ani kaliva moyaidi gilemedi, ada gikivemeyameyaganina ke Yaubada gina nuwakalikaliyedi ke wa yana nuwadoga gina lemelemedi. E ada Yaubada adanuwakabubu Banae Natuna givele-kavovoda ani vilena keke anafaiweya Adama yana koyona vilena, wada tulina. Faina wada Adama yana koyona seya-moena taine moyaida gikivekoyoda, ada taidei vuvuna-nai faine Yaubada matavuloga ginasena wagaideya. Aku tova-nai matatabuda Yaubada yana veimeya moyaina kagadibudibusoyogedi, aga auwe aku Yaubada yana nuwakabubu givele-kavovoda ke giawaveyegayeganeda, givona, “Yami koyona bademowa giavaina ada imi yegayegamiyavo matakuya.” 17 Kaliva seyana gikoyona faina, alika kaliva giveiveimeyedi ke moyaidi ialialika. Aku kadu Kaliva seyana wagaine ani yadi iwakana lakai-vagaina inuwagana, tainei Yaubada yana nuwadoga lakai-moena ada yana nuwakabubu keke wa fatana e ani kaliva gisedi yegayegadiyavo Banae matane. E ada gavega moyaidi yana nuwakabubu-nai ina nuwagana ani ina vevetoyogina dewa koyona wagaidiya Kaliva seyana-nai wagaine, Banae Yeisu Keliso.

18 Yaku ifufu ananuwanuwa taidei anafaiweya. Kaliva seyana gaga yana koyona wagaine ada moyaida kakoyokoyona, ada faine Yaubada givona, “Yadi koyona fatana faina matavuloga gana veledi.” Aku kaduwe anafaiweya Keliso gugai yegayegana seyana gifaisewana faideya e ada guwana ani Yaubada kaliva gavega tovetumagana ani moyaida faideya givona, givonaga, “Badi yegayegadiyavo Iya matakuya.”[j] Taide anafaiweya ide yegayegadeyavo kanamiya-vagata. 19 E, kaliva seyana Yaubada yana veimeya gigadibusoyogena faina, guwana giyegemona kaliva moyaidi ikoyokoyona Yaubada matane. Aku kaliva seyana faine, Banae Keliso ani Yaubada yana nuwanuwa gimatawalewaleyena e ada kaliva tufona moyaidi Yaubada ginasedi yegayegadiyavo Banae matane.

20 Yaubada yana veimeya Mosese givelena e ada veimeya-dina adiaiyawela wagaine kaliva ina itanuwagadi vaita taudiyavo yadi koyona ani lakai-moena. Aku kaliva yadi koyona giveinala lakaina aku Yaubada aimo wa yana nuwadoga lakai-moena gidewedewedi iwakana. 21 E ada anafaiweya koyona ani kaliva moyaida giveimeye tagotagoda ada ginagonagoyeda alika anawai wagaine, ani au taine anafaiweya Yaubada nuwanuwana yana nuwadoga wagaine gina veimeye-tagotagoda ada gina nagonagoyeda ke ginaseda yegayegadeyavo Banae matane. Taidei wagaine gina aliyeda yawai-vagata anawai Bana yada Kauveya Yeisu Keliso wagaine.[k]

<- Loma 4Loma 6 ->