1 Tubuiyakuweyavo, yami tolidadana seyana ani kadu gana fatana, tainei kevakeva ivevebolavoiyedi yaubada fwayafwaya wagaidiya faina. Kaalamanena vaita moyaida wa yada alamana taidei gaitoma-nai faine. Aku kai ide nuwainagedeya kavona, “Iya kaliva alaalamaniku,” aga tainei nuwanuwa-nai gina nagoyeda ke taudeyavo kana kikilakaida. Ada gaito taide nuwanuwa-nai gina leme? Keke tamo. Aku kai tubuiyadeyavo kanuwakabubuyedi, aga kana lemelemedi ada kanavona asevatudi e ada ina mididi toyogina. 2 Kai tamo gaito nuwainagene givona, “Iya alamaniku,” aga gavana gilubodana gina alamanena ani aimo keke gida alamane. 3 Aku gaito ginuwakabubuyena Yaubada ani bana faine Yaubada givonaga, “Banae ani Iya yaku kaliva, ada banae gaalamanena.” [a]

4 E aku tayuwe kevakeva-dina ivevebolavoiyedi yaubada fwayafwaya wagaidiya, ani gavaiyamu kadadewa faidiya? Tayuwe kevakeva-nai kada kanina? Ide kaalamanena yaubada fwayafwaya ani keke velemoena Yaubada. Faina Yaubada anakaibe-mowa velemoena, ada keke tamo kaduwe. 5 Aku kaliva moyaidi ivetumagana ke ivona, “Wada yaubada moyaidi ke kauveya moyaidi imiyamiya gabameya kaduwe babiya.” Taidei vona velemoena 6 aku ideyavo ani kaalamanena Yaubada seya-moena, Banae Tamada. Bana gaitoma matatabuna vuvudi, ada Banae faine ide kamiyamiya.[b] Ada kaduwe kaalamanena vaita Kauveya anakaibe-mowa ani Yeisu Keliso, ada Banae wagaine Yaubada gaitoma matatabuna gibubudi,[c] ada Banae wagaine ide kamiyamiya.

7 Aku taidei gaitoma-dina faidiya ani kaliva tufodi keke wa yadi alamana, e ada yadi vetumagana aimo keke toyogina. Faina tova tuwaina malamala bademowa gavaiyei wagaidiya ada gielai malinai, ani badiyavo wa yadi matauta yaubada fwayafwaya wagaidiya ioduodu, ada tova ke tova kevakeva-dina ivevebolavoiyedi wagaidiya ani ikanikanidi. E ada malinai inuwanuwa vaita kai vebolavoi kevakevana ina kanina, aga nuwafoudiya ina lutovonina vaita bwanebwanenedi ada Yaubada gina itavenuvenuwadadanedi vaita badi wa yadi koyona. 8 Aku gava aa o kai gava kevakeva kana kanina, ani keke faine Yaubada gida awaveiwakaneda. Kai aa seyana keke kanakani, aga Yaubada keke gida nuwenuweda vaita ide kakoyona. Ada kai taine aa-nai kana kanina, aga Yaubada keke gida nuwenuweda vaita ide yegayegadeyavo.

9 E ada bademowa waalamanena vaita kevakeva-dina ivebolavoiyedi yaubada fwayafwaya wagaidiya, ani adikani faina keke tamo awata gida miyami, e ada amifaiweya wanakani. Aku wana itaveyabimi aenanai amiawaega wana vegugaiyena ke kevakeva-nai wana kanina, aku badi kaliva-dina aimo keke ida vetumagana ida kanina ani vaita kabala lakaina wasena yadi wai wagaine e ada ina madubeu wagaine. 10 Imi waalamane-yabuna gaitoma-dina faidiya ani kai wanaluku yaubada fwayafwaya anamanuwa anaebaoduodu wagaine wana kanikani, aku tovetumagana seyana gina itami, banae ani kevakeva-nai anakani faina nuwafoune gina lutovonina ada ginavona, “Tainei kevakeva-nai anakani awaawatana, aku taumada tubuiyakuweyavo ikanikani faina, Iya kaduwe ganakani.” Gavaiyamu, kai wanuwanuwa vaita yami kani wagaine tubuiyami yana vetumagana wana kivetubugina? Keke, keke-mowa. 11 Aku imi yami alamana-nai wagaine, banae kaliva-nai yana vetumagana keke toyogina ani wakivekoyona, banae tubuiyami-nai ani Keliso gialika faine.[d] 12 Tubuiyamiyavo yadi vetumagana keke toyogina ani kai taide anafaiweya wanadewa matadiya ke inakani, aga adilutovona nuwafoudiya ani vaita taudiyavo idewa koyona, e ada taide yami dewa-nai wagaine wakoyona wagaidiya. Ada keke badiyavo gagana wagaidiya wada koyona aku Keliso wagaine wakoyona,[e] faina badi Keliso yana kalivayavo. 13 Taidei faina kai gava aa o kai gava kevakeva gana kanina e ada tovetumagana gina itayaudi wagaikuya ada banae kaduwe gina kanina, aga tauku gana awataku. Keke seyana tova kaduwe aa-nai o kai kevakeva-nai ganakani aenanai tubuiyaku gana vebeuna ada gina koyona.[f]

<- 1 Kolinita 71 Kolinita 9 ->