LUKU 15

Pↄ́ kɛ̀ sã̀sãnↄ

(Mat 18:12-14)

1 Bɛ'ↄↄsirinↄ kↄ̃n durunkɛrinↄↄ e sↄ̃ↄ Yesuzi lɛ wà à yã ma ń píngi. 2 Ben Farisinↄ kↄ̃n ludayãdannɛrinↄↄ e yãkete kaazi aↄ̃ bè: Gbɛ̃ kɛ̀kii è durunkɛrinↄ sí è se pↄ́ bleńyo lɛdo. 3 Ben Yesu yã kɛ̀kii lɛ̀kↄ̃zińnɛ à bè: 4 Wà be a gbɛ̃kee sãa vĩ mɛ̀n basↄↄro, ben à doo sã̀sã, è à basↄↄro dosai tó sɛ̃̀n à pɛ́ɛ sãa kɛ̀ sã̀sã pìzi ai à gá eroo? 5 Tó à bↄ̀a, è à sɛ́ à da a gã̀n kↄ̃n pↄnnaao 6 à táo bɛ à a gbɛ̃nnanↄ kↄ̃n a fáandideenↄ sísi à beńnɛ: À pↄnnaa kɛmao. Ma a sãa kɛ̀ sã̀sã è. 7 Lɛmɛ dↄ mɛ́ɛ ooare, weé pↄnnaa kɛ ludambɛ durunkɛri mɛ̀n doo kɛ̀ nↄ̀sɛ lìɛ yã musu dɛ gbɛ̃ maa gↄ̃ↄn basↄↄro dosai kɛ̀ aↄ̃ↄ nↄ̀sɛliɛna nii vĩroonↄla.

8 Nↄgbɛ̃ kɛ̀ kondogi ↄↄ vĩ mɛ̀n kuri sↄ̃ nɛ́? Tó à mɛ̀n doo sã̀sã, è fitia na à kpɛ́ waa à wɛtɛ busɛbusɛ ai à gá eroo? 9 Tó à bↄ̀a, è a gbɛ̃nnanↄ kↄ̃n a fáandideenↄ sísi à beńnɛ: À pↄnnaa kɛmao. Ma kondogi ↄↄ kɛ̀ sã̀sã pì è. 10 Lɛmɛ dↄ mɛ́ɛ ooare, Luda malaikanↄ è pↄnnaa kɛ durunkɛri mɛ̀n doo kɛ̀ nↄ̀sɛ lìɛ yã musu.

Nɛ́gↄ̃gbɛ̃ kɛ̀ sã̀sã

11 Yesu bè dↄ: Gbɛ̃ke bé à kuu à nɛ́gↄ̃gbɛ̃nↄ vĩ gↄ̃ↄn plaa. 12 Ben Sabi bè a denɛ: Baa, ǹ ma asaia kɛ̀ mɛ́gↄ̃ vĩ túbi guu kpáma. Ben de pì a auziki kpàatɛtɛńnɛ. 13 Èe kɛ gurↄ plaaro, ben Sabi a pↄ́nↄ nàkↄ̃a píngi à tà bùsu pãnden zã̀azã. Gwen à a auziki kàatɛn pãpãkɛna guu. 14 Kɛ̀ à pↄ́ kɛ̀ à vĩinↄ dɛ̀ píngi, ben dekaa gbãaa kà bùsu pìn, ben à gↄ̃̀ takaasio. 15 À gàa à nà bùsu pì gbɛ̃kezi ayazĩkɛri ũ, ben gbɛ̃ pì à gbàrɛ a bura à pↄ́blee kpá alɛdɛnↄa. 16 Ègↄ̃ yezi à pↄ́ tɛ̀ɛ kɛ̀ alɛdɛnↄↄ e blee ble à kã, mↄde wè pↄ́ke kpáaro. 17 Kɛ̀ à làakari sù à bè: Ma de ayazĩkɛrinↄ pↄ́blee vĩ dińzi, ben mɛ́ɛ gaa kↄ̃n nↄaao kɛ̀. 18 Mɛ́ fɛɛ mà tá ma de kiia, mɛ́ benɛ: Baa, ma durun kɛ̀ Ludanɛ kↄ̃n mpio se, 19 mɛ́ɛ kↄ̃ sío wà ma sísi n nɛ́ ũ dↄro. Ǹ ma diɛ n ayazĩkɛrinↄ doke ũ. 20 Ben à fɛ̀ɛ èe taa a de kiia. Kɛ̀ à tɛ́ kãaa èe suu, à de pì à è, ben à kɛ̀nɛ wɛ̃nda. À bàa sì à gàa à kùsia, à lɛ́ pɛ̀a. 21 Ben nɛ́ pì bènɛ: Baa, ma durun kɛ̀ Ludanɛ kↄ̃n mpio, mɛ́ɛ kↄ̃ sío wà ma sísi n nɛ́ ũ dↄro. 22 Ben de pì bè a zĩkɛrinↄnɛ: À gá kpakpaa, à utada maaa kɛ̀ dɛ à kpaaanↄla sɛ́ à mↄ́ à danɛ, à tãnga danɛ à kyatee kpánɛ. 23 À zùswarenɛ bↄ̀rↄ mɛ̀kpana kũ à dɛ, wà só pↄnnakɛna guu, 24 zaakɛ ma nɛ́ pì gà à fɛ̀ɛmɛ. À sã̀sãmɛ, ben ma à è. Ben aↄ̃ nà pↄnnakɛnaa.

25 Woru sↄ̃ kpɛ́ bura. Kɛ̀ èe suu à kà kĩi kↄ̃n bɛɛo, ben à bata ↄ́ mà dↄ kↄ̃n kↄ̃kↄ̃ kĩio. 26 Ben à zĩkɛrinↄ doke sìsi à à là bↄ́n wèe kɛɛ. 27 Ben à wèàla à bè: N dãaro bé à sù, ben n de zùswarenɛ bↄ̀rↄ mɛ̀kpana dɛ̀, kɛ̀ à à è aafia yãnzi. 28 Ben Woru pↄ fɛ̃̀, à gì gɛ̃ ua guuzi. Kɛ̀ à de bↄ̀ à agbaa kpànɛ, 29 ben Woru bè a denɛ: É'e, à kà wɛ̃̀ ũgbangba kɛ̀ mɛ́ɛ zĩi kɛɛnnɛ, mɛ́ɛ gí n yãzi zikiro, ben baa blèkofĩi gina nɛ́ɛ kpáma mà pↄnnaa kɛo kↄ̃n ma gbɛ̃nnanↄoro. 30 Kɛ̀ n nɛ́ kɛ̀ à n auziki kàatɛ kaaruanↄnɛ pì sù, n zùswarenɛ bↄ̀rↄ mɛ̀kpana dɛ̀nɛ. 31 Ben à de bènɛ: Ma nɛ́, ń kúmao gurↄ píngi. Pↄ́ kɛ̀ má vĩ píngi n pↄ́mɛ. 32 À kↄ̃ sìo wà pↄ́ ble kↄ̃n pↄnnaaomɛ, zaakɛ n dãaro pì gà à fɛ̀ɛmɛ. À sã̀sãmɛ, ben wà à è.

<- LUKU 14 LUKU 16 ->