BƆNA 4

Musa gbana dabuyãkɛna zɛ́

1 Musa wèàla à bè: Tó aↄ̃ↄe ma náanɛ kɛro, ben aↄ̃ↄe ma yã maro, tó aↄ̃ bè ḿbe n bↄ n mↄmaziro sↄ̃ nɛ́? 2 Ben Dii a là à bè: Bↄ́n ń kũna gwee? À wèàla à bè: Gòmɛ. 3 Dii bènɛ: Ǹ gò pì pãɛ tↄↄtɛ. Kɛ̀ à pã̀ɛ, ben à lì mlɛ̃̀ ũ, ben Musa bↄ̀ru kpɛɛ. 4 Dii bènɛ: Ǹ ↄ bↄ ǹ kũ à vlãa. Kɛ̀ à kũ̀, ben à ɛ̀ara à lì gò ũ à ↄzĩ. 5 Dii bènɛ: Lɛn nɛ́ kɛ lɛ, lɛ aↄ̃ sí kɛ̀ mamↄma Dii aↄ̃ dezinↄ Ibraĩ kↄ̃n Isaakuo kↄ̃n Yakubuo Luda bé à bↄ̀ à mↄ̀nzi.

6 Dii ɛ̀ara à bènɛ dↄ: Ǹ n ↄↄ sↄtↄ n utan. Ben à sↄ̀tↄn. Kɛ̀ à bↄ̀, à è a ↄↄ lì kusu ũ, à kɛ̀ púu lán buu bà. 7 Dii bènɛ: Ǹ ɛara ǹ n ↄↄ sↄtↄ n utan. À ɛ̀ara à sↄ̀tↄn. Kɛ̀ à bↄ̀, à è à kɛ̀ a gbɛ̀n. 8 Dii bènɛ: Tó aↄ̃ↄe n náanɛ kɛ wà sèeda káakupↄ sìro, aↄ̃é à zãa pↄ́ sí. 9 Tó aↄ̃ↄe sèeda plaaa pìnↄ sí wà n yã mà sↄ̃ro, ǹ Nili í tↄ́ ǹ kwɛ́ɛ tↄↄtɛ, eé li aru ũ.

10 Ben Musa bènɛ: N yã nna Dii! Zaa zi yã'ona aagamaoro. Baa zaa gurↄↄ kɛ̀ n yã òmɛ, ma lɛ́ tìisimɛ. 11 Ben Dii bènɛ: Dé bé à lɛ́ dↄ̀ gbɛ̃nteenɛ? Dé bé è à nɛ́nɛ naɛ ke è à swãdo kũu? Dé bé è tó à guu e ke è à vĩ̀a kũu? Mamↄma Dii, mámbeeroo? 12 Ǹ gá! Mɛ́ n ĩan ká yã'onao, mɛ́ yã kɛ̀ nɛ́ oo dannɛ. 13 Ben à bè: N yã nna Dii! N yã nna! Ǹ gbɛ̃ pãnde zĩ. 14 Ben Dii pↄ fɛ̃̀ Musazi à bè: N vĩ̀i Aruna Levi borii kuuroo? Má dↄ̃ kɛ̀ yã'ona zĩ'ũoro. Èe mↄↄ danlɛ. Tó à wɛ́ɛ sìnlɛ, à pↄↄ é kɛ nna. 15 Ǹ yã oo ǹ yã kɛ̀ eé oo danɛ. Mapi, mɛ́gↄ̃ à ĩan ká kↄ̃n yã'onao, mɛ́gↄ̃ yã kɛ̀ é kɛɛ daaare. 16 Eé yã o gbɛ̃nↄnɛ n gɛ̃ɛ ũ, eégↄ̃ dɛ n lɛ́gbɛkpari ũ, nɛ́gↄ̃ dɛnɛ lán Luda bà. 17 Ǹ gò kɛ̀ sɛ́ ǹgↄ̃ kũna ǹ sèedanↄ kɛo.

Musa ɛarana Igipiti

18 Musa tà a anzure Yɛtoro kiia à bènɛ: Ǹ ma gba zɛ́ mà tá ma gbɛ̃nↄ kiia Igipiti, mà e tó aↄ̃ↄ kpɛ́ kú wɛ̃̀ndio ai tia. Yɛtoro bènɛ: Ǹ pita aafia. 19 Àɛ sↄ̃ Dii gĩakɛ à bè Musanɛ Midiã bùsun: Ǹ fɛɛ ǹ tá Igipiti, zaakɛ gbɛ̃ kɛ̀ aↄ̃ↄe n wɛtɛɛ wà n dɛ yãanↄ gàga ń píngi. 20 Ben Musa a naↄ̃ sɛ̀ kↄ̃n a nɛ́gↄ̃gbɛ̃nↄ à ń dí zaakia, à lìara èe taa Igipiti à Luda gò pì kũna. 21 Ben Dii bènɛ: Tó n ka Igipiti, ǹ dabuyã kɛ̀ ma à gbãaa kpàmmaanↄ kɛ Fili'auna aɛ píngi. Mↄde mɛ́ à kùgbãa kũ, eé gí gbɛ̃nↄ gbarɛzi. 22 Ǹ onɛ mamↄma Dii ma bè, Isaraili boriin ma daudu ũ, 23 ben ma bènɛ à ma daudu gbarɛ à gá dↄnzi kɛmɛ. Lán à gì à gbarɛzi nà, mɛ́ à daudu dɛ sa.

24 Zɛ́ guu Musa e ii gukea, ben Dii à lè gwe à yezi à à dɛ. 25 Ben Zipora gbɛ̀ fɛ̃ɛ sɛ̀ à a nɛ́ bã̀ngu kɛ̀o à a gɛfↄↄ nà Musa gbáa à bè: Yãpuramɛ, ń dɛmɛ gↄ̃ arudee ũ. 26 Bã̀ngukɛna beee yãnzin à bènɛ gↄ̃ arudeezi. Ben Dii Musa tò.

27 Dii bè Arunanɛ: Ǹ gá da Musalɛ gbáan. Ben à gàa à à lè Luda kpiii kiia, à lɛ́ pɛ̀ à gasua. 28 Musa yã kɛ̀ Dii a zĩ à oo tↄ̃kɛ̃̀ Arunanɛ kↄ̃n sèeda kɛ̀ à bènɛ à kɛɛnↄ. 29 Ben Musa kↄ̃n Arunao tà Igipiti aↄ̃ Isaraili gbɛ̃nsinↄ kàkↄ̃a. 30 Aruna yã kɛ̀ Dii ò Musanɛ tↄ̃kɛ̃̀ńnɛ ń píngi, ben Musa dabuyã pìnↄ kɛ̀ Isarailinↄ wáa. 31 Aↄ̃ yã pì sì. Kɛ̀ aↄ̃ↄ mà Dii bé à mↄ̀ ń gwa à ń yã'ↄ̃amma è, ben aↄ̃ kùɛ wà dↄnzi kɛ̀nɛ.

<- BƆNA 3 BƆNA 5 ->