1 Dii bè Musanɛ: Mmↄn kↄ̃n Arunao kↄ̃n Nadabuo kↄ̃n Abiuo kↄ̃n Isaraili gbɛ̃nsi gↄ̃ↄn baaagↄ̃ akurinↄ, à didi kpiiia à mↄ́ ma kiia, à dↄnzi kɛmɛ zaa kãaa. 2 Ḿbe nɛ́ sↄ̃mazi ndo, gbɛ̃ kpaaanↄ tón mↄ́ kĩiro bensↄ̃ parii tón didińyo kpiii kɛ̀ musuro.

3 Musa gàa à yã kɛ̀ Dii ò tↄ̃kɛ̃̀ńnɛ píngi kↄ̃n dokayãnↄ píngi. Aↄ̃ wè lɛdolɛ ń píngi wà bè: Yã kɛ̀ Dii ò píngi wé kɛ. 4 Ben Musa yã kɛ̀ Dii ò pìnↄ kɛ̃̀ takada guu píngi.

À fɛ̀ɛ kↄngↄ idɛ'idɛ à gbãgbãkii bò kpiigɛɛzi, ben à gbɛ̀ pɛ̀ɛpɛɛ mɛ̀n kuri awɛɛplaa Isaraili bori kuri awɛɛplaaanↄ pↄ́ ũ. 5 À Isaraili gↄ̃kparɛnↄ zĩ̀ kↄ̃n zùswarenɛ bↄ̀rↄnↄ, ben aↄ̃ sa'opↄ kɛ̀ wè ká tɛ́n à tɛ́ kũ òo Diia kↄ̃n sáabukpana sa'opↄnↄ. 6 Ben Musa zù pìnↄ aru sì à kpàatɛ lɛo plaa. À à lɛo doo dìɛ kↄ̃n taao à à lɛo doo àɛ gbãgbãkiia. 7 Ben à Dii bà kuunańyo takada sɛ̀ à à kyó kɛ̀ńnɛ. Ben aↄ̃ bè: Yã kɛ̀ Dii ò píngi, wé kɛ wé mì siɛnɛ. 8 Ben à aru pì sɛ̀ à fã̀ḿma à bè: Dii bà kuunaao arun gwe lán á mà nà píngi.

9 Musa kↄ̃n Arunao kↄ̃n Nadabuo kↄ̃n Abiuo kↄ̃n Isaraili gbɛ̃nsi gↄ̃ↄn baaagↄ̃ akurinↄ dìdi kpiiia. 10 Aↄ̃ Isarailinↄ Luda è. Safia gbɛ̀ gusararaa kaɛna à gbá gĩzĩ, à í dɛ búgu wásawasa lán ludambɛ búgu bà. 11 Ludaa e pↄ́ke kɛ Isaraili gbãadee pìnↄnɛro. Aↄ̃ wɛ́ɛ sìàlɛ, ben aↄ̃ pↄ́ blè aↄ̃ í mì.

12 Dii bè Musanɛ: Ǹ didi kpiiia ǹ mↄ́ ma kiia ǹgↄ̃ kú gwe. Mɛ́ gbɛ̀ walaa kɛ̀ ma a dokayãnↄ kɛ̃̀anↄ kpámma, lɛ ǹ e ǹ dańnɛ. 13 Ben à fɛ̀ɛ kↄ̃n a kpàasi Yↄsuao, aↄ̃ↄe gaa didi Luda kpiiia. 14 Ben Musa bè gbɛ̃nsinↄnɛ: Àgↄ̃ wa dãa kɛ̀, wé ɛara wà su a kiia. Aruna kↄ̃n Uruo égↄ̃ kúao. Tó gbɛ̃ke yãke vĩ, à gáo ń kiia. 15 Ben Musa dìdi kpiii pìa. Tɛ́sukpɛ dà à mìsↄ̃ntɛ̃la, 16 ben Dii gakui pìta Sinai kpiii pìa. Tɛ́sukpɛ pì daàla lɛ ai gurↄ swɛɛdo, à gurↄ swɛɛplaadeen Dii lɛ́ zù Musazi zaa tɛ́sukpɛ pì guu. 17 Isarailinↄ Dii gakui è lán tɛ́ kɛ̀ è ń blee bà kpiii pì mìsↄ̃ntɛ̃a. 18 Ben Musa gɛ̃̀ tɛ́luguu pì guu à ɛ̀ara à dìdi kpiii pìa. À kú gwe ai gurↄ baplaa fãantɛ̃ kↄ̃n gwãavĩo.

<- BƆNA 23BƆNA 25 ->