Ivemogatala 5

Iyoni giitana Bana Lami buki uwalugena givaina.

1 Ada gamiyamiya aku Banae givetogana veimeya anaebavetoga kaikaiwabuna wagaine, ani buki uwalugena[a] nimana aiyatagina wagaine gaitana. Buki-nai uwalugena[b] anafafali iluwei wagaidiya ivetokilumina ada anaebakivefota adiseveni isedi. 2 Ada gaitana anelose totoyogina givona bonana lakaina wagaine, givona, “Gaito tovetoyogina e ada analauboda ebakivefota gina sigoloidi ada buki-nai uwalugena ginayavu?” 3 Aku keke tamo gaito gabama wagaine, kai babi wagaine o kai babi dibune gida miyami-yo anafata buki uwalugena gidayavu ke negenina gidaita. 4 Ada Iya gatagiya toyogina, faina keke tamo gaito ida nuwaga wa yana yegayegana ke analauboda buki uwalugena gidayavu negenina gidaita. 5 Ada gatagitagiya aku tomiya gabama aditonagona seyana givoneku, givona, “Keke una tagiya. Una itana, Banae-nai ivewagana ‘Iyuda anaunuma analaiyoni’ kadu ‘Deivida yana tubudelideli lakaina’ ani idauwe. Banae ani bademowa givetoyogina, e ada anafaiweya buki uwalugena anaebakivefota adiseveni gina sigoloidi ke buki-nai gina yavuna.”

6 Ada veimeya anaebavetoga kaikaiwabuna ada gabama anagaitoma-dina wayawaidi adilaufuli adimwatuguya, ani Lami seyana gimidimididi gaitana,[c] ada tomiya gabama aditonagona-dina tuweniti-fowa imidififina. Lami-moena anaita anafaiweya vaita bademowa ida luvealika. Banae yana ebafwaiki adiseveni ada matana adiseveni, tainei ani Yaubada Aluwaluwana adiseveni giimilidi iyegemona babi matatabuna wagaine. 7 Ada Banae Lami-nai ginau Banae-nai givetogana veimeya anaebavetoga wagaine, ada buki uwalugena nimana aiyatagine-deya givaina. 8 Tova-nai buki-nai uwauwana givaina, gaitoma wayawaidi adilaufuli ada tomiya gabama aditonagona tuweniti-fowa iiboula-mowa Bana Lami wadebaine. Badi seyana seyana api seyana giabina, kadu nauwa gola imaga inisenisi[d] magana iwaka-vagaina wagaine, taine ananuwanuwa ani Yaubada yana kaliva tabutabudiyavo yadi veoveola.[e] 9 Ada kweli evaguna ikweliyena[f] Lami wagaine, ivona,

“O Tovetoyogina e ada alauboda buki uwalugena unavai anaebakivefota una sigoloidi,

faina Oyeni iluvealikani, ada O dayagi wagaine kaliva moyaidi

uetoyavudi Yaubada faine.

Badiyavo unuma seyana seyana,

meya seyana seyana,

yoo seyana seyana,

kadu fafali seyana seyana wagaidiya-deya.

10 Ani Oyeni ukilakaidi ada usedi Yaubada yana yoo giitaitaveyabidi kadu veyavo anatovegugai adiivi[g] uveledi.[h]

Ada ina veiveimeya babi matatabuna wagaine.”

Taidei anafaiweya yadi kweli.

11 Ada kadu gaitanau ani gaitana ke ganogalina anelose moyai-vagaidi, adinaba anaetowava ani tausani ke tausani, keke akufaiweya gana veyawadi. Ada anelose-dina ani veimeya anaebavetoga kaikaiwabuna ada gaitoma wayawaidi adilaufuli kadu gabama anatomiya aditonagonayavo imidififidi. 12 Ada bonadi lakai-moena wagaine ivonavona,

“Lami-nai iluvealikana ani Banae Tovetoyogina,

e ada analauboda gina nuwagana toyogina, kaikaiwabu, ada nuwauya.

Ee, kana vemoimoinena, anayegana kana kilakaina, ada kana davadavana!”

13 Ada gamiyamiya aku gaitoma seyana seyana wayawaidi Yaubada gibubudi gabameya ke babi getane ada babi dibune ke leyaga negenine, ani matatabudi nodi ivonavona,

“Banae givetogana veimeya anaebavetoga kaikaiwabuna wagaine ada Banae Lami,

ani kana davadavadi ada kana vemoimoinedi.

Yadi iwakana mamalina ada yadi toyogina

imiyamiya-vagata, keke anaebalauyabu!”

14 Ada gaitoma wayawaidiyavo adilaufuli ivona, “Ika anafaiweya!” Ada tomiya gabama aditonagona tuweniti-fowa iiboula-mowa ada Banae givetoga veimeya anaebavetoga wagaine, kadu Lami-nai wagaidiya ioduodu.

<- Ivemogatala 4 Ivemogatala 6 ->