1 Kɛ̀ gbɛ̃nↄↄ è kɛ̀ Musa e pita kpiii musu kpaaro, aↄ̃ kàkↄ̃a Arunazi aↄ̃ bènɛ: Ǹ fɛɛ ǹ tãa kenↄ kɛwe lɛ aↄ̃ dↄwe aɛ, zaakɛ Musa kɛ̀ wa bↄɛ Igipiti pì, wá dↄ̃ yã kɛ̀ à à lèro. 2 Ben Aruna bèńnɛ: À a nↄgbɛ̃nↄ vura swãinↄ bↄɛ kↄ̃n a nɛ́gↄ̃gbɛ̃nↄ pↄ́nↄ kↄ̃n a nɛ́nↄgbɛ̃nↄ pↄ́nↄ à mↄ́omɛ. 3 Ben ń píngi a vura swãinↄ bↄ̀bↄ aↄ̃ↄ kpà Arunaa. 4 À sì à kàsa lán zùswarenɛ bↄ̀rↄ bà, ben à lↄ̀lↄ. Ben wà bè: Isarailinↄ, a tãan yɛ̀! Àmbe à a bↄɛ Igipiti. 5 Kɛ̀ Aruna è lɛ, à sa'okii bò zù pì aɛ, ben à kpàakpa kɛ̀ à bè: Dii zĩbaa kuu zia. 6 Kɛ̀ guu dↄ̀, gbɛ̃nↄ fɛ̀ɛ wà sa'opↄ kɛ̀ wè ká tɛ́n à tɛ́ kũ òa kↄ̃n kɛnnakↄ̃o sa'opↄo. Gbɛ̃nↄ vɛ̃̀ɛ wèe pↄ́ blee wèe í mii, ben aↄ̃ fɛ̀ɛ wèe pãpãa kɛɛ.

7 Ben Dii bè Musanɛ: Ǹ pita ǹ gá! N gbɛ̃ kɛ̀ n bↄńyo Igipitinↄ yàka. 8 Aↄ̃ kɛ̃̀ zɛ́ kɛ̀ má ↄ̀dↄańnɛa kpakpaa, aↄ̃ vura kàsa tãa ũ lán zùswarenɛ bↄ̀rↄ bà, aↄ̃ kùɛnɛ aↄ̃ saa òa wà bè, Isarailinↄ tãa kɛ̀ à ń bↄ́ɛ Igipitin gwe. 9 Ben Dii lìara à bè Musanɛ: Má è gbɛ̃ pìnↄ swã gbãamɛ. 10 Ǹ gumala lɛ mà a pɛ̃tɛ̃ fɛɛńzi mà ń kaatɛ, mↄde mɛ́ n boriinↄ kɛ bíta. 11 Ben Musa agbaa kpà Dii a Ludanɛ à bè: Dii, bↄ́yãnzin n pɛ̃tɛ̃ é fɛɛ n gbɛ̃nↄazi kɛ̀ n ń bↄ́ɛ Igipiti kↄ̃n n gbãa bítao kↄ̃n n gã̀sã gbãaao? 12 Igipitinↄ é be aↄ̃ kaatɛna yãnzin n ń bↄ́ɛzi, lɛ ǹ e ǹ ń dɛdɛ kpiiinↄ musu ǹ ń yãa anduna guu. Ǹ n pↄfɛ̃ kpáɛ ǹ yã kɛ̀ ń yezi ǹ pita n gbɛ̃nↄa pì bↄ n nↄ̀sɛn. 13 Ǹ dↄ n zↄ̀blerinↄ Ibraĩ kↄ̃n Isaakuo kↄ̃n Isarailio yãn, zaakɛ ń sìńnɛ kↄ̃n n kuunao n bè, nɛ́ ń borii kaara lán sↄsↄnɛnↄ bà, nɛ́ bùsu kɛ̀ n à yã òńnɛ kpá ń boriinↄa wàgↄ̃ vĩ gurↄ píngi. 14 Ben Dii yã kɛ̀ à bè é pita a gbɛ̃nↄa pì bↄ̀ a nↄ̀sɛn.

15 Musa ɛ̀ara à pìta kpiiia, à doka gbɛ̀ walaa mɛ̀n plaaa pìnↄ kũna a ↄzĩ. Yã kɛ̃na gbɛ̀ pìnↄa kpa plaplaa píngi. 16 Luda bé à gbɛ̀ walaa pìnↄ à, àmbe à yã kɛ̃̀ḿma. 17 Yↄsua gbɛ̃nↄ wiii mà, ben à bè Musanɛ: Ǹ zĩ̀ wii ma dↄ bùran. 18 Musa bè: Zĩ̀blena wiii bé à dↄ gwero, wɛ̃nda ↄ́ↄdↄnan gwe sↄ̃ro, gbɛ̃nↄ lɛ̀sinan mɛ́ɛ maa. 19 Kɛ̀ à kà kĩi kↄ̃n bùrao, à è wèe ↄ̃ wãa zùswaree pì aɛ, ben à pↄ fɛ̃̀. À gbɛ̀ walaa kɛ̀ à kũna pìnↄ pã̀ɛ kpiigɛɛzi gwe, aↄ̃ wìwi. 20 Ben à zùsware kɛ̀ wà pì pì sɛ̀ à dà tɛ́n. À à tí bò, ben à kà ín à kpà Isarailinↄa, aↄ̃ mì. 21 Ben Musa Aruna là à bè: Bↄ́n gbɛ̃ pìnↄↄ kɛ̀nnɛ, gbasa ń tò aↄ̃ durun bíta kɛ̀ taka kɛ̀? 22 Ben à wèàla à bè: Ǹton pↄ fɛ̃ro, mare. Ń gbɛ̃ pìnↄ dↄ̃, kɛ̀ aↄ̃ↄ zaa. 23 Aↄ̃mbe aↄ̃ bèmɛ mà tãa ke kɛ à dↄńnɛ aɛ. Aↄ̃ bè Musa kɛ̀ wa bↄɛ Igipiti pì, wà dↄ̃ yã kɛ̀ à à lèro. 24 Ben ma bèńnɛ gbɛ̃ kɛ̀ aↄ̃ vura vĩinↄ bↄɛ wà mↄ́o. Kɛ̀ aↄ̃ mↄ̀o, ben má kà tɛ́n, ben à bↄ̀ zùswarenɛ bↄ̀rↄ pì ũ.

25 Musa è Aruna tò gbɛ̃nↄↄ e ń pↄyezi kɛɛ, ben aↄ̃ gↄ̃̀ fabona pↄ́ ũ ń ibɛɛnↄnɛ. 26 Ben à zɛ̀ bùra gɛ̃kiia à bè: Gbɛ̃ kɛ̀ aↄ̃ↄ kú Dii kpaanↄ mↄ́ ma kuu. Ben Levi boriinↄ kàkↄ̃a à kuu. 27 À bèńnɛ: Dii Isarailinↄ Luda bè, a baade a fɛ̃ɛdaa logo à dↄdↄ bùrazi gulɛ kↄ̃n gulɛo, a baade a gbɛ̃nↄ kↄ̃n a gbɛ̃nnanↄ kↄ̃n a gbɛ̃daaanↄ dɛdɛ. 28 Levi boriinↄↄ kɛ̀ lán Musa dàńnɛ nà. Gbɛ̃ kɛ̀ wà ń dɛ́dɛ zĩ pìanↄ kà gↄ̃ↄn bↄrↄ aagↄ̃ taka. 29 Ben Musa bè Levi borii pìnↄnɛ: Lán a bↄ a nɛ́nↄ kↄ̃n a gbɛ̃nↄ kpɛɛ nà, a a zĩnda kpà Diia gbã̀a, Dii aubarika dàagu gbã̀an gwe.

30 Kɛ̀ guu dↄ̀ Musa bè gbɛ̃nↄnɛ: A durun bíta kɛ̀, baa kↄ̃n beeeo mɛ́ ɛara mà didi kpiiia mà gá Dii kiia dↄ, wègↄ̃ dↄ̃ro ke mɛ́ e mà agbaa kpánɛare a durun yã musu. 31 Ben à ɛ̀ara à gàa Dii kiia à bè: N yã nna! Gbɛ̃ pìnↄ durun bíta kɛ̀, aↄ̃ tãa ke kɛ̀ ń zĩndanɛ kↄ̃n vurao. 32 Ǹ sùu kɛ! Ǹ ń durun kɛ̃ńnɛ. Tó lɛnlo, ǹ ma tↄ́ gogo takada kɛ̀ ń kɛ̃̀ guu. 33 Dii bènɛ: Gbɛ̃ kɛ̀ durun kɛ̀mɛ tↄ́n mɛ́ gogo ma takada guu. 34 Ǹ gá kↄ̃n gbɛ̃nↄ guu kɛ̀ má ònnɛɛn sa. Ma Malaika é dↄnnɛ aɛ. Baa kↄ̃n beeeo tó ma wɛ́ɛtãmmana gurↄↄ kà, mɛ́ wɛ́ɛ tãḿma ń durun yãnzi. 35 Ben Dii gagyãa kà gbɛ̃nↄn zùswaree kɛ̀ aↄ̃ↄ tò Aruna pì pì yãnzi.

<- BƆNA 31BƆNA 33 ->