BƆNA 5

Musa kↄ̃n Arunao gana Fili'auna aɛzĩ

1 Beee gbɛra Musa kↄ̃n Arunao gàa wà Fili'auna lè aↄ̃ bènɛ: Yã kɛ̀ Dii Isarailinↄ Ludaa òn yɛ̀. À bè ǹ a gbɛ̃nↄ gbarɛ aↄ̃ gá zĩbaa kɛare gbáan. 2 Fili'auna wèńla à bè: Dén Dii ũ kɛ̀ mà à yã ma mà Isarailinↄ gbarɛɛ? Má Dii dↄ̃ro. Mɛ́ Isarailinↄ gbarɛro. 3 Ben aↄ̃ bènɛ: Eberunↄ Luda bé à bↄ̀ à mↄ̀wazi. Ǹ wa gba zɛ́ wà gá wà gurↄ aagↄ̃ↄ kɛ gbáan wà saa o Dii wa Luda pìa, lɛ àton gyãa káwaguro kesↄ̃ zĩ̀. 4 Ben Igipiti kína pì bè Musa kↄ̃n Arunaonɛ: À kɛ̀ dia á tò gbɛ̃nↄ làakari e goo ń zĩia? À sↄkpa a zĩia. 5 Ben à ɛ̀ara à bè: Kɛ̀ gbɛ̃nↄ pari kũ̀ sa, ben á yezi aↄ̃ kámma bo kↄ̃n ń zĩioↄ́?

6 Zĩ beeea Fili'auna yã dìɛ Isaraili wɛ́ɛtãmmarinↄnɛ kↄ̃n ń dↄn'aɛdeenↄ à bè: 7 Àton sɛ̃̀buru kpáḿma aↄ̃ kúnku bↄo lán eè kɛ nà yã dↄro. Aↄ̃ gá wà ń pↄ́ kɛ̃ ń zĩnda. 8 Mↄde aↄ̃ kúnku bↄ lán aↄ̃è bↄ nà yã lɛ́n. Àton lagońnɛro, zaakɛ mɛadeenↄmɛ. Beee yãnzi aↄ̃ wiii ègↄ̃ dↄ, aↄ̃ↄe bee wà yezi wà gá saa o ń Ludaazi. 9 À zĩi kaarańnɛ lɛ aↄ̃ton ĩampakii e aↄ̃ làakari kpá ɛgɛyãnↄa dↄro.

10 Ben aↄ̃ wɛ́ɛtãmmari pìnↄ kↄ̃n ń dↄn'aɛdeenↄ mↄ̀ aↄ̃ bèńnɛ: Fili'auna bè wàton sɛ̃̀buru kpáawa dↄro. 11 À gá à wɛtɛ a zĩnda guu kɛ̀ é en. Baa kↄ̃n beeeo wé zĩi lagoarero, baa féte. 12 Ben aↄ̃ fã̀akↄ̃a wà gàa Igipiti gu píngi sɛ̃̀ kɛ̃ sɛ̃̀buru ũ. 13 Aↄ̃ wɛ́ɛtãmmari pìnↄ ègↄ̃ nakↄ̃rɛɛḿma lán guu e dↄↄ nà, lɛ aↄ̃ ń zĩ nɛ lán aↄ̃è nɛ nà gurↄↄ kɛ̀ wèe sɛ̃̀buru kpaaḿma. 14 Wà gbɛ̃na kɛ̀ Isaraili dↄn'aɛdee kɛ̀ aↄ̃ wɛ́ɛtãmmarinↄↄ dìɛnↄnɛ wà bèńnɛ: À kɛ̀ dia ée kúnku bↄ gbã̀a ke gĩa à kà lán wà a lɛ́ dìɛare nà yãroo? 15 Ben Isaraili dↄn'aɛdeenↄ gàa wà wii lɛ̀ Fili'aunaa wà bè: À kɛ̀ dia nɛ́ɛ kɛɛ wamↄwa n zↄ̀blerinↄnɛ lɛɛ? 16 Wèe sɛ̃̀buru kpaawa dↄro, ben wèe bee wà kúnku bↄ. Wèe wa gbɛ̃ɛ, mↄde n gbɛ̃nↄ bé wà taari vĩ. 17 Ben à bè: Mɛadeenↄn a ũ. Lɛn á dɛ lɛ! Beee yãnzi eègↄ̃ bee é gá saa o Diiazi. 18 À gá zĩi kɛ. Weé sɛ̃̀buru kpáawa dↄro, baa kↄ̃n beeeo é kúnku bↄ lán wà dàare nà lɛ́mmɛ.

19 Kɛ̀ wà ò Isaraili dↄn'aɛdeenↄnɛ aↄ̃ton gurↄ doo kúnkubↄna lagoro, aↄ̃ↄ dↄ̃̀ kɛ̀ wà yã è sa. 20 Kɛ̀ aↄ̃ bↄ̀ Fili'auna kiia, aↄ̃ dàkↄ̃rɛ kↄ̃n Musao kↄ̃n Arunao, aↄ̃ↄe ń dãa, 21 ben aↄ̃ bèńnɛ: Dii a yã gwa à yãkpaɛ kɛao, zaakɛ á tò Fili'auna kↄ̃n a gbɛ̃nↄↄ ye wa kãziro. A wa dɛna gbãaa kpàḿman gwe. 22 Ben Musa lìara à gàa à bè Diinɛ: Dii, bↄ́yãnzi n ĩa dà gbɛ̃ pìnↄa? Beee yãnzin n ma zĩziↄ́? 23 Zaa gurↄↄ kɛ̀ ma gaa ma yã ò Fili'aunanɛ kↄ̃n n tↄ́o, ben èe ĩa da n gbɛ̃nↄa, ben nɛ́ɛ ń bↄ sↄ̃ro nɛ́!

<- BƆNA 4 BƆNA 6 ->