NARONA 23

Balamu yã káaku kɛ̀ à è ona

1 Balamu bè Balakinɛ: Ǹ gbãgbãkii bomɛ kɛ̀ mɛ̀n swɛɛplaa, ǹ mↄ́mɛ kↄ̃n zùswareenↄ mɛ̀n swɛɛplaa kↄ̃n sãkaronↄ mɛ̀n swɛɛplaa. 2 Balaki kɛ̀ lán Balamu ònɛ nà, ben aↄ̃ saa ò kↄ̃n zùswareeo kↄ̃n sãkaroo gbãgbãkii pìnↄa píngi. 3 Ben Balamu bènɛ: Ǹ zɛ n sa'opↄzi. Mɛ́ gá mà gwa tó Dii é mↄ́ yã omɛ, mɛ́ yã kɛ̀ eé omɛɛ onnɛ. Ben à gàa à zɛ̀ gu lezĩ gbáagbaaa. 4 Luda mↄ̀ à à lè, ben Balamu bènɛ: Ma gbãgbãkii bò mɛ̀n swɛɛplaa, ben ma saa òḿma píngi kↄ̃n zùswareeo kↄ̃n sãkaroo. 5 Dii yã dànɛ à lɛ́n, ben à bè: Ǹ ɛara ǹ gá ǹ Balaki le ǹ onɛ lán má dànnɛ nà. 6 Ben à ɛ̀ara à gàa à à lè zɛna a sa'opↄzi kↄ̃n Mↄabu kínɛnↄ ń píngi, 7 ben à yã kɛ̀ à è ò à bè:

Mↄabunↄ kí Balaki ma sisi Siria bùsun,

ben ma bↄ ↄfãntɛ̃bↄɛ kpa kpiiinↄ kiia ma mↄ.

À bè mà bↄare Isarailinↄ kpɛɛ,

mà mↄ́ mà sa zaaa oare Yakubu borii pìnↄnɛ.

8 Mɛ́ kɛ dia mà gbɛ̃ kɛ̀ Luda e ń károonↄ káa?

Mɛ́ kɛ dia mà bↄ gbɛ̃ kɛ̀ Dii e bↄ ń kpɛɛroonↄ kpɛɛɛ?

9 Zaa kpii mìsↄ̃ntɛ̃an mɛ́ɛ ń ee,

zaa gulezĩan mɛ́ɛ wɛ́ɛ siińlɛ.

Gbɛ̃ pìnↄↄ kú ńdona,

aↄ̃ ń zĩnda dìɛ ńdona kↄ̃n bori pãndenↄ.

10 Yakubu boriinↄↄ pari lán bùsu'ãatɛ̃ bà,

weé fↄ̃ wà Isarailinↄ naro wà ń lɛ́ dↄ̃ro.

Luda tó ma gaa gↄ̃ dɛ lán a gbɛ̃nↄ pↄ́ bà,

ma yãana gↄ̃ dɛ lán ń pↄ́ bà.

11 Ben Balaki bènɛ: Ń kɛ̀mɛ dian gwee? Ma mↄnyo lɛ ǹ ma ibɛɛnↄ kámɛ, ben sa maaan ń òńnɛↄ́? 12 À wèàla à bè: Yã kɛ̀ Dii dàmɛ ma lɛ́nn mɛ́ oroo?

Balamu yã plaadee kɛ̀ à è ona

13 Balaki bènɛ: Ǹ mↄ́ wà gá gu pãndea, guu kɛ̀ nɛ́ ń en. Ǹ ń kámɛ gwe, zaakɛ aↄ̃ kpadoon nɛ́ e, nɛ́ ń e ń píngiro. 14 Ben à gàao gudãkparinↄ guun Pisiga kpii mìsↄ̃ntɛ̃a. À gbãgbãkii bò gwe mɛ̀n swɛɛplaa, ben à saa òḿma píngi kↄ̃n zùswareeo kↄ̃n sãkaroo. 15 Ben Balamu bènɛ: Ǹ zɛ n sa'opↄzi kɛ̀, mɛ́ gá mà à le gwe. 16 Ben Dii mↄ̀ à yã dànɛ à lɛ́n, ben à bènɛ: Ǹ ɛara ǹ gá ǹ Balaki le ǹ onɛ lán má dànnɛ nà. 17 Ben à ɛ̀ara à gàa à à lè zɛna a sa'opↄzi kↄ̃n Mↄabu kínɛnↄo. Balaki à là à bè: Dii bè diamɛ? 18 Ben à yã kɛ̀ à è ò à bè:

Zipo nɛ́ Balaki,

ǹ swã kpá ǹ ma yã ma!

19 Luda nɛ́ gbɛ̃nteenlo gbasa à ɛgɛɛ to,

è nↄ̀sɛ liɛ lán busãnsi bàro.

Eé gí yã kɛ̀ à ò kɛziↄ́?

Eé gí lɛ́ kɛ̀ à gbɛ̃̀ńnɛ papaziↄ́?

20 À bèmɛ mà sa maaa ońnɛmɛ.

À aubarika dàńgu, mɛ́ fↄ̃ mà gíro.

21 Mɛ́ɛ yã zaa ke e Yakubu boriinↄaro,

mɛ́ɛ yã'ↄ̃amma ke e Isarailinↄaro.

Dii ń Ludaa kúńyo,

aↄ̃è à kíkɛ tↄ́ bↄ ń tɛ́.

22 Luda ń bↄ́ɛ Igipiti,

aↄ̃ gbãaa vĩ lán zùsɛ̃tɛ bà.

23 Weé fↄ̃ wà pↄ́ da Yakubu boriinↄaro,

weé fↄ̃ wà àisi zaaa kpá Isarailinↄziro.

Zaa gbã̀a weégae o ń yã musu,

kɛ̀ yã kɛ̀ Ludaa kɛ̀n gwe.

24 Borii pì è fɛɛ lán músudaa bà,

è a zĩnda sɛ́ lán musukya bà.

È daɛro ai à gá pↄ́ kũ à só,

ai à gá pↄ́ kɛ̀ à dɛ̀nↄ aru mio.

25 Balaki bènɛ: Ǹton ń káro. Ǹton sa maaa ońnɛ sero. 26 Balamu bènɛ: Mɛ́ɛ onnɛ kɛ̀ yã kɛ̀ Dii dàmɛɛn mɛ́ oroo?

Balamu yã aagↄ̃dee kɛ̀ à è ona

27 Balaki bè Balamunɛ: Ǹ mↄ́ sa, mɛ́ gányo gu pãndea. Wègↄ̃ dↄ̃ro tó eé kɛ Ludanɛ ǹ gbɛ̃ pìnↄ kámɛ gwe sa. 28 Ben Balaki gàao Peo kpiii musu kɛ̀ aɛ dↄ gbáaa. 29 Balamu bènɛ: Ǹ gbãgbãkii bomɛ kɛ̀ mɛ̀n swɛɛplaa, ǹ mↄ́mɛ kↄ̃n zùswareenↄ mɛ̀n swɛɛplaa kↄ̃n sãkaronↄ mɛ̀n swɛɛplaa. 30 Balaki kɛ̀ lán à ònɛ nà à saa òḿma kↄ̃n zùswaree pìnↄ kↄ̃n sãkaro pìnↄo.

<- NARONA 22 NARONA 24 ->