MATIU 11

Yaaya Batisikɛri zĩ̀rinↄ

(Luk 7:18-35)

1 Kɛ̀ Yesu yã beeenↄ dà a ìba gↄ̃ↄn kuri awɛɛplaaanↄnɛ à yã̀a, à bↄ̀ gwe, à gàa waazi kɛ ń wɛ́tɛnↄ guu, èe yã daańnɛ.

2 Zaa kpɛ́siaan Yaaya Kirisi yãkɛnanↄ mà, ben à a ìba kenↄ zĩ̀ 3 aↄ̃ à la, àmbe gbɛ̃ kɛ̀ eé mↄ́ ũↄ́, ke wàgↄ̃ wɛ́ɛ dↄↄ gbɛ̃ pãndezimɛ? 4 Ben Yesu wèńla à bè: À gá yã kɛ̀ ée maa ée ee gbã Yaayanɛ à be, 5 vĩ̀anↄↄ e guu ee, ɛrɛnↄↄ e táa oo, kusunↄↄ e kɛ̃ɛkↄ̃a, swãdoonↄↄ e yã maa, gɛ̀nↄↄ e fɛɛɛ, takaasideenↄↄ e baaru nna waazi maa. 6 Aubarikadeen gbɛ̃ kɛ̀ è fu ma yãaroo ũ.

7 Kɛ̀ Yaaya zĩ̀rinↄ tà, Yesu Yaaya yã ò pariinɛ à bè: Bↄ́n a gaa gwa gbáan? Kàba kɛ̀ ĩa e nigãan yↄ́? 8 Bↄ́n a gaa gwa saa? Gbɛ̃ kɛ̀ pↄ́kãsã zãɛ danan yↄ́? Pↄ́kãsãmaadarinↄ ègↄ̃ kú kíbɛmɛ. 9 Bↄ́n a gaa gwa saa? Annabin yↄ́? Lɛmɛ! Mɛ́ɛ ooare, à dɛ annabila se. 10 Zaakɛ Yaayan wà à yã kɛ̃̀ Luda yãn wà bè: Mɛ́ ma zĩ̀ri gbarɛ n ã lɛ à zɛ́ kɛkɛnnɛ. 11 Yãpuraan mɛ́ɛ ooare, nↄgbɛ̃ nɛ́'ina guu gbɛ̃kee e bↄ à kà Yaaya Batisikɛri ũro. Baa kↄ̃n beeeo gbɛ̃ kɛ̀ dɛ gbɛ̃ kpɛɛdee ũ kpata kɛ̀ bↄ̀ Luda kiia guu dɛàla. 12 Zaa gurↄↄ kɛ̀ Yaaya Batisikɛri nà waazikɛnaa ai mↄna gbã̀a, wèe kↄ̃dɛɛ kɛɛ wà gɛ̃ kpata pìn, ben kùgbãadeenↄↄ e gɛ̃ɛn. 13 Musa kↄ̃n annabinↄ píngi gĩakɛ wà à yã ò ai à gàa pɛ́ Yaayaa. 14 Tó é fↄ̃ à sí, Yaaya pì bé à Ilia kɛ̀ wà bè eé mↄ́ ũ. 15 Gbɛ̃ kɛ̀ swã vĩ à ma.

16 Bↄ́n mɛ́ tↄ̃ↄrigbɛ̃nↄ lɛ́kↄ̃zio? Aↄ̃ↄ dɛ lán nɛ́ kɛ̀ aↄ̃ↄ kú yàra guu aↄ̃ↄe lɛ́ zuukↄ̃zinↄ bà 17 wèe bee:

Wa kure pɛ̀are, ée ↄ̃ wãro,

wa wɛ̃nda lɛ̀ sìare, ée sósobi kɛro.

18 Zaakɛ Yaaya mↄ̀, èe burɛdi sóro, èe wɛ̃ɛ miro, ben wà bè zĩndeemɛ. 19 Kɛ̀ Gbɛ̃ntee Nɛ́ mↄ̀, è pↄ́ ble, è í mi, ben wà bè: Guturu wɛ̃mirimɛ, bɛ'ↄↄsirinↄ kↄ̃n durunkɛrinↄ gbɛ̃nnamɛ! Mↄde wè ↄ̃ndↄ̃ↄ dↄ̃ a yãkɛnaamɛ.

Yesu zↄkakana wɛ́tɛ kenↄ deenↄzi

(Luk 10:13-15)

20 Ben Yesu fɛ̀ɛ à zↄka kà wɛ́tɛ kɛ̀ à a dabuyã paridee kɛ̀nnↄ gbɛ̃nↄzi, kɛ̀ aↄ̃ↄe ń nↄ̀sɛ liɛro yãnzi à bè: 21 Wãiyoo Kↄrazĩdeenↄ! Wãiyoo Bɛtɛsaidadeenↄ! Tó ma dabuyã kɛ̀ má kɛ̀ a tɛ́nↄ kɛ̀ Taya kↄ̃n Sidↄ̃o yã, lɛ wɛ́tɛ pì deenↄ pↄ́kãsãanↄ dàdańla, aↄ̃ vɛ̃̀ɛ tubura à gì kɛ̀ nↄ̀sɛliɛna sèeda ũ. 22 Mɛ́ɛ ooare, yãkpaɛkɛgurↄↄ zĩ a wɛ́ɛtãmma égↄ̃ dɛ Tayadeenↄ kↄ̃n Sidↄ̃deenↄ pↄ́la. 23 A Kapɛnamudeenↄ sↄ̃ é gbã à zↄ̃ Ludaan yↄ́? Weé ↄ sↄ̃azi ai gɛ̀wãan. Zaakɛ tó wà dabuyã kɛ̀ má kɛ̀areenↄ kɛ̀ Sↄdↄmu yã, lɛ à kuu ai kↄ̃n a gbã̀ao. 24 Mɛ́ɛ ooare, yãkpaɛkɛgurↄↄ zĩ a wɛ́ɛtãmma égↄ̃ dɛ Sↄdↄmudeenↄ pↄ́la.

Kámmabona Yesu kiia

(Luk 10:21-22)

25 Zĩ beeea Yesu bè: Baa, musu kↄ̃n tↄↄtɛo Dii, ma n sáabu kɛ̀, kɛ̀ n yã beeenↄ ùtɛ yãdↄ̃rinↄnɛ kↄ̃n ↄ̃ndↄ̃rinↄ, n bↄo kyódↄ̃risainↄnɛ. 26 Lɛmɛ, Baa, zaakɛ n pↄyezinamɛ. 27 Ma De pↄ́ píngi nàmɛ ma ↄzĩ. Gbɛ̃kee Luda Nɛ́ dↄ̃ro, tó èe kɛ De Luda baasiro. Gbɛ̃kee De Luda dↄ̃ro, tó èe kɛ à Nɛ́ kↄ̃n gbɛ̃ kɛ̀ Nɛ́ pì yezi à à ↄdↄańnɛnↄ baasiro.

28 À mↄ́ ma kiia amↄa kɛ̀ á aso sɛna a kpasanↄ píngi, mɛ́ a gba zɛ́ à kámma bo. 29 À ma gbóngo sɛ́ à yã dada ma kiia, a làakari é kpáɛ, zaakɛ má busɛ bensↄ̃ ma nↄ̀sɛ yĩi. 30 Ma gbóngo sɛna zĩ'ũro, ma asoo tìisiro.

<- MATIU 10 MATIU 12 ->