18
Zĩ̀blena sáabu
(2Sa 22:1-51)
Lɛ̀ kɛ̀ Dii zↄ̀bleri Dauda sìnɛ gurↄↄ kɛ̀ à à bↄ̀ Solu kↄ̃n a ibɛɛ kpaaanↄo ↄzĩ.
1 Má yenzi Dii, ḿbe ma gbãaa ũ.
2 Diin ma gbɛ̀si ũ kↄ̃n ma zɛki gbãaao,
ma mìsirimɛ.
Ma Ludan ma gbɛ̀si ũ, mɛɛ̀ nazi.
Àmbe ma sɛngbango ũ,
ma mìsiri gbãa kↄ̃n ma gulezĩo.
3 Dii kà wà à sáabu kpá.
Mɛɛ̀ à sísi, è ma bↄ ma ibɛɛnↄ ↄzĩ.
4 Góro'itɛ vlɛ̃̀ɛmao,
ísↄ̃ kɛ̀ è ń kaatɛ e ma blee.
5 Mira bànↄ lìgamazi,
gaa takutɛɛ kpàkpamɛ ma aɛ.
6 Kɛ̀ má kú nawɛ̃a guu, ma Dii sìsi,
ma wii pɛ̀ ma Ludazi,
ben à ma kòto mà zaa a bɛ,
ma wiii kà à kiia, à gɛ̃̀ à swãn.
7 Tↄↄtɛ lùgaluga à nìgãnigã,
kpiiinↄ dègedege ai ń kãsãan.
Aↄ̃ lùgaluga kɛ̀ à pↄ fɛ̃̀ yãnzi.
8 Tɛ́sukpɛ bↄ̀ à yĩzĩ,
tɛ́ kɛ̀ è ń kpata bↄ̀ à lɛ́n,
à yↄ̃̀nↄↄ e tɛ́ kɛɛ à aɛ.
9 À musu wɛ̃̀ à pìta,
lou sìsi à gbá gĩzĩ.
10 Èe vĩaa dina kɛrubu kpɛɛ,
èe yàa paa ĩala.
11 À gusiaa dà a zĩndala,
ludambɛ sia kũ à kúkiila.
12 Zaa à gakui tɛ́kɛna guu lou e sisii,
lougbɛ e kwɛɛ, lou e pii pãsĩpãsĩ.
13 Dii pàta zaa musu,
Luda Musude kòto dↄ lapatana ũ.
14 À kà fã̀ ma ibɛɛnↄa à ń fãakↄ̃a,
à tò lou pìḿma à pɛ̀ḿma.
15 Kɛ̀ n pataḿma, Dii,
kɛ̀ n pↄ́ bↄ̀ n yĩzĩ,
ísiaa tↄↄtɛ bↄ̀ gupuraaa,
anduna kãsãa gↄ̃̀ kaɛna pↄ̃tɛ̃.
16 À ↄ bↄ̀ zaa musu à ma kũ,
à ma bↄ swadaa guu.
17 À ma si ma ibɛɛ gbãaa ↄzĩ
kↄ̃n ma zanguri kɛ̀ aↄ̃ gbãaa dɛmalaanↄ.
18 Aↄ̃ lɛ̀ɛma ma mↄ́nzikɛgurↄ,
mↄde Dii zɛ̀mao.
19 À ma bↄ à ma gba mɛ̀porokii,
à ma mì sì kɛ̀ à yemazi yãnzi.
20 Dii yã kɛ̀mɛ ma nↄ̀sɛ maa lɛ́n,
à fĩa bòmɛ ma gbãsĩsaikɛ lɛ́n.
21 Zaakɛ má Luda yãdiɛnanↄ kũna,
mɛ́ɛ à zaaa kɛ ma a Luda tònlo.
22 À dokayãnↄ ègↄ̃ dↄↄmɛ aɛ píngi,
mɛ́ɛ kpɛɛ li yã kɛ̀ à dìɛnↄnɛro.
23 Ma kuuna taari vĩ Diinɛro,
má a zĩnda kũna durun sai.
24 Dii fĩa bòmɛ ma nↄ̀sɛ maa lɛ́n,
zaakɛ à è má kuu gbãsĩ sai.
25 Náanɛdeen n ũ náanɛdeenↄnɛ,
taarisaideen n ũ taarisaideenↄnɛ.
26 Ń wásawasa gbɛ̃ wásawasanↄnɛ,
mↄde nɛɛ̀ íbɛtɛ kpá kↄ̃n gbɛ̃ dↄ̀rↄsaideenↄo.
27 Nɛɛ̀ zĩndabusarinↄ mì sí,
nɛɛ̀ gbɛ̃ kɛ̀ aↄ̃è ń zĩnda sɛ́ lezĩnↄ sↄ̃ɛ.
28 Dii, nɛɛ̀ ma fitia tɛ́ tó nana,
ma Luda, nɛɛ̀ ma gusiaa liɛ gupuraa ũ.
29 Kↄ̃n n gbãaao mɛ́ fↄ̃ mà kù kpá karaa,
ma Luda gãzĩ mɛ́ fↄ̃ mà vĩ gũ̀la.
30 Luda kɛ̀kii sↄ̃ yãkɛna bↄɛzina,
Dii yã see vĩro, à wásawasa,
à dɛ sɛngbango ũ gbɛ̃ kɛ̀ aↄ̃ nàzinↄnɛ.
31 Dii baasiro, dén Luda ũu?
Wa Luda baasiro, dén gbɛ̀si ũu?
32 Luda bé è ma gba gbãaa,
àmbe è zɛ́ poromɛ súusu.
33 È tó ma gbá kãi gↄ̃ nna lán zↄ̃ pↄ́ bà,
è tó màgↄ̃ táa oo gulezĩnↄ musu.
34 È zĩ̀kana dadamɛ
ai ma gã̀sã fↄ̃ à mↄ̀gotɛ̃ sá gá.
35 Nɛɛ̀ n zĩ̀blesɛngbango kpáma,
ń ma kũna kↄ̃n n ↄplaao,
nɛɛ̀ naɛ ǹ ma tↄ́ bↄ.
36 Nɛɛ̀ ma zɛ́ yàasa kũmɛ
lɛ ma gbá tón sataro.
37 Ma pɛɛ ma ibɛɛnↄzi ma ń kũkũ,
mɛ́ɛ ɛara ma suro, sé kɛ̀ ma gaa ma ń dɛdɛ.
38 Ma ń wíwi, aↄ̃ↄe fↄ̃ wà fɛ̀ɛ dↄro,
aↄ̃ lɛ̀ɛ wà gↄ̃̀ kaɛna ma gbá gĩzĩ.
39 N ma gba gbãaa ma zĩ̀ kào,
ń tò ma ibɛɛnↄ mì nàɛmɛ.
40 Ń tò ma zangurinↄ kpɛɛ lì,
ben ma a ibɛɛ pìnↄ kàatɛ.
41 Aↄ̃ wii lɛ̀, gbɛ̃kee e ń mì síro,
aↄ̃ lɛ́ zù Diizi, èe weńlaro.
42 Ma ń kɛ́ tíkɛtikɛ lán bùsuti kɛ̀ ĩa sɛ̀ɛ bà,
ma táa òḿma lán zɛ́ guu bↄtↄnga bà.
43 N ma bↄ gbɛ̃ kɛ̀ aↄ̃ fɛ̀ɛmaziinↄ ↄzĩ,
n ma kɛ boriinↄ mìdee ũ.
Borii kɛ̀ má ń dↄ̃roonↄ è zↄ̀ blemɛ,
44 bori zĩ̀tↄnↄ è na ń sàsaa ma aɛ.
Tó aↄ̃ ma yã mà, aↄ̃è mì siɛmɛ.
45 Aↄ̃ kã è ga,
aↄ̃è bↄ ń zɛki gbãaanↄn kↄ̃n luganao.
46 Dii kuu! Aubarikadeen ma gbɛ̀si ũ!
Wà Luda ma mìsiri tↄ́ bↄ.
47 Luda bé è gɛ̃ɛ bomɛ,
è tó boriinↄ mì siɛmɛ,
48 è tò mà piti ma ibɛɛnↄn.
N ma gba gbãaa dɛ ma zangurinↄla,
n ma bↄ gbɛ̃ pãsĩnↄ ↄzĩ.
49 Beee yãnzi mɛ́ n sáabu kpá boriinↄ tɛ́,
mɛ́ n tↄ́ kpá, Dii.
50 Dii è zĩ̀ bíta ble kína kɛ̀ à à sɛ̀nɛ,
è gbɛ̃kɛɛ kɛ kína kɛ̀ à à kànɛ,
mamↄma Dauda kↄ̃n ma boriinↄo