1 Dii bè Musanɛ: 2 Ǹ o Isarailinↄnɛ aↄ̃ ɛara wà gá bùra káɛ Pi'airo saɛ Migidolu kↄ̃n ísiaao dagura, aɛdↄkↄ̃ana kↄ̃n Baali Zɛfↄ̃o. À bùra káɛ ísiaa saɛ gwe. 3 Fili'auna égↄ̃ daa a sãsã, gbáa a kũmɛ. 4 Mɛ́ a kùgbãa kũ, eé pɛɛazi, mɛ́ tↄ́ bↄ Fili'auna kↄ̃n a zĩ̀kpɛɛnↄ yã sàabu, Igipitinↄ égↄ̃ dↄ̃ kɛ̀ mámbe Dii ũ. Ben Isarailinↄↄ kɛ̀ lɛ.

5 Kɛ̀ wà ò Igipiti kí Fili'aunanɛ gbɛ̃ pìnↄ bàa lɛ̀, ben àpi kↄ̃n a ìbanↄ nↄ̀sɛ lìɛ Isarailinↄ yã musu wà bè: Bↄ́n wá kɛ̀, ben wá tò aↄ̃ bↄ̀ zↄ̀blenaween? 6 Ben Fili'auna góro dↄ̀ a sↄ̃nɛ à a zĩ̀kpɛɛnↄ kàkↄ̃a. 7 À sↄ̃goro maaanↄ sɛ̀ mɛ̀n wàa aagↄ̃ kↄ̃n Igipiti sↄ̃goronↄ píngi kↄ̃n zĩ̀kari gbɛ̃nsinↄo ká ń guu. 8 Dii Igipiti kí Fili'auna kùgbãa kũ̀, ben à pɛ̀ɛ Isaraili kɛ̀ aↄ̃ↄe bↄɛɛ kↄ̃n kùgbãaaonↄzi. 9 Ben Igipitinↄ pɛ̀ɛńzi kↄ̃n Fili'auna sↄ̃nↄ kↄ̃n à sↄ̃goronↄ kↄ̃n à sↄ̃deenↄ kↄ̃n à zĩ̀kpɛɛnↄ ń píngi, ben aↄ̃ↄe mↄↄ ń le ń bùran ísiaa saɛ kĩi kↄ̃n Pi'airoo aɛdↄkↄ̃ana kↄ̃n Baali Zɛfↄ̃o.

10 Kɛ̀ Fili'auna kà kĩi, Isarailinↄ wɛ́ɛ sɛ̀, ben aↄ̃ Igipitinↄ è tɛ́ ń kpɛɛ. Vĩa ń kũ maamaa, ben aↄ̃ wii pɛ̀ Diizi. 11 Aↄ̃ bè Musanɛ: Miranↄↄ kú Igipitinloo? Bↄ́yãnzi n mↄwao gbáan kɛ̀ wà gagazi? À kɛ̀ dia n bↄwao Igipiti? 12 Asa wá ònnɛ Igipiti wà bè ǹ wa tó tɛɛɛ wà zↄ̀ ble Igipitinↄnɛ! Zↄ̀blenańnɛ maawe dɛ gagana gbáa kɛ̀nla. 13 Musa bèńnɛ: Àton tó vĩa a kũro. À zɛ tɛɛɛ é e lán Dii é a mì sí nà gbã̀a, zaakɛ Igipiti kɛ̀ ée ń ee gbã̀a kɛ̀nↄ, é ń e ziki dↄro. 14 Dii bé eé zĩ̀ káare. Àgↄ̃ yĩtɛna kítikiti dé!

15 Dii Musa là à bè: Bↄ́ wiiin nɛ́ɛ pɛɛmazii? Ǹ o gbɛ̃nↄnɛ aↄ̃ fɛɛ wà bↄ kↄ̃n táo. 16 Ǹ n gò dↄ ísiaala à zↄ̃kↄ̃rɛ, lɛ Isarailinↄ e wà gɛ̃tɛ à dagura gukoria. 17 Mapi, mɛ́ Igipitinↄ kùgbãa kũ, aↄ̃é gɛ̃n ń gbɛra, mɛ́ tↄ́ bↄ Fili'auna kↄ̃n a zĩ̀kpɛɛnↄ kↄ̃n a sↄ̃goronↄ kↄ̃n a sↄ̃deenↄ yã sàabu. 18 Tó ma tↄ́ bↄ̀ Fili'auna kↄ̃n a sↄ̃goronↄ kↄ̃n a sↄ̃deenↄ yã sàabu, Igipitinↄ égↄ̃ dↄ̃ sa kɛ̀ mámbe Dii ũ. 19 Luda Malaika kɛ̀ dↄ Isarailinↄnɛ aɛ lìara à gàa ń kpɛɛ kpa, ben tɛ́luguu kɛ̀ kú ń aɛ lìara à gàa ń kpɛɛ dↄ 20 aↄ̃pinↄ kↄ̃n Igipitinↄ dagura. Tɛ́luguu pì guu pù Isarailinↄnɛ à gusiaa kpà Igipitinↄnɛ, ben aↄ̃ gbɛ̃kee e e à sↄ̃̀ a daazi gwãavĩ beeearo.

21 Kɛ̀ Musa a ↄↄ dↄ̀ ísiaala, ben Dii bↄ̀ kↄ̃n ĩa gbãaao ↄfãntɛ̃bↄɛ kpa. À kàka ai guu gàa dↄ̀o à ísiaa lɛ̀ à kpàatɛkↄ̃rɛ, ben gukori bↄ̀. Kɛ̀ í zↄ̃̀kↄ̃rɛ, 22 ben Isarailinↄ táa ò gukoria aↄ̃ bikũ̀. Í bĩi bò aↄ̃ ↄplaazi kↄ̃n ↄzɛzio. 23 Ben Igipitinↄ pɛ̀ɛńzi. Fili'auna sↄ̃nↄ kↄ̃n a sↄ̃goronↄ kↄ̃n a sↄ̃deenↄ píngi tɛ́ ń kpɛɛ ísiaa guu. 24 Gudↄnao Dii Igipiti zĩ̀kpɛɛnↄ gwà zaa tɛ́nɛnɛ guu, ben à tò aↄ̃ lìkↄ̃a. 25 À tò aↄ̃ sↄ̃goronↄ vlɛ̃̀ɛ, à tò aↄ̃ táa'ona kɛ̀ zĩ'ũ, ben aↄ̃ bè: Wà bàa lɛ́ Isarailinↄnɛ, zaakɛ Dii e zĩ̀ kaawaońnɛmɛ.

26 Dii bè Musanɛ: Ǹ n ↄↄ dↄ ísiaala, í é da Igipitinↄla kↄ̃n ń sↄ̃goronↄ kↄ̃n ń sↄ̃deenↄ. 27 Ben Musa a ↄↄ dↄ̀ ísiaala, ben í e suu a gbɛ̀n gudↄnao. Lán í e suu nà, ben Igipitinↄ bàa sì aↄ̃ↄ yezi wà bↄɛ. Gwen Dii tò ísiaa dàńlan. 28 Í sù a dà sↄ̃goronↄla kↄ̃n sↄ̃deenↄ kↄ̃n Fili'auna zĩ̀kpɛɛ kɛ̀ aↄ̃ gɛ̃̀ ísiaa guu Isarailinↄ gbɛraanↄ ń píngi. Aↄ̃ kee e bↄro, baa mɛ̀n do. 29 Isarailinↄ sↄ̃ táa ò í dagura gukoriamɛ. Í bĩi bò aↄ̃ ↄplaazi kↄ̃n ↄzɛzio. 30 Zĩ beeean Dii Isarailinↄ sì Igipitinↄa, ben Isarailinↄ Igipiti pìnↄ gɛ̀nↄ è ísiaa baa. 31 Kɛ̀ Isarailinↄ Dii gbãa bíta kɛ̀ à mↄ̀ Igipitinↄnɛ è, aↄ̃ vĩa kɛ̀nɛ, ben aↄ̃ à náanɛ kɛ̀ kↄ̃n à zↄ̀bleri Musao.

<- BƆNA 13BƆNA 15 ->