MAAKU 8

Pↄ́blekpana gↄ̃ↄn bↄrↄ siigↄ̃ↄnↄa

(Mat 15:32-39)

1 Gurↄↄ mↄ̀nↄ guu dↄ gbɛ̃nↄ pàzi pari. Aↄ̃ pↄ́blee vĩ wà blero, ben Yesu a ìbanↄ sìsiazi à bèńnɛ: 2 Gbɛ̃ kɛ̀nↄ kɛ̀mɛ wɛ̃nda, zaakɛ aↄ̃ gĩakɛ wà kúmao gurↄ aagↄ̃, ben aↄ̃ↄ pↄ́ke vĩ wà blero. 3 Tó ma ń gbáɛ aↄ̃ tá bɛ kↄ̃n nↄaao, guu é liḿma zɛ́ guu, zaakɛ ń gbɛ̃kenↄ bↄkii zã̀. 4 Ben à ìbanↄ à là wà bè: Mákpan wé pↄ́blee en sɛ̃̀tɛ pↄ̀rↄtu kɛ̀ kɛ̀ eé gbɛ̃ pìnↄ kãa? 5 Ben Yesu ń lá à bè: Burɛdi mɛ̀n ũgban á vĩi? Aↄ̃ bè: Mɛ̀n swɛɛplaamɛ. 6 Ben à bè parii vɛ̃ɛ tↄↄtɛ. Ben à burɛdi mɛ̀n swɛɛplaaa pìnↄ sɛ̀ à sáabu kɛ̀, ben à lìlikↄ̃rɛ à kpà a ìbanↄa aↄ̃ kpaatɛtɛ pariinɛ, ben aↄ̃ↄ kpàatɛtɛńnɛ. 7 Aↄ̃ↄ kpↄ̀ nɛ́ngonↄ vĩ féte dↄ. Kɛ̀ à aubarika dàn, à bèńnɛ aↄ̃ ɛara wà beee kpaatɛtɛńnɛ dↄ. 8 Ben aↄ̃ↄ blè wà kã̀, ben wà à kpaaa kɛ̀ gↄ̃̀nↄ sɛ̀ɛ gbíi swɛɛplaa. 9 Gbɛ̃ pìnↄ kà bↄrↄ siigↄ̃. Kɛ̀ Yesu ń gbáɛ, 10 ben à gɛ̃̀ góro'itɛ guu kↄ̃n a ìbanↄ, aↄ̃ gàa Dalamanuta bùsun.

Farisinↄ mↄnafiki

(Mat 16:1-12)

11 Ben Farisinↄ mↄ̀ aↄ̃ↄe lɛokpakↄ̃a kɛɛo aↄ̃ↄe lí pɛɛɛa, aↄ̃ↄe wɛtɛɛ à sèeda ke kɛńnɛ kↄ̃n Luda gbãaao. 12 Ben à wesaa kàkↄ̃a à bò à bè: Bↄ́yãnzi tↄ̃ↄrigbɛ̃nↄ è sèeda gbekamazi? Yãpuraan mɛ́ɛ ooare, mɛ́ sèeda ke kɛńnɛro. 13 Ben à ń tó gwe à ɛ̀ara à gɛ̃̀ góro'itɛ guu à tà baa kãa kpa.

14 À ìbanↄ sã̀n aↄ̃ burɛdi kũsãɛ sɛ́. Burɛdi mɛ̀n doo bé à gↄ̃̀ńnɛ góro guu. 15 Ben Yesu lɛ́ dàḿma à bè: Àgↄ̃ a zĩnda kũna dↄ̃. À làakari kɛ Farisinↄ kↄ̃n Hɛrↄdu gbɛ̃nↄ burɛdisɛsɛ'ɛ̃zɛ̃zi. 16 Ben aↄ̃ↄe beekↄ̃nɛ: Kɛ̀ wá burɛdi vĩro yãnzin à ò lɛzi. 17 Yesu dↄ̃̀ḿma, ben à ń lá à bè: Bↄ́yãnzi ée bee kɛ̀ á burɛdi vĩro yãnzimɛzi? Ai tia a wɛ́ɛ e kɛ̃ à dↄ̃roo? Á laasuu vĩroo? 18 Á wɛ́ɛ vĩ à guu eoroo? Á swã vĩ à yã maoroo? Yãke è dↄaguroo? 19 Kɛ̀ ma burɛdi mɛ̀n sↄↄroo lìlikↄ̃rɛ má kpà gↄ̃ↄn bↄrↄ sↄↄroonↄa, a à kpaaa sɛ̀ɛ gbíi ũgbamɛ? Aↄ̃ wèàla wà bè: Mɛ̀n kuri awɛɛplaamɛ. 20 Ben à ɛ̀ara à ń lá à bè: Kɛ̀ ma burɛdi mɛ̀n swɛɛplaaa lìlikↄ̃rɛ má kpà gↄ̃ↄn bↄrↄ siigↄ̃ↄnↄa, a à kusu sɛ̀ɛ gbíin ũgbamɛ? Aↄ̃ wèàla wà bè: Mɛ̀n swɛɛplaa. 21 Ben à bèńnɛ: Ai tia a dↄ̃roo?

Bɛtɛsaida vĩ̀a wɛ́ɛwɛ̃na

22 Kɛ̀ aↄ̃ kà Bɛtɛsaida, ben wà mↄ̀nɛ vĩ̀ao wà wɛ́ɛ kɛ̀a à ↄ kɛa. 23 Ben à vĩ̀a pì kũ̀ a ↄↄa à bↄ̀o wɛ́tɛ kpɛɛ. À lóu sù à wɛ́ɛa à ↄ kɛ̀a, ben à à là à bè: Nɛ́ɛ guu eeↄ́? 24 Ben gↄ̃gbɛ̃ pì a wɛ́ɛ sɛ̀ musu à bè: Mɛ́ɛ gbɛ̃nↄ ee lán línↄ bà aↄ̃ↄe táa oo. 25 Ben Yesu ɛ̀ara à ↄ kɛ̀ à wɛ́ɛa dↄ. Kɛ̀ gↄ̃gbɛ̃ pì wɛ́ɛ kɛ̀ biibii, ben à wɛ́ɛ wɛ̃̀ èe pↄ́ píngi ee sa wásawasa. 26 Ben Yesu à gbàrɛ à tá bɛ à bè: Ǹton bↄɛ lakutu guuro.

Yesu mɛsayakɛ ona

(Mat 16:13-20, Luk 9:18-21)

27 Kɛ̀ Yesu e gaa kↄ̃n a ìbanↄ Sizarea Filipi lakutunↄ guu, ben à a ìbanↄ là zɛ́ guu à bè: Dén gbɛ̃nↄ è be má dɛ à ũu? 28 Aↄ̃ wèàla wà bè: Gbɛ̃kenↄ è be Yaaya Batisikɛrimɛ, gbɛ̃kenↄ è be Ilia, gbɛ̃kenↄ è be dↄ annabi yãanↄ doken n ũ. 29 Ben à ń lá à bè: Apinↄ sↄ̃, dén eè be má dɛ à ũu? Pita wèàla à bè: Mɛsayan n ũ. 30 Ben Yesu ń swã sùkãńnɛ lɛ aↄ̃ton yã pì o gbɛ̃ke maro.

Yesu a ga kↄ̃n a fɛɛnao yã'ona

(Mat 16:21-28, Luk 9:22-27)

31 Ben à nà yãdannɛnaa à bè: Séde Gbɛ̃ntee Nɛ́ wɛ́ɛtãmma e maamaa, gbɛ̃nsinↄ kↄ̃n sa'orikinↄ kↄ̃n ludayãdannɛrinↄ é gízi, weé à dɛ, à gurↄ aagↄ̃dee zĩ eé fɛɛ. 32 À yã pì òńnɛ wásawasa, ben Pita gàao kpado, èe giinɛ. 33 Kɛ̀ Yesu lìɛ à a ìbanↄ gwà, ben à pàta Pitaa à bè: Ǹ gumɛ gwe Setãn! N laasuu nɛ́ Luda pↄ́nlo, gbɛ̃ntee pↄ́mɛ.

34 Beee gbɛra Yesu parii sìsiazi kↄ̃n a ìbanↄ à bèńnɛ: Tó gbɛ̃ yezi à kɛ ma ìba ũ, séde à gí a zĩnda wɛ̃̀ndizi à a líkpansɛ́ à tɛ́omazi. 35 Gbɛ̃ kɛ̀ yezi àgↄ̃ a wɛ̃̀ndi kũna é korazi. Gbɛ̃ kɛ̀ gì a wɛ̃̀ndizi ma yãnzi kↄ̃n ma baaru yão sↄ̃, adee égↄ̃ wɛ̃̀ndi vĩ. 36 Tó gbɛ̃ gↄ̃̀ anduna vĩ píngi, tó à kòra a wɛ̃̀ndizi, bↄ́ àren à vĩi? 37 Bↄ́n gbɛ̃ntee é e à a wɛ̃̀ndi lendee kpáo? 38 Tó gbɛ̃ mapi kↄ̃n ma yãnↄ wí dɛ̀ tↄ̃ↄrigbɛ̃ durunde ludanaanɛkɛrisaideenↄ tɛ́, Gbɛ̃ntee Nɛ́ é adee wí dɛ gurↄↄ kɛ̀ eé su a De gakui guu kↄ̃n à malaikanↄ.

<- MAAKU 7 MAAKU 9 ->