ZIA YÃ 16

Luda pↄfɛ̃ pitana andunazi

1 Ben ma kòto gbãaa mà bↄna Luda kpɛ́n, à bè malaika gↄ̃ↄn swɛɛplaaa pìnↄnɛ: À gá à Luda pↄfɛ̃ kɛ̀ kú zubↄ mɛ̀n swɛɛplaaa pìnↄ guu ɛɛ andunaa. 2 À káakudee gàa à a zubↄ ɛ̀ɛ andunaa. Ben bↄ̀gĩi zaa pãsĩnↄ bↄ̀ gbɛ̃ kɛ̀ aↄ̃ↄ nↄ̀bↄ pãsĩ sèeda vĩ, kɛ̀ aↄ̃è dↄnzi kɛ à takanɛnↄa.

3 À plaadee a zubↄ ɛ̀ɛ ísiaaa. Ben ísia'i gↄ̃̀ lán gɛ̀ aru bà, pↄ́ bɛ̃ɛ kɛ̀ aↄ̃ↄ kú à guunↄ gàga píngi.

4 À aagↄ̃dee a zubↄ ɛ̀ɛ swaanↄ kↄ̃n bianↄa, ben í pìnↄ lì aru ũ. 5 Ben má mà malaika kɛ̀ í iko vĩi bè:

Kuadonade, mmↄn kɛ̀ ń kuu yãa,

bensↄ̃ ń kuu kↄ̃n a tiaao,

n yãkpaɛ kɛ̀ńyo a zɛ́amɛ.

6 Aↄ̃ n gbɛ̃nↄ kↄ̃n n annabinↄ aru kwɛ̀ɛ,

ben n aru kpàḿma aↄ̃ↄ mì.

À kↄ̃ sìńyo lɛ.

7 Ben ma kòto mà bↄna sa'okiia à bè:

Lɛmɛ, Dii Luda Gbãapingide,

n yãkpaɛ kɛ̀ńyo a zɛ́amɛ,

bensↄ̃ ń yãpuraa vĩ.

8 À siigↄ̃dee a zubↄ ɛ̀ɛ ↄfãntɛ̃a, à tò à tɛ́ gbɛ̃nteenↄ kpàta. 9 À puusu gbãaa ń pá, ben aↄ̃ Luda kɛ̀ kisia beeenↄ iko vĩ tↄ́ zaaa sì. Aↄ̃ↄe nↄ̀sɛ liɛ wà bɛ̀ɛ línɛro.

10 À sↄↄrodee a zubↄ ɛ̀ɛ nↄ̀bↄ pãsĩ kíblekitaa, ben gusiaa dà à kpatala. Gbɛ̃nↄↄ e ń lɛ́ yãakↄ̃tɛ wãwãa guu, 11 ben aↄ̃ Luda Musude tↄ́ zaaa sì aↄ̃ wãwã kↄ̃n ń bↄ̀gĩio yãnzi. Aↄ̃ↄe nↄ̀sɛ liɛ wà kpɛɛ lì ń yãkɛnanↄnɛro.

12 À swɛɛdodee a zubↄ ɛ̀ɛ swadaa kɛ̀ wè be Yuflatia, ben swaa pì í bàba, ben zɛ́ bↄ̀ ↄfãntɛ̃bↄɛ kpa kínanↄnɛ. 13 Ben ma zĩnnↄ è mɛ̀n aagↄ̃ lán blↄ̀nↄ bà aↄ̃ↄe bↄↄ kwã kↄ̃n nↄ̀bↄ pãsĩo kↄ̃n annabi ɛgɛɛo lɛ́n. 14 Zĩn dabuyãkɛrinↄmɛ. Aↄ̃ↄe gaa anduna píngi kínanↄ kiia, lɛ wà ń kakↄ̃a aↄ̃ zĩ̀ ká Luda Gbãapingide gurↄ bíta zĩ yãnzi. 15 À ma! Mɛ́ mↄ́ lán kpãi bàmɛ. Aubarikadeen gbɛ̃ kɛ̀ a wɛ́ɛ gↄ̃ dↄↄ ũ, à a pↄ́kãsãanↄ dana, lɛ àton bↄ bũu wà à bũukɛɛ ero yãnzi. 16 Ben zĩn pìnↄ kína pìnↄ kàkↄ̃a guu kɛ̀ wè be kↄ̃n Eberu yão Amagɛdↄ̃.

17 À swɛɛplaadee a zubↄ ɛ̀ɛ ĩaa. Ben kòto gbãaa bↄ̀ kìta kiia Luda kpɛ́n à bè: À kɛ̀n gwe. 18 Lou e pii, èe vĩi èe pũtãa. Tↄↄtɛ nìgãnigã pãsĩpãsĩ. Zaa lán wà gbɛ̃ntee kàɛ tↄↄtɛ nà, à taka borii e kɛ zikiro, à pãsĩ kɛ̀ bíta. 19 Wɛ́tɛda tↄ́dee kpàatɛkↄ̃rɛ lɛo aagↄ̃, ben bori píngi wɛ́tɛdaanↄ gbòro. Wɛ́tɛda tↄ́de Babilↄnu yã dↄ̀ Ludan, ben à a pↄfɛ̃ pãsĩ wɛ̃ togoo kpàa à mì. 20 Ísia luannↄ gɛ̃̀ zɛ́la píngi, wèe wɛ́ɛ si kpiiinↄlɛ dↄro. 21 Lougbɛ bítanↄ bↄ̀ ludambɛ, aↄ̃ kà kiloo baplaa. Aↄ̃ sìsi gbɛ̃nteenↄa, ben aↄ̃ Luda tↄ́ zaaa sì lougbɛ kisiadee pì yãnzi, zaakɛ kisia pì pãsĩ maamaa.

<- ZIA YÃ 15 ZIA YÃ 17 ->