1 Aku Yaubada yami koyona givenuwaegedi ada ginuwakabubuyemi anafaiweya natu aseasenavo faina, Tamami wana gaveuveulena. 2 Kevakeva ivebolavoiyena ke magana iwakana gilaka Yaubada giyauna anafaiweya, Keliso Tauna giawaegena alika wagaine ide faideya, ada yana vebolavoi ani iwakana ke ebavemwamwala Yaubada wagaine.[a] E ada Keliso ginuwakabubuyeda ke yawaina giawaegena faideya anafaiweya, imi gilubodami yawaimi matatabuna wagaidiya wana dewadewa wa yami nuwakabubu nodi.[b]

3 Aku vovo anaawaege-kavokavovo tulina tulina ke nuwanuwa bwanebwanenena ani matatabuna wana dibusoyoge-yabuna, ada kaduwe keke giba wana itaitaluvadige. Keke-mowa wanadewa anafaiweya e ada kaliva adifaiweya valeya koyona ina ifuifufuye vaita gaito seyana wagaimiya gidewadewa anafaiweya. Faina imiyavo Yaubada yana kaliva tabutabumiyavo. 4 Kaduwe, keke gida lubodami wanavona bwanebwanenena o kai wana awavekwavakwava o kai wanavona awaveleiga dewa koyona faina.[c] Aku aiyada yami vona wagaine Yaubada wana vesivesiuleyena.[d] 5 Ada gilubodami wana alamanena vaita badi gavega toudo, o kai tosedada, o kai vovo ananuwanuwa bwanebwanenena wagaine iawaegedi, o kai giba iitaitaluvadigedi, ani biyavo-dina keke-mowa inaluku Keliso ke Yaubada yadi ebaveimeya wagaine ke gaitoma iwakadi ina nuwagadi anafaiweya Yaubada givonadabadabayena.[e] Biyavo-dina giba iitaitaluvadigedi ani anafaiweya ioduodu yaubada fwayafwaya wagaidiya, faina giba-dina nuwadi givai-vagaina.

6 Wana itaveyabimi keke tamo gaito vona kavokavovo wagaine gina fwayamikamikami. Faina taidei dewa-dina badi igugugaiyedi ani Yaubada yana nuwanuwa idibusoyogedi, e ada Yaubada yana nuwakoyo lakaina wagaine gina vematavulogidi.[f] 7 Tainei faina badi todibusoyoga keke nodi wana luluveya. 8 Faina tuwaina imi yuyuvana anakalivayavo ada wakoyokoyona, aku malinai imi Kauveya nodi waveseyana ada imi malina anakalivayavo.[g] E ada malina anabiyavo anafaiweya wanadewa.[h] 9 Faina malina guwana ani dewa iwakana, dewa yegayegana, ada vona velemoena. 10 Ada wana galuvaluva ke wana alamanena gaitoma-dina Kauveya ikivemwamwalina.[i] 11 Aku badiyavo keke Yaubada ida muliye ke yadi dewa yuyuvana ani keke wana gaveuveuledi aku yadi dewa-dina wana dibusoyogedi, wada keke wa adiguwa iwakana. Aku aiyada kaliva idewadewayedi ani wana awavetuvetunugidi e ada moyaidi ina alamanena vaita dewa-dina ani koyodi.[j] 12 Faina tayuwe dewa-dina yuyuvana ikavuya ifaifaisewadi ani kai gaito seyana gina ifuifufuyena, wada ebavovomumu lakaina. 13 Aku gavana kana awavetunugina ke Kauveya yana malina gina kuvemalina ani matatabuna adiita velemoena gina yegemona, kai iwakana o kai koyona. 14 Faina kai gaitoma seyana yuyuvana wagaine gina miyamiya aku malina gina kuvemalina, aga gaitoma-nai kaduwe gina malina. Taidei faina yada vona seyana givona,

15 Tainei faina, yami dewa wana itaveyabidi. Keke wana dewadewa anafaiweya badi keke tonuwanuwa velemoena aku aiyada tova moyaina wana vetonuwanuwa velemoena. 16 Tova taidei wagaine koyona gitubuga-mowa faina, keke wanamiya-kavokavovo aku tova-nai gugai iwakadi anatova wana nuwagadi, aga wana gugugaiyedi.[m] 17 Taidei faina keke wana vekwavakwava, aku aiyada wana galuvaluva ke nuwami gina malina gavana Kauveya yana nuwanuwa.[n] 18 Kaduwe, keke wanayuga kwavakwava gufa toyogina wagaine, faina yuga kwavakwava wagaine aimo wana gadawedawelo ada yawaimi gina kikivekoyona. Aku aiyada tova moyaina wana awaegemi ke Aluwaluwa Tabuna gina vemagami.[o] 19 Yami ifufu wagaidiya Same tulina tulina wana veifuifufuyedi, kaduwe Yaubada anakweli davadava ivetokilumina wana kwelikweliyedi, ke kaduwe kweli-dina Aluwaluwa Tabuna gina alavelevelemi ani wana kwelikweliyedi, ada wa yami vemwamwala aseasemiya wana kweli davadava Kauveya wagaine.[p] 20 Ada tova moyaina gaitoma moyaina faidiya wana vesivesiule Yaubada Tamada wagaine yada Kauveya Yeisu Keliso anayeganeya.[q]

21 Imiyavo wa yami matauta Keliso wavemoimoinena, e ada imi seyana seyana tubuiyamiyavo bonadi wana noganogalidi.

22 Imi vevine naginagimiyavo ani anafaiweya bademowa wasemi amiToveimeya Yeisu yana veimeya dibune, kaduwe anafaiweya moganemiyavo yadi veimeya dibune wanamiya kenuwana.[r] 23 Faina Keliso ani ekalesiya debaina anafaiweya, kaliva ani vavinena debaina.[s] Ekalesiya ani Keliso vovona, ada Keliso Banae vovo anaTokibababala. 24 Ide Keliso yana ekalesiya ada taudeyavo kaseda yana veimeya dibune ke yana nuwanuwa kagugugaiyedi anafaiweya, imi vevine naginagi kaduwe gilubodami taumiyavo wadasemi moganemiyavo yadi veimeya dibudiya, ada gavana ina veimeya ani wana matawalewaleyedi.

25 E aku imi kaliva naginagimiyavo ani ganavona wagaimiya. Keliso ide yana yoo ginuwakabubuyeda ada Tauna yawaina giawaegena faideya, ada kadu anafaiweya imiyavo ani wa aseasemi vavinemiyavo wana nuwakabubuyedi.[t] 26 Keliso yawaina giawaegena faideya e ada aseaseda gina kolakoladi yana vona anagufa wagaine,[u] ada taidei anafaiweya gina kiveyegayeganeda ke gina seliyeda Tauna faine.[v] 27 Kaduwe, Tauna giawaegena faideya e ada matatabuda gina aliyeda yana yoo wagaine, e ada ideyavo ani yana ekalesiya iwaka-vagaina gina kiveyegemonida Tauna wagaine. Nuwanuwana ide keke maita wa yada nuwanuwa koyona kana miyami, aku velemoena ide au vetavetabuda ke yegayega-moeda kana miyamiya Banae matane.[w] 28 Taidei anafaiweya imi kaliva faimiya. Taumiyavo vovomi wanuwakabubuyedi anafaiweya, imi kaduwe gilubodami vavinemiyavo wana nuwakabubuyedi.[x] Kai taidei anafaiweya kaliva vavinena ginuwakabubuyedi, aga banae tauna ginuwakabubuyena. 29 Waitana, keke tamo tova kaliva tauna vovona gida awaididiye, aku gina vekavekanina ke gina itaveyabi-dewedewena. Ada taidei anafaiweya Keliso wa yana nuwakabubu yana ekalesiya giitaitaveyabida, 30 faina ide matatabuda vovona anatalai tulina tulina.[y] 31 Anafaiweya gavega tonagi faidiya ani ivetokilumina Buki Tabu wagaine, givona, “Kaliva inana ke tamana gina miyasegedi aku ginanau ada vavinena nodi ina miyaluga ke ina vevovo seyana.” [z] 32 Taidei vona-nai wagaine ani wa ananuwamamala vitana, givonaluvefosau Keliso ke yana yoo faidiya. 33 E aku imi kaduwe ani kaliva seyana seyana taumiyavo wanuwakabubuyemi anafaiweya, gilubodami kaduwe vavinemiyavo wana nuwakabubuyedi. Ada kaduwe imi vevine naginagi seyana seyana ani gilubodami moganemiyavo wana vemoimoinedi velemoena.

<- Efeso 4Efeso 6 ->