65
Bori píngi wɛ́ɛ dↄ Ludazi
Dauda lɛ̀.
1 Luda, à kↄ̃ sìo wà n táaki lɛ́ Zayↄn,
wà lù kɛ̀ wà sɛ̀nnɛɛnↄ fĩa bo.
2 Mmↄn kɛ̀ nɛɛ̀ aduakɛna ma,
n kiian bori píngi é sun.
3 Wa yã zaaanↄ wa fu,
ben n wa taarinↄ kɛ̃̀we.
4 Aubarikadeen gbɛ̃ kɛ̀ ń sɛ̀ n gɛ̃o n ua ũ.
N kpɛ́ pↄ́ maaanↄ mↄ̀wa,
n kpɛ́ kɛ̀ kú adona pì.
5 Nɛɛ̀ wewala kↄ̃n yã maa naasideenↄ, Luda wa Mìsiri.
Andunalɛzɛkideenↄ kↄ̃n ísiabaadeenↄ wɛ́ɛ dↄnzi ń píngi.
6 N gbãaa dànla,
n kpiiinↄ kɛ̀ kↄ̃n n ikoo.
7 Nɛɛ̀ ísia kↄ̃n a sↄ̃nↄ kĩi kpáɛ,
nɛɛ̀ boriinↄ zↄka yãańnɛ.
8 N dabuyãnↄ è swɛ̃̀ kɛ̃
gbɛ̃ kɛ̀ aↄ̃ↄ kú zaa tↄↄtɛlɛanↄn,
wè guda dↄmma zaa ↄfãntɛ̃bↄɛ kpa
kↄ̃n a gɛ̃kpɛn kpaao.
9 Nɛɛ̀ làakari dↄ andunaa, nɛɛ̀ à gba í,
nɛɛ̀ taaki ká tↄↄtɛnɛ, n swaanↄↄ pa kↄ̃n ío,
nɛɛ̀ tó blɛwɛɛ kɛ, zaakɛ lɛn ń dìɛ lɛ.
10 Nɛɛ̀ í dagula ai búgbarunↄ pa,
nɛɛ̀ guunↄ foo fↄ̃ kↄ̃n louo,
nɛɛ̀ aubarika da pↄ́ kɛ̀ bↄ̀ɛnↄn.
11 Nɛɛ̀ aubarika da burazĩin wɛ̃̀ kↄ̃n wɛ̃̀o,
blɛ nↄ́sidee è kwɛ́ɛ n tuuban.
12 Pↄ́dãdãkiinↄ sɛ̃̀ lá bↄ̀rↄ kù sɛ̃̀tɛ,
sĩ̀sĩnↄ pↄnnaa dà uta ũ.
13 Pↄ́kãdeenↄ dàgula ń dãdãkiinↄa,
blɛwɛɛ dàgula sĩ̀sĩgɛɛzi.