19
Ayuba wena a gbɛ̃nnanↄla
1 Ben Ayuba wè a gbɛ̃nnanↄla à bè:
2 Ai bↄrɛn égↄ̃ ĩa daama,
àgↄ̃ ma nↄ̀sɛ yakaamɛ kↄ̃n yãzↄ̃zↄ̃ↄo?
3 A ma sↄ̃sↄ̃ à kɛ̀ gɛ̃̀n kuri sa,
ée ma faboo, wí è a kũro.
4 Tó ma sãsãmɛ yãpura,
ma taari dɛ ma zĩnda yã ũmɛ.
5 Tó a gi ée a zĩnda sɛɛ lezĩ dɛmala,
bensↄ̃ ée ma taari ee yã kɛ̀ ma lee musu,
6 àgↄ̃ dↄ̃ kɛ̀ Luda bé à yã kɛ̀ kɛ̀mɛ kpɛɛgãnda,
à takutɛɛ kpàkpamɛ à ma kũ.
7 Mɛɛ̀ faaba wii lɛ́, gbɛ̃ke è wemalaro,
mɛɛ̀ mìsina ↄ́ↄ dↄ, yãzɛdee kuuro.
8 Luda zɛ́ zↄ̃̀mɛ, gɛ̃kii kuuro,
à gusiaa dà ma zɛ́la.
9 À ma kpɛ bↄ̀,
à ma fùra gò.
10 È ma wíwi kpɛ píngia ai ma yãa,
è ma tãmaa nɛ lán wè lí nɛ nà.
11 È a pↄfɛ̃ bↄbↄma,
è ma diɛ a ibɛɛ ũ.
12 À zĩ̀kpɛɛnↄ è fɛɛmazi lɛdo,
aↄ̃è ma kagura kɛ,
aↄ̃è bùra káɛ wà liga ma kpɛ́zi.
13 À tò ma gbɛ̃nↄ è kakↄ̃amao dↄro,
gbɛ̃ kɛ̀ aↄ̃ↄ ma dↄ̃ↄnↄ lɛ̀ zↄ̃̀ wà tàtamalɛ.
14 Ma danɛnↄ pã kpàmazi,
ma gbɛ̃nnanↄ sã̀ ma yãn.
15 Ma gↄ̃ nibↄ ũ ma bɛ zĩkɛrinↄnɛ,
ma gↄ̃ńnɛ lán bori zĩ̀tↄ bà.
16 Tó ma a bɛgwari sìsi, è wemala dↄro,
baa tó ma agbaa kpànɛ kↄ̃n ma zĩnda lɛ́o.
17 Ma lɛ́'ĩa è kɛ ma naↄ̃nɛ lɛ́fↄna ũmɛ,
ma vĩ̀inↄ kↄ̃n ma dãaronↄ yemazi dↄro.
18 Baa nɛ́ ketenↄ è kya kámagu,
tó ma tɛna, aↄ̃ègↄ̃ ma faboomɛ.
19 Ma kpàasinↄↄ ye ma yãziro,
ma gbɛ̃ yenzideenↄ bↄ̀ ma kpɛɛ.
20 Ma mɛ̀ yitoo kũ̀,
à gↄ̃̀ féte kɛ̀ mɛ́ ga.
21 À ma wɛ̃nda gwa ma gbɛ̃nnanↄ,
à ma wɛ̃nda gwa, zaakɛ Luda ↄ tↄ̃̀mamɛ.
22 À kɛ̀ dia eè wɛ́ɛ dↄmɛ lán Luda è wɛ́ɛ dↄmɛ nà?
Ma nↄ̀bↄ sona e mↄ́awa lɛroo?
23 Lɛ wà ma yãnↄ kɛ̃̀
wà kà lán.
24 Lɛ wà kɛ̃̀ gbɛ̀a kↄ̃n gão,
wà beoma kpàɛn àgↄ̃ kuu ai gurↄ píngi.
25 Zaakɛ má dↄ̃ kɛ̀ ma Zɛnyodee kuu,
eé fɛɛ à zɛ ma sèedadee ũ zãazãa.
26 Tó ma mɛ̀baa kɛ̀kii kàatɛ,
mɛ́ wɛ́ɛ si Ludalɛ mɛ̀ sai.
27 Mɛ́ wɛ́ɛ siàlɛ ma zĩnda,
eé kɛmɛ gbɛ̃ zĩ̀tↄ ũro.
Yã pì ma kũna gbãa ma swɛ̃̀ guu.
28 À kɛ̀ dia a wɛ́ɛ dↄ̀mɛ,
a bè mámbe ma a zĩnda lèo?
29 À vĩa kɛ Luda fɛ̃ɛdaanɛ,
zaakɛ eé pↄfɛ̃ bↄbↄo zaakɛrinↄa,