Ibeliu
Kivemala
MeIsileli Yeisu Keliso wagaine ivetumagana ani taidei yadi leta. Biyavo-dina adiyegana anavelu ‘meIbeliu’, ada bonadi vona Ibeliu. Leta taidei anatovetokiluma keke kada alamane, faina keke tauna anayegana gida inana.
Badi meIbeliu tovetumagana ani tubuiyadiyavo meIbeliu tufodi keke ida vemwamwala wagaidiya faina, inuwanuwa vaita yadi oduodu tuwaina Mosese yana veimeya wagaine ina yewadi. Taidei faina leta anatovetokiluma nuwanuwana gina vewaledi vaita Yeisu anaoduodu ani yadi oduodu anaveimeya tuwaina giveiwakasegena. Yeisu ani Banae Yaubada Natuna, ada aneloseyavo ke falofitayavo kadu Mosese ani gitubusege-moedi. Mosese yana veimeya anamatawalewale wagaine ani kaliva keke adifaiweya veyavo-vagata Yaubada nodi ina nuwaga. Aku Yeisu ani Banae yada veyavo anatovegugai aditonagona ada Yaubada aiyatagine gimiyamiya-vagata ide faideya faina, anavetumagana anawai ani oduodu anaveimeya tuwaina giveiwakasegena.
Keliso ani Yaubada anaitaita ke yana veuluva giivemogatalidi. (1:1-3)
Keliso ani Yaubada yana aneloseyavo gikaiwabusegedi. (1:4 - 2:18)
Yeisu lakai-moena muliya-yo Mosese ada Iyosuwa. (3:1 - 4:13)
Keliso lakai-moena ayo badi veyavo anatovegugai velugadiyavo. (4:14 - 7:28)
Veyavo anawai Keliso gikiveyegemonina ani veyavo anawai tuwaina giveiwakasegena. (8:1 - 9:28)
Keliso yana vebolavoi seya-moena givebolavoiyena ani vebolavoi velugadiyavo matatabudi giveiwakasegedi. (10:1-39)
Vetumagana faina. (11:1 - 12:29)
Lauwage tulina tulina ke vona anaebalauyabu. (13:1-25)

Yaubada yana iwakana mamalina Keliso giivemogatalina.

1 Tova tuwai-moena, Yaubada yana nuwanuwa moyaina kabisona kabisona yana falofitayavo giawaveleveledi, ada wai tulina tulina wagaidiya badi iawatalatalainena tamadeyavo nagona wagaidiya. 2 E aku malinai tova anaebalauyabu anayadayada-dina wagaidiya ani Tauna Natuna wagaine givona wagaideya. Yaubada Natuna-nai wagaine gaitoma matatabuna babiya ke gabameya gibubudi,[a] ada kaduwe Yaubada givenuwadadanena Banae gaitoma matatabuna gina vetoinavuvunedi. 3 Kauwana yana malina kelasi wagaine kakivenamanamalina anafaiweya, Banae Yaubada Natuna ani Yaubada yana iwakana mamalina gikivenamanamalina. Ada Yaubada anaitaita ke yana veuluva giseyegemonena, kaduwe Natuna anaitaita anafaiweya, au anunudi seyana.[b] Ada Yaubada Natuna gaitoma moyaidi gabameya ke babiya yana vona wa anatoyogina wagaine gisedonedi ke giitaitaveyabidi. Banae yana alika wagaine ide kaliva yada koyona anaikolayavula gibubuna ayo gilaka gabameya ke givetogana Togetane-mwane aiyatagine, ivi-nai wa anavemoimoina wagaine.[c]

Keliso aneloseyavo gitubusegedi.

4 Yaubada aiyatagine Natuna givetoga e ada taidei wagaine kaalamanena Banae anayegana lakai-moena ayo aneloseyavo, anafaiweya anavewaga-nai givelena ani lakai-moena ayo aneloseyavo adivewaga.[d] 5 Kaalamanena velemoena Yaubada Natuna anavewaga lakai-moena, faina tuwai-moena givonayena Buki Tabu wagaine Natuna faine, givonaga,

“Oyeni ani Iya Natuku.

Malinai Iya gavetama O wagainiya.” [e]

Ada kaduwe Yaubada givonaga,

“Iyayeku Banae Tamana,

ada Banae ani Iya Natuku.” [f]

E aku keke tamo tova gidavona anafaiweya anelose seyana wagaine, keke-mowa. Bana Natuna anakaibe-mowa wagaine givona anafaiweya. 6 Ada kaduwe tova-nai Yaubada Natuna tomoinagona gina imilina babiya, aneloseyavo wagaidiya givonaga,

“Imi yaku aneloseyavo, wa yami vemoimoina

nodi wana oduodu Banae wagaine.”

7 Aku aneloseyavo ani faidiya Yaubada givona,

“Iya yaku aneloseyavo gabubudi ani yadi madu vaita mala anafaiweya.

Badi yaku togugaiyavo vaita aiyabeyabela meyana anafaiweya.”

8 E aku Natuna ani Yaubada givonena, givonaga,

“O Yaubada, una vetoveimeya-vagata ke vagata.

Wa ya nuwanuwa tunutunugina uveiveimeya ya ebaveimeya wagaine.

9 O nuwanuwa lakaina dewa yegayegana aku dewa koyona udibusoyogena.

Tainei faina Iya ya Yaubada ayegana gakilakai-moena

ada vemwamwala anabunama gaiwana wagainiya.

Tubuiyamomo tokwayabu ivemwamwala,

aku Oyeni ani uvemwamwala-mowa.” [g]

10 Ada kaduwe Yaubada Natuna faine givona,

“Oyeni ani Kauveya, ebavevuvu-mowa wagaine babi ububuna,

ke Tauni nimaniya-mwaeya gabama ububudi.

11 Gaitoma-dina aimo ina avaidi,

aku Oyeni ani miyamiyani-vagai.

Anafaiweya nuya gina miyamiya aku

aimo anaiwakana gina avaina ke gina vetuwai-mowa,

kaduwe babi ke gabama aimo ina vetuwai

ada yadi iwakana gina avaidi.

12 Gaitoma-dina aimo una uwadi nuya tuwaidi

anafaiweya, ke una sevedavedamadi.

Aku Oyeni umiya-vagata, keke uda sevedavedama,

ada ya tova keke anaebalauyabu.” [h]

13 Kaduwe seyana tova Yaubada givona Natuna wagaine, givonaga,

“Aiyatagikuya una vetoga analaba

nibaimomo gana seobuyedi

ada yadi toyogina ani gina avaina velemoena.” [i]

E aku keke tamo tova gidavona anafaiweya anelose seyana wagaine. 14 Kai tayuwe anafaiweya, aga gavega aneloseyavo? Badiyavo Yaubada yana togugaiyavo, au aluwaluwa giimiimilidi ke badiyavo gavega yana kibababala ina nuwagana ani ilemelemedi.[j]

Ibeliu 2 ->