KƆLƆSEDEENƆ 2

1 Má yezi àgↄ̃ aĩa bíta kɛ̀ mɛ́ɛ kɛɛaree dↄ̃, apinↄ kↄ̃n Laodiseadeenↄ kↄ̃n gbɛ̃ kɛ̀ wée wɛ́ɛ sikↄ̃lɛroonↄ píngi, 2 lɛ aↄ̃ swɛ̃̀ e à kpáɛ, aↄ̃ lɛdolɛ kɛ kↄ̃n yenzio, lɛ aↄ̃ wɛ́ɛ kɛ̃ wásawasa, aↄ̃gↄ̃ Luda asiiyã kɛ̀ dɛ Kirisi pì ũu dↄ̃. 3 À kiian ↄ̃ndↄ̃ kↄ̃n dↄ̃nao auziki píngi utɛn. 4 Mɛ́ɛ beee ooare, lɛ gbɛ̃ke tón a sãsã kↄ̃n lɛ́nna lɛokpakↄ̃aoro yãnzi. 5 Baa tó má kúaoro, ma ninii kúao, má è ée yã kɛɛ a zɛ́a, bensↄ̃ a Kirisi náanɛkɛna gbãa, ben ma pↄↄ kɛ̀ nna.

Pↄ́ píngi papammana Kirisi guu

6 Lán a Kirisi Yesu sì a Dii ũ nà, àgↄ̃ kú à guu lɛ, 7 a kãsãa gↄ̃ pɛɛna à guu. À kaara à guu, àgↄ̃ gbãa à náanɛkɛna guu lán wà dàare nà. Àgↄ̃ kú kↄ̃n sáabukpanao maamaa. 8 À làakari kɛ lɛ gbɛ̃ke tón dↄ̃na gbãaa kásaare à a sãsã kↄ̃n gbɛ̃ntee ↄ̃ndↄ̃ pã korioro. Yã beeenↄ è bↄ fɛɛakaarayãnↄ kↄ̃n anduna yãkɛnanↄ kiiamɛ, èe kɛ Kirisi kiianlo. 9 Zaakɛ Luda kíkɛ píngi pɛ̀kↄ̃rɛ Kirisia a gbɛ̃nteekɛmɛ guu. 10 Kuuna gbɛ̃ kɛ̀ dɛ gbãa píngi kↄ̃n iko píngio mìdee ũu pì guu, à píngi pɛ̀kↄ̃rɛawa. 11 À guun a bã̀ngu kɛ̀n à bↄ̀ a dà ziin ũ. Èe kɛ bã̀ngu kɛ̀ gbɛ̃ntee è kɛńnɛnlo, bã̀ngu kɛ̀ Kirisi è kɛńnɛmɛ. 12 Zaakɛ batisikɛna guu wà a vĩio, ben a fɛɛo, kɛ̀ a gbãaa kɛ̀ Luda à fɛ̀ɛo bↄna gaan náanɛ kɛ̀ yãnzi. 13 Á dɛ gɛ̀nↄ ũ yã Luda kiia a taarinↄ kↄ̃n a dà ziinↄ yãnzi, ben Luda a gba wɛ̃̀ndi dufu lɛdo kↄ̃n Kirisio, à sùu kɛ̀wao kↄ̃n wa taarinↄ píngi. 14 Luda wa taari takada kɛ̀ wa da yãn gògo, à sɛ̀ à pà lía. 15 Kirisi gana lía gbãaa sì diinↄ kↄ̃n gbãadeenↄa, à bↄ̀ńyo gupuraaa à ń kpɛ bↄ̀, à ń kpan'aɛ kɛ̀ zĩ̀zↄnↄ ũ.

16 Beee yãnzi àton tó gbɛ̃ke a taari e pↄ́blena ke ímina ke zĩbaa ke mↄ dufu bↄna ke kámmabogurↄzĩ yã musuro. 17 Yã beeenↄ píngi nɛ́ yã kɛ̀ wà bè eé mↄ́ takamɛ, yã pìnↄ yãpuraan Kirisi ũ. 18 Àton tó gbɛ̃ kɛ̀ è a zĩnda busa ɛgɛ pↄ́ ũ kɛ̀ è dↄnzi kɛ malaikanↄnɛ a sãsã à a kɛ̃ pↄ́ kɛ̀ a wɛ́ɛ pɛ́aaro. Wɛ́ɛgupu'ena yã bé ègↄ̃ gbãa gbɛ̃ beee takanɛ, ben è a zĩnda sɛ́ lezĩ pã a gbɛ̃nteekɛda laasuunↄ yãnzi. 19 À pɛna Kirisi kɛ̀ dɛ mì ũuaro. Kirisi guun mɛ̀gu píngi è kↄ̃ kũn, aↄ̃ nakↄ̃a kↄ̃n tĩinↄ gbãaao, mɛ̀ pì ègↄ̃ gbãa lán Ludaa yezi à gbã nà.

20 Zaakɛ a ga kↄ̃n Kirisio anduna yãkɛnanↄ musu, bↄ́yãnzin eè ń yãdiɛnnɛnanↄ ma lán anduna gbɛ̃nↄ bàzi? 21 Wè be, ǹton kɛ̀kii na n ↄzĩro, ǹton kɛ̀kii dãro, ǹton ↄ kɛ kɛ̀aro. 22 Pↄ́ beeenↄ píngi è yãa kↄ̃n ń aufãnikɛnaomɛ. Gbɛ̃ntee yãdannɛnan beeenↄ ũ. 23 Yã beeenↄↄ dɛ lán ↄ̃ndↄ̃ yã bàmɛ, zaakɛ aↄ̃è dↄnzi yã tiasi dańnɛ kↄ̃n zĩndabusanao kↄ̃n ĩadana ń zĩnda mɛ̀ao. Baa kↄ̃n beeeo è kpá wa dànↄnɛro.

<- KƆLƆSEDEENƆ 1 KƆLƆSEDEENƆ 3 ->