MAAKU 3

1 Yesu ɛ̀ara à gàa aduakɛkpɛn. Gↄ̃gbɛ̃ kee kú gwe à ↄ doo fɛ̃fɛ̃na. 2 Gbɛ̃kenↄ e Yesu tàasi kɛɛ, tó eé à kɛ̃kↄ̃a kámmabogurↄↄ zĩ, lɛ wà yã e wà dia. 3 Ben Yesu bè gbɛ̃ kɛ̀ à ↄↄ fɛ̃fɛ̃na pìnɛ: Ǹ fɛɛ ǹ zɛ zà guu. 4 Ben à ń lá à bè: Kámmabogurↄↄ zĩ à zɛ́ vĩ wà à maaa kɛn yↄ́ↄ, ke à zaaa? Wà gbɛ̃ mì sín yↄ́, ke wà dɛmɛ? Ben aↄ̃ↄe yãke oro. 5 Yesu ń gwá pↄfɛ̃o à lìgazi, zaakɛ à pↄↄ yàka ń swãgbãa yãnzi. Ben à bè gↄ̃gbɛ̃ pìnɛ: Ǹ n ↄↄ pì poro. Kɛ̀ à pòro, ben à ↄↄ pì kɛ̀ a gbɛ̀n. 6 Ben Farisinↄ bↄ̀ɛ wà gàa wà yã gↄ̃gↄ̃ kↄ̃n kí Hɛrↄdu gbɛ̃nↄ gↄ̃ↄ, dian aↄ̃é kɛ nà wà Yesu dɛ.

Pari kↄ̃kakↄ̃aa sɛ̀bɛ lɛ́a

7 Yesu kↄ̃n a ìbanↄ ń zĩnda gàńnɛ gwe, aↄ̃ gàa sɛ̀bɛ lɛ́a. Ben parii bↄ̀ Galili wà tɛ̀zi. 8 Gbɛ̃kenↄ bↄ̀ Yudea dↄ kↄ̃n Yerusalɛmuo kↄ̃n Ɛdↄmunↄ bùsuo kↄ̃n Yoda baa kãa kpaao kↄ̃n Tayao kↄ̃n Sidↄ̃o wà mↄ̀ à kiia paripari, kɛ̀ aↄ̃ yã kɛ̀ èe kɛɛnↄ baaru mà yãnzi. 9 Parii yãnzi Yesu ò a ìbanↄnɛ aↄ̃ góro'itɛ soru kɛare, lɛ wàton nakↄ̃rɛaro yãnzi. 10 Zaakɛ Yesu gbɛ̃nↄ kɛ̃̀kↄ̃a pari, ben gyãreenↄↄ e nakↄ̃rɛɛa pari lɛ wà ↄ kɛa. 11 Zĩndeenↄ sↄ̃, tó aↄ̃ à wɛ́ɛ è, aↄ̃è mↄ́ wà daɛ à aɛmɛ, aↄ̃è wii lɛ́ wà be: Ḿbe Luda Nɛ́ ũ. 12 Ben Yesu è gíńnɛ aↄ̃ o gbɛ̃ kɛ̀ á dɛ à ũ.

Yesu zĩ̀ri gↄ̃ↄn kuri awɛɛplaaanↄ diɛna

(Mat 10:1-4, Luk 6:12-16)

13 Kɛ̀ Yesu dìdi kpiiia, à gbɛ̃ kɛ̀ à yezinↄ sìsiazi, ben aↄ̃ mↄ̀ à kiia. 14 Ben à gↄ̃ↄn kuri awɛɛplaaanↄ dìɛ aↄ̃gↄ̃ kúao, lɛ àgↄ̃ ń zĩ waazi kɛ, 15 aↄ̃gↄ̃ iko vĩ aↄ̃ zĩnnↄ goḿma. À tↄ́ kpàńnɛ zĩ̀rinↄ. 16 Aↄ̃ tↄ́n yɛ̀: Simↄ kɛ̀ à tↄ́ kpànɛ Pita. 17 Zebedi nɛ́ Yemisi kↄ̃n a dãaro Yohanao. À tↄ́ kpàńnɛ Bↄanɛgɛ. Tↄ́ pì bè lapatammarinↄ. 18 Beee gbɛra Anduru, Filipi, Batↄlↄmiu, Matiu, Tomasi, Alafeu nɛ́ Yemisi, Tadeu, Simↄ Aĩade 19 kↄ̃n Yudasi Isikariↄti kɛ̀ bↄ̀ à kpɛɛo.

Zĩngona gbɛ̃nↄa

(Mat 12:22-32, Luk 11:14-23, 12:10)

20 Kɛ̀ Yesu tà bɛ, ben gbɛ̃nↄ ɛ̀ara wà kàkↄ̃a dↄ pari, ben Yesu kↄ̃n a ìbanↄↄ e zɛ́ e wà pↄ́ blè sero. 21 Kɛ̀ à bɛdeenↄ yã pì mà, aↄ̃ dà zɛ́n wà à gbɛsɛ, zaakɛ aↄ̃ↄe bee ĩa kàamɛ.

22 Ludayãdannɛri kɛ̀ aↄ̃ bↄ̀ Yerusalɛmu wà mↄ̀nↄ bè: À Bɛlɛzɛbubu vĩ, zĩnnↄ kína pì gbãaan è zĩn gooḿma. 23 Ben Yesu ń sisiazi à yãlɛkↄ̃zina òńnɛ à bè: Setãn é fↄ̃ à a zĩnda goḿmaↄ́? 24 Tó kpata gbɛ̃nↄ íbɛtɛ kpà kↄ̃o, kpata pì é gì kɛↄ́? 25 Tó uadeenↄ íbɛtɛ kpà kↄ̃o, ua pì é gì kɛↄ́? 26 Tó Setãn íbɛtɛ kpà kↄ̃n a zĩnda gbɛ̃nↄ aↄ̃ kɛ̃̀kↄ̃a, eé gì kɛro, eé mì dɛmɛ. 27 Gbɛ̃ke é fↄ̃ à gɛ̃ gↄ̃sagbãaa kpɛ́n à à pↄ́nↄ sɛ́ɛro, séto à à yì gĩa, gbasa à à kpɛ́ kpokɛ.

28 Yãpuraan mɛ́ɛ ooare, Luda é gbɛ̃nↄ durunnↄ kɛ̃ńnɛ kↄ̃n a tↄ́ zaaa kɛ̀ aↄ̃è sísinↄ píngi, 29 mↄde tó gbɛ̃ Luda Nini tↄ́ zaaa sìsi, eé kɛ̃nɛro, zaakɛ adee durun kɛ̀ è sí kɛ̃ńnɛroo kɛ̀mɛ. 30 Yesu ò lɛ kɛ̀ aↄ̃ bè à zĩn vĩ yãnzimɛ.

Yesu danɛnↄ

(Mat 12:46-50, Luk 8:19-21)

31 Kɛ̀ à da kↄ̃n à dãaronↄ kà, aↄ̃ zɛ̀ bàazi, ben aↄ̃ gbɛ̃ zĩ̀ wà à sísi. 32 Gbɛ̃nↄↄ vɛ̃ɛna wà ligazi pari, ben wà bènɛ: Ǹ gwa! N da kↄ̃n n dãaronↄ zɛ bàazi aↄ̃ↄe n gbekaa. 33 Ben à wèńla à bè: Dén ma da kↄ̃n ma dãaronↄ ũu? 34 Ben à gbɛ̃ kɛ̀ aↄ̃ↄ vɛ̃ɛzinↄ gwà à bè: Ma da kↄ̃n ma dãaronↄn yɛ̀. 35 Gbɛ̃ kɛ̀ è Luda pↄyezi kɛɛn ma dãaro kↄ̃n ma dãreo kↄ̃n ma dao ũ.

<- MAAKU 2 MAAKU 4 ->