6 Bana vavine gaitana ani vaita gufa toyogina giyuga ke givekwavakwava. Aku gufa-nai taidei ani Yaubada yana kaliva tabutabudiyavo dayagidi kadu biyavo-dina Yeisu valeyana iawaawatalatalainena dayagidi, faina bana mine-nai giluvealikadi. Ee, vavine gaitana wagaine meyaku gisidobodobona velemoena. 7 Aku bana anelose givoneku givona, “Gavaiyamu-yo meya gisidobodobo? Banae vavine-nai kadu kevakeva-nai koyo-moena wa kuluwana adiseveni ke yana ebafwaiki teni, ani bana mine-nai giwaiwaina, ani ganavona faidiya. Adinuwanuwa ani sewasewavuyena, aku gana kivemalina wagainiya. 8 Taide kevakeva-nai koyo-moena uitana ani tuwaina wayawaina gimiyamiya, aku malinai keke. Aku au tova kabisona gina lakayegemona olu keke wa anaebalauyabu wagaine ke anaagolaufofola gina nuwagana. Tuwai-bulubuluna muliya-yo Yaubada babi gibubuna anatoveya, kaliva-dina aimo yawai-vagata ina nuwagana ani adiyegana Yaubada givetokilumidi Yawai anaBuki wagaine. Aku babi anakaliva-dina badi adiyegana keke Yawai anaBuki wagaine, ani kevakeva-nai ina itana wagaine yaudi gina lovoga. Faina kevakeva koyo-moena tuwaina wayawaina gimiyamiya, aku malinai keke, aku aimo kadu gina miyamiya.

9 “Tubuiyakuweyavo, kai nuwanuwami wana alamanena taidei vona-nai ananuwanuwa, aga gilubodami yami nuwauya nodi wana nuwanuwayena. Kuluwana adiseveni anaalamana ani oya adiseveni tabodiya vavine givetovetoga. 10 Aku kadu ananuwanuwa seyana, ani kuluwana seveni-dina taine kini adiseveni. Ada kini-dina wagaidiya ani adifaifi bademowa adiivi-nai giavaina, bana anavesikisi malinai giveiveimeya, ada bana anaveseveni aimo keke gida vekini. Aku aimo tova gielaelai wagaine banae anaveseveni gina vekini, aku tova maufona analauboda wagaine ginamiya. 11 Aku bana kevakeva koyo-moena tuwaina wayawaina gimiyamiya aku malinai keke, ani au kini-dina adiveseveni adiyoo anakaliva, aku gina vekini anaveeita. Aku anaagolaufofola gina nuwagana. 12 Aku ebafwaiki teni uitadi ani badi kiniyavo teni aimo keke vekini anaveimeya ida nuwaga. Aku aimo badiyavo ani kevakeva-nai koyo-moena nodi vekini anaveimeya ina nuwagana, aku keke tova manamanawena, au kauwana anabai seya-moena gaga wagaine. 13 Kini teni matatabudi yadi nuwanuwa seyana wagaine, ani yadi toyogina kadu yadi veimeya ina atuegena kevakeva koyo-moena wagaine. 14 Biyavo-dina Bana Lami ina lugaviyana aku Banae gina toyogisegedi, faina Banae kauveyayavo yadi Kauveya ada kiniyavo yadi Kini. Ada yoo-dina Banae nodi ani Tauna yana kalivayavo givenuwadadanedi ke gidouwedi, ada badi tova moyaina wa yadi idibumwaiga imulimuliyena.”

15 Kaduwe anelose givoneku, givona, “Gufa moyaina uitadi ani wagaidiya vavine sedasedadana givetovetoga, wada kaliva moyaidi imiyamiya yoo tulina tulina wagaidiya, babi anafafali tulina tulina wagaidiya, kadu meyadi tulina tulina. 16 Kevakeva-nai koyo-moena yabeyabelina ada ebafwaiki teni uitadi ani vavine sedasedadana ina agougena, ada gaitoma matatabuna vovona wagaine ina veyalilidi aku ina nuyabuyabuna. E ada au anakaibe konekonena ginamiya. Aku muline vidona ina kanina, ada gavana ginatufo ani aiyabeyabela wagaine inakabu-yabuna. 17 Tainei dewa-nai kiniyavo ina dewayena, faina Yaubada yana nuwanuwa gisena aseasediya e ada ina gugaiyena. Matatabudi yadi nuwanuwa seyana wagaine Yaubada yana nuwanuwa imuliyena, ada ina awaegau ke vekini anaveimeya taudi wagaidiya ani ina atuegena kevakeva-nai koyo-moena wagaine, e ada banae gina veiveimeya analaba Yaubada yana vona givonaye-vagaidi ina yegemona velemoena. 18 Ada bana vavine-nai uitana, wada melala lakaina wa anayegana giveiveimeya babi matatabuna anakiniyavo wagaidiya.”

<- Ivemogatala 16Ivemogatala 18 ->