MATIU 4

Yesu yↄ̃agwana

(Maa 1:12-13, Luk 4:1-13)

1 Ben Luda Nini gàa kↄ̃n Yesuo gbáan, lɛ Ibilisi à yↄ̃ à gwa. 2 Yesu lɛ́ yì fãantɛ̃ kↄ̃n gwãavĩo ai gurↄ baplaa. Kɛ̀ nↄaa e à dɛɛ, 3 ben gbɛ̃kɛkɛri pì sↄ̃̀zi à bè: Tó Luda Nɛ́n n ũ, ǹ be gbɛ̀ kɛ̀nↄ li burɛdi ũ. 4 Yesu wèàla à bè: À kú Luda yãn wà bè:

Pↄ́bleen gbɛ̃ntee ègↄ̃ kúo adoro,

sé yã kɛ̀ Ludaa e oo píngi.

5 Ben Ibilisi à sɛ̀ à gàao Luda wɛ́tɛ, à à zɛ̀ Luda kpɛ́ mìsↄ̃ntɛ̃a, 6 à bè: Tó Luda Nɛ́n n ũ, ǹ ↄ kpá n zĩndazi, zaakɛ wà kɛ̃̀ Luda yãn wà bè:

Eé n yã o a malaikanↄnɛ,

aↄ̃é n sɛ́ ń ↄzĩ lɛ ǹton gɛ̃̀n sí gbɛ̀aro yãnzi.

7 Yesu wèàla à bè: Wà kɛ̃̀ dↄ wà bè:

Ǹton Dii n Luda lɛ́ ǹ gwaro.

8 Ben Ibilisi à sɛ̀ à gàao dↄ kpii lezĩ maamaa musu, à anduna kpatanↄ ↄ̀dↄanɛ píngi kↄ̃n ń auzikinↄ 9 à bè: Mɛ́ n gba beeenↄ píngi, tó n kuɛ n dↄnzi kɛmɛ. 10 Ben Yesu bènɛ: Ǹ gumala Setãn! Zaakɛ wà kɛ̃̀ Luda yãn wà bè,

ǹ dↄnzi kɛ Dii n Ludanɛ

ǹgↄ̃ dↄↄzi ado.

11 Ben Ibilisi à tò gwe sa, ben malaikanↄ mↄ̀ wà dↄ̀àlɛ.

Yesu nana a zĩia zaa Galili

(Maa 1:14-15, Luk 4:14-15)

12 Kɛ̀ Yesu mà wà Yaaya kũ̀ wà dà kpɛ́siaan, ben à tà Galili. 13 Èe vɛ̃ɛ Nazarɛti dↄro, à gàa à vɛ̃̀ɛ sɛ̀bɛ saɛ Kapɛnamu, Zɛbuluni boriinↄ kↄ̃n Nafatali boriinↄ bùsun, 14 lɛ yã kɛ̀ annabi Isaya ò kɛ yãnzi à bè:

15 Zɛbuluni boriinↄ kↄ̃n Nafatali boriinↄ bùsu,

zaa ísiaa kpa ai Yoda baa kãa kpa,

Galili bùsu kɛ̀ bori pãndenↄ kún pì,

16 aↄ̃ gbɛ̃ kɛ̀ aↄ̃ↄ kú gusiaa guunↄ gupura ìsi è,

guu dↄ̀ bùsu kɛ̀ kú gaa lɛ́zĩ pì deenↄnɛ sa.

17 Zaa gurↄ beeean Yesu nà waazikɛnaa à bè: À nↄ̀sɛ liɛ, kpata kɛ̀ bↄ̀ Luda kiia kà kĩi.

Yesu ìba káakunↄ sisina

(Maa 1:16-20, Luk 5:1-11)

18 Kɛ̀ Yesu e dↄↄ Galili sɛ̀bɛzi, à gↄ̃ↄn plaaanↄ è, vĩ̀i kↄ̃n dãaroo, Simↄ kɛ̀ wè be Pita kↄ̃n a dãaro Anduruo. Aↄ̃ↄe táaru kpaa sɛ̀bɛ pì guu, zaakɛ sↄrↄkↄnↄmɛ. 19 Ben Yesu bèńnɛ: À mↄ́ à tɛ́mazi, mɛ́ a kɛ gbɛ̃wɛtɛrinↄ ũ. 20 Zaa gwe gↄ̃ↄ aↄ̃ ń táarunↄ tòn aↄ̃ bↄ̀ wà tɛ̀zi. 21 Kɛ̀ à gàa aɛ, à gↄ̃ↄn plaa pãndenↄ è, vĩ̀i kↄ̃n dãaroo dↄ, Zebedi nɛ́ Yemisi kↄ̃n a dãaro Yohanao. Aↄ̃ↄ kú góro'itɛ guu kↄ̃n ń de Zebedi pìo, aↄ̃ↄe ń táarunↄ kɛkɛɛ. Yesu ń sísi, 22 ben aↄ̃ ń de tò góro guu gwe gↄ̃ↄ, aↄ̃ bↄ̀ wà tɛ̀zi.

Yesu yãdannɛna Galili

(Luk 6:17-19)

23 Yesu ègↄ̃ lili oo Galili bùsun, è yã dańnɛ ń aduakɛkpɛnↄ guu, è kpata kɛ̀ bↄ̀ Luda kiia baaru kpá, è gbɛ̃nↄ kɛ̃kↄ̃a kↄ̃n gyã bori sãnda píngio. 24 À tↄ́ dà Siria bùsula píngi, ben wègↄ̃ mↄↄnɛ kↄ̃n gbɛ̃ kɛ̀ aↄ̃ↄe gyã bori píngi kↄ̃n wãwãao kɛɛnↄ kↄ̃n zĩndeenↄ kↄ̃n gasindadeenↄ kↄ̃n ɛrɛnↄ, ben è ń kɛ̃kↄ̃a. 25 Wà bↄ̀ Galili kↄ̃n Wɛ́tɛmɛnkuri bùsuo kↄ̃n Yerusalɛmuo kↄ̃n Yudeao kↄ̃n Yoda baa kãa kpaao paripari wà tɛ̀zi.

<- MATIU 3 MATIU 5 ->