EBERUNƆ 5

1 Wè sa'oriki píngi sɛ́ gbɛ̃nↄ tɛ́mɛ, wè à diɛ ń wɛ́ɛdee ũ Luda kiia, àgↄ̃ gba kpáa, àgↄ̃ à gbãgbãańnɛ ń durunnↄ yãnzi. 2 Eé fↄ̃ à kɛ kↄ̃n gbɛ̃ kɛ̀ aↄ̃ sã̀sã aↄ̃ dↄ̃nasaikɛɛ guunↄo busɛbusɛ, zaakɛ àpi kú kↄ̃n gbãasaikɛɛomɛ se. 3 Beee yãnzi séde à saa o a zĩnda durun yã musu, lán è o gbɛ̃ kpaaanↄ pↄ́ musu nà se dↄ. 4 Gbɛ̃ke è a zĩnda ká kpata pìnlo. Luda bé è à kán, lán à Aruna kàn nà.

5 Lɛn se Kirisi e a zĩnda ká sa'oriki kpatanlo, Luda bé à à kàn à bè:

Ma Nɛ́n n ũ,

gbã̀an ma n i.

6 À bè Luda yãn gukea dↄ:

Nɛ́gↄ̃ dɛ sa'ori ũ ai gurↄ píngi Mɛlɛkizɛdɛki zɛ́kpaɛa.

7 Gurↄↄ kɛ̀ Yesu kú anduna guu à adua kɛ̀ kↄ̃n wii gbãaao kↄ̃n wɛ́ɛ'io, à kúɛ kɛ̀ Luda kɛ̀ eé fↄ̃ à a sí gaaanɛ, ben Luda à yã mà, kɛ̀ è à yã da yãnzi. 8 Baa kↄ̃n à Ludanɛkɛɛo, à mìsiɛna Ludanɛ dàda a nawɛ̃akɛna guu. 9-10 Kɛ̀ maaa pɛ̀kↄ̃rɛa à yã̀a, Luda à kà sa'oriki ũ Mɛlɛkizɛdɛki zɛ́kpaɛa, ben à gↄ̃̀ mìsina kɛ̀ è yãaroo bↄkii ũ gbɛ̃ kɛ̀ aↄ̃è à yã maanↄnɛ ń píngi.

Làakarikɛna funazi

11 Yã beee musu wá yã vĩ pari wà oare, mↄde à bↄkↄ̃tɛna zĩ'ũmɛ, zaakɛ eè yã dↄ̀rↄ dↄ̃ kpaaro. 12 Amↄa kɛ̀ a gì kɛn lán kɛ̀ bà, à maa àgↄ̃ dɛ yãdannɛrinↄ ũmɛ, mↄde ai tia á kpɛ́ dɛ wà ɛara wà Luda yã kɛ̀ wè dada gbɛ̃ dufunↄnɛ dadaare dↄ. Yↄ̃'i bé à kↄ̃ sìao, ée ká à ú blero. 13 Zaakɛ yↄ̃miri píngi nɛ́ nɛ́mɛ, èe ká à ↄzɛɛ dↄ̃kↄ̃zi kↄ̃n ↄplaaoro. 14 Ú sↄ̃ nɛ́ gbɛ̃ kàsara kɛ̀ aↄ̃ kↄ̃ dↄ̃̀onↄ pↄ́mɛ. Aↄ̃ à maa kↄ̃n à zaaao dↄ̃kↄ̃zina dàda.

<- EBERUNƆ 4 EBERUNƆ 6 ->