NARONA 20

Í bↄna gbɛ̀n

(Bↄn 17:1-7)

1 Isarailinↄ kà Zini gbáan ń píngi mↄ káaku guu, ben aↄ̃ vɛ̃̀ɛ Kadɛsi. Gwen Miriamu gàn, wà à vĩ̀i. 2 Í kuu wà miro, ben aↄ̃ kàkↄ̃a Musa kↄ̃n Arunaozi. 3 Aↄ̃ zↄka kà Musazi wà bè: Tó wa gaga yã kↄ̃n gbɛ̃ kɛ̀ aↄ̃ gàga Dii aɛnↄ, lɛ beee sã̀ↄ. 4 Bↄ́yãnzi a mↄwao gbáa kɛ̀kiin lɛ wà gaga kɛ̀ kↄ̃n wa pↄ́kãdeenↄozi? 5 Bↄ́yãnzi a bↄɛwao Igipiti a mↄwao gu zaaa kɛ̀ guuzi? Pↄ́wɛɛ ke kãkã lí ke geepi bɛɛ ke biisioo kú kɛ̀ro, bensↄ̃ í kú kɛ̀ wà miro. 6 Musa kↄ̃n Arunao parii tò aↄ̃ gàa dakↄ̃rɛki kpɛɛlɛa aↄ̃ dàɛ ń puua, ben Dii gakui bↄ̀ à mↄ̀ńzi. 7 Dii yã ò Musanɛ à bè: 8 Ǹ gò sɛ́, mpi kↄ̃n n vĩ̀i Arunao à gbɛ̃ pìnↄ kakↄ̃a à yã o gbɛ̀si kɛ̀kãanɛ ń wáa, í é bↄn. Lɛn nɛ́ í bↄńnɛ gbɛ̀ pìn aↄ̃ mi lɛ kↄ̃n ń pↄ́kãdeenↄ.

9 Musa gò sɛ̀ Dii aɛzĩ lán à ònɛ nà. 10 Musa kↄ̃n Arunao ń kákↄ̃a gbɛ̀si pì aɛ, ben à bèńnɛ: À ma a swãgbãadeenↄ! Á yezi wà í bↄare gbɛ̀ kɛ̀kii guun yↄ́? 11 Ben Musa ↄↄ sɛ̀ musu à gbɛ̀ pì lɛ̀ kↄ̃n a gòo gɛ̃̀n plaa. Í bↄ̀ maamaa, ben aↄ̃ mì kↄ̃n ń pↄ́kãdeenↄ. 12 Ben Dii bè Musanɛ kↄ̃n Arunao: Zaakɛ ée ma náanɛ kɛ a ma tↄ́ bↄ̀ Isarailinↄnɛro, é gɛ̃ńyo bùsu kɛ̀ mɛ́ɛ kpaaḿmanlo. 13 Mɛriba íbↄkiin gwe, guu kɛ̀ Isarailinↄ zↄka kàn Diizi, ben à a ludakɛɛ ↄ̀dↄańnɛ.

Ɛdↄmunↄ gina Isarailinↄnɛ aↄ̃ bↄɛ kↄ̃n ń bùsuo

14 Musa gbɛ̃nↄ zĩ̀ aↄ̃ bↄ̀ Kadɛsi wà gàa Ɛdↄmunↄ kína kiia aↄ̃ bè: Wamↄwa n danɛ Isarailinↄ bè, ń nawɛ̃a kɛ̀ à wa leenↄ dↄ̃ píngi. 15 Wa dezinↄ gàa Igipiti, ben wa gì kɛ̀ gwe. Igipitinↄ ĩa dàwa kↄ̃n wa dezinↄ. 16 Wa wii pɛ̀ Diizi, ben à yã sìwao. À a Malaika zĩ̀ à bↄ̀wao Igipiti. Tia sa wá kú Kadɛsi, n bùsu lɛ́zɛkiia. 17 Ǹ wa gba zɛ́ wà bↄɛ kↄ̃n n bùsuo. Wé gɛ̃ buraanↄ ke geepi búnↄnlo, wé a lↄ̀gↄ'i miro. Wégↄ̃ tɛ́ kína zɛ́daa guumɛ. Wé liɛ ↄplazi ke ↄzɛziro ai wà gá gɛ̃tɛo n bùsula. 18 Ben Ɛdↄmunↄ bèńnɛ: É e à bↄɛ kↄ̃n wa bùsuoro. Tó a gi, wé bↄ wà daalɛ kↄ̃n fɛ̃ɛdaao. 19 Isarailinↄ bèńnɛ: Wé bↄɛ kↄ̃n zɛ́daaomɛ. Tó wapinↄ ke wa pↄ́kãdeenↄ a í mì, wé à fĩa bo. Wá yezi wà bↄɛmmɛ pã. 20 Ɛdↄmunↄ bè: É e à gɛ̃ro. Ben aↄ̃ zĩ̀karinↄ bↄ̀ɛ paripari aↄ̃ mↄ̀ dańlɛ kↄ̃n gbãaao. 21 Zaakɛ Ɛdↄmunↄ gì Isarailinↄnɛ aↄ̃ gɛ̃ kↄ̃n ń bùsuo, ben Isarailinↄ pã̀ńnɛ.

Aruna gana

22 Isarailinↄ bↄ̀ Kadɛsi ń píngi aↄ̃ kà Oru kpii kiia 23 Ɛdↄmunↄ bùsu lɛ́zɛkiia. Gwen Dii yã òn Musanɛ kↄ̃n Arunao à bè: 24 Aruna é ká a dezinↄla tia, eé gɛ̃ bùsu kɛ̀ mɛ́ɛ Isarailinↄ gbaa guuro, kɛ̀ a gↄ̃ↄn plaaa a gi ma yã mazi zaa Mɛriba yãnzi. 25 Ǹ Aruna kↄ̃n a nɛ́ Ɛlɛazao sɛ́ ǹ didińyo Oru kpiiia 26 ǹ Aruna pↄ́kãsãanↄ bↄɛa ǹ da à nɛ́ Ɛlɛazanɛ gwe. Gwen Aruna é gan à ká a dezinↄla.

27 Musa kɛ̀ lán Dii ònɛ nà. À dìdi Oru kpiiia gbɛ̃nↄ wáa píngi 28 à Aruna pↄ́kãsãanↄ bↄ̀ɛa à dà à nɛ́ Ɛlɛazanɛ, ben Aruna gà kpiii pì musu gwe. Kɛ̀ Musa kↄ̃n Ɛlɛazao pìta kpiii pìa 29 bensↄ̃ Isarailinↄↄ mà kɛ̀ Aruna gà, ben aↄ̃ à gɛ̀ sósobi kɛ̀ gurↄ baaakuri.

<- NARONA 19 NARONA 21 ->