YÃGƆ̃GƆ̃RINƆ 8

1 Ɛflaimunↄ Gidiↄn là wà bè: Bↄ́yãnzin ń kɛ̀we lɛzi? Kɛ̀ nɛ́ɛ gaa zĩ̀ ká kↄ̃n Midiãnↄ, ben nɛ́ɛ wa sísiroo? Ben aↄ̃ wisↄ̃̀zi lɛ pãsĩpãsĩ, 2 ben à bèńnɛ: Bↄ́n má kɛ̀ kɛ̀ kà a pↄ́ ũu? A Ɛflaimunↄ geepi kↄ̃ↄwɛna maa dɛ wamↄwa Abiɛzanↄ geepikɛkɛnala. 3 Luda Midiã kínanↄ Orɛbu kↄ̃n Zebuo nàare a ↄzĩ. Bↄ́n ma fↄ̃ má kɛ̀ kɛ̀ kà a pↄ́ ũu? Kɛ̀ à òńnɛ lɛ, ben aↄ̃ pↄfɛ̃ gbasa à kpàɛ sa.

Zɛba kↄ̃n Zalamunao dɛdɛna

4 Gidiↄn kↄ̃n a gbɛ̃ gↄ̃ↄn wàa do kpɛ́ basↄↄroonↄↄ kpɛ́ wèe pɛɛɛ Midiãnↄzi, baa kɛ̀ aↄ̃ gbãaa bùsa. Kɛ̀ aↄ̃ kà Yodazi, ben aↄ̃ bikũ̀. 5 Ben à bè Sukodeenↄnɛ: À ma gbɛ̃nↄ gba pↄ́blee. Aↄ̃ gbãaa bùsa bensↄ̃ má kpɛ́ mɛ́ɛ pɛɛɛ Midiã kínanↄ Zɛba kↄ̃n Zalamunaozi. 6 Ben Suko gbɛ̃nsinↄ bè: Zɛba kↄ̃n Zalamunao gɛ̃̀ n ↄzĩ kↄ̀n yↄ́? À kɛ̀ dia wé n zĩ̀karinↄ gba pↄ́bleee? 7 Gidiↄn wèńla à bè: Zaakɛ á ò lɛ, tó Dii Zɛba kↄ̃n Zalamunao nàmɛ ma ↄzĩ, mɛ́ a kɛ gyáigyai kↄ̃n gbáa lɛ̀o. 8 Zaa gwe à gàa Pɛniɛli, ben à wɛ́ɛ kɛ̀ḿma lɛ dↄ. Pɛniɛlideenↄ wèàla lán Sukodeenↄ wèàla nàmɛ dↄ, 9 ben à bèńnɛ se: Tó ma gaa ma su aafia, mɛ́ gudãkpaki lezĩ kɛ̀ gboro.

10 Zɛba kↄ̃n Zalamunao kú Kako kↄ̃n ń zĩ̀karinↄ gↄ̃ↄn bↄrↄ gɛ̃ro. Ɔfãntɛ̃bↄɛ kpa zĩ̀kpɛɛ kɛ̀ aↄ̃ gↄ̃̀nↄn gwe. Aↄ̃ fɛ̃ɛdadeenↄ gàga gↄ̃ↄn bↄrↄ baswɛɛdo. 11 Gidiↄn laatarinↄ zɛ́ sɛ̀ Nↄba kↄ̃n Yↄgbɛao ↄfãntɛ̃bↄɛ kpa, ben à sì zĩ̀kari pìnↄ tɛ́ gurↄↄ kɛ̀ aↄ̃ sã̀ ń zĩnda yãn. 12 Midiã kína pìnↄ Zɛba kↄ̃n Zalamunao bàa lɛ̀, ben à pɛ̀ɛńzi à ń kũkũ, ben à tò ń zĩ̀karinↄ lɛ̀kↄ̃a ń píngi.

13 Kɛ̀ Yoasi nɛ́ Gidiↄn bↄ̀ zĩ̀lan èe suu, à bↄ̀ɛ Ɛrɛsi Gbɛ̀kotozɛn, 14 ben à Suko gↄ̃kparɛ ke kũ̀ à à làla yãzi, ben gↄ̃kparɛ pì Suko gbɛ̃nsinↄ tↄ́ kɛ̃̀nɛ takadan gↄ̃ↄn baaagↄ̃ akuri awɛɛswɛɛplaa. 15 Ben Gidiↄn gàa à Sukodeenↄ lè à bè: Zɛba kↄ̃n Zalamunaon yɛ̀. A ma lalandi kɛ̀ yã a bè, Zɛba kↄ̃n Zalamunao e gɛ̃ ma ↄzĩ kↄ̀ro. É fↄ̃ à ma gbɛ̃ kɛ̀ ń gbãaa bùsanↄ gba pↄ́bleero. 16 Ben à wɛ́tɛ pì gbɛ̃nsi pìnↄ kũ̀kũ à ń kɛ́ gyáigyai kↄ̃n gbáa lɛ̀o, aↄ̃ dↄ̃̀ ń mɛ̀a. 17 Ben à gàa à Pɛniɛli gudãkpaki lezĩ gbòro à wɛ́tɛ gↄ̃gbɛ̃nↄ dɛ̀dɛ.

18 Ben à Zɛba kↄ̃n Zalamunao là à bè: Gbɛ̃ kɛ̀ a ń dɛ́dɛ Tabonↄↄ dɛ diamɛ? Aↄ̃ wèàla wà bè: Aↄ̃ↄ dɛ lán n bàmɛ, aↄ̃ kakana dɛ lán kínɛnↄ bà. 19 Ben Gidiↄn bèńnɛ: Ma vĩ̀i dadↄ̃nkↄ̃deenↄn gwe. Tó a ń tó yã, kↄ̃n Diio mɛ́ a dɛdɛro. 20 Ben à bè a daudu Yɛtanɛ: Ǹ fɛɛ ǹ ń dɛdɛ. Nɛ́ pì e a fɛ̃ɛdaa wotoro, vĩa à kũ̀, zaakɛ nɛ́ fétemɛ. 21 Ben Zɛba kↄ̃n Zalamunao bè: Ǹ fɛɛ ǹ wa dɛdɛ n zĩnda. Baade kↄ̃n a gbãaaomɛ. Ben Gidiↄn fɛ̀ɛ à ń dɛ́dɛ à mↄ̀ kã̀mbɛɛ kɛ̀ da ń lakuminↄ waalɛ bↄ̀ɛ.

22 Isarailinↄ bè Gidiↄnnɛ: Ǹ gↄ̃ wa mìdee ũ kↄ̃n n boriinↄ. Zaakɛ ḿbe n wa bↄ Midiãnↄ ↄzĩ. 23 Ben Gidiↄn bèńnɛ: Mɛ́ gↄ̃ a mìdee ũro, baa ma nɛ́. Diin a kí ũ. 24 Ben à ɛ̀ara à bèńnɛ: Mɛ́ɛ wɛ́ɛ kɛɛawa: A baade swãi kɛ̀ à sìḿma kpáma mɛ̀n doodo. Midiãnↄ ègↄ̃ vura swãi dana, zaakɛ Sumaila boriinↄmɛ. 25 Aↄ̃ bènɛ: Wé kpámma kↄ̃n nↄ̀sɛo do. Aↄ̃ bisa kpàɛ, ben baade swãi kɛ̀ à sìḿmanↄ dàn mɛ̀n doodo. 26 Vura swãi kɛ̀ à gbèkaḿma pìnↄ tìisi kà kilo baro, mↄ̀kãmbɛɛnↄ kↄ̃n swãinↄ kↄ̃n gumusu tɛ̃aa kɛ̀ Midiã kínanↄↄ dananↄ kↄ̃n mↄ̀kãmbɛɛ kɛ̀ da ń lakuminↄ waalɛnↄ baasi. 27 Ben à pì màsokɛbↄ ũ à pɛ̀ɛ a bɛ wɛ́tɛn zaa Ɔfla. Ben Isarailinↄ pãpãa kɛ̀ wà dↄ̀zi ń píngi, ben à gↄ̃̀ takutɛɛ ũ Gidiↄnnɛ kↄ̃n à bɛdeenↄ.

28 Lɛn Isarailinↄ Midiãnↄ gbãaa bùsa lɛ. Midiãnↄↄ e e wà mì bↄ̀ dↄro. Ben Isarailinↄ bùsu gↄ̃̀ kaɛna aafia Gidiↄn gurↄ ai wɛ̃̀ baplaa.

Gidiↄn gana

29 Yoasi nɛ́ Gidiↄn gàa à vɛ̃̀ɛ a bɛ. 30 À nɛ́gↄ̃gbɛ̃ kɛ̀ à ń ínↄ gↄ̃ↄn baaagↄ̃ akurimɛ, zaakɛ à nↄↄnↄↄ pari. 31 À nↄpↄsɛɛ vĩ dↄ zaa Sɛkɛmu kɛ̀ à nɛ́gↄ̃gbɛ̃ ìo, ben wà tↄ́ kpànɛ Abimɛlɛki. 32 Yoasi nɛ́ Gidiↄn gà a zikũmmɛ, ben wà à mira kpàkↄ̃zi kↄ̃n a de pↄ́o zaa Ɔfla Abiɛza.

33 Kɛ̀ Gidiↄn gà gↄ̃ↄ, ben Isarailinↄ ɛ̀ara wà pãpãa kɛ̀ wà dↄ̀ Baalizi. Ben aↄ̃ tãa kɛ̀ wè be Baalibaakuwao pɛ̀ɛ ń dii ũ, 34 ben Dii ń Luda kɛ̀ à ń bↄ́ ń ibɛɛ kɛ̀ aↄ̃ↄ ligańzi kpa píngianↄ ↄzĩ yã sã̀ńgu. 35 Aↄ̃ↄe gbɛ̃kɛɛ kɛ Gidiↄn kɛ̀ wè benɛ dↄ Yerubaali bɛdeenↄnɛ yã maaa kɛ̀ à kɛ̀ńnɛ píngi musuro.

<- YÃGƆ̃GƆ̃RINƆ 7 YÃGƆ̃GƆ̃RINƆ 9 ->