2 SAMUƐLI 13

Aminↄ yena a dãre Tamazi

1 Beee gbɛra Dauda nɛ́ Abusalomu dãre maaa vĩ, à tↄ́n Tama, ben Dauda nɛ́ Aminↄ yezi. 2 Yã pì e ĩa daa Aminↄ pìa ai à kà gyãkɛna a dãre Tama pì yãnzi, zaakɛ à gↄ̃gbɛ̃ dↄ̃ro, eé fↄ̃ à yãke kɛnɛro. 3 Aminↄ gbɛ̃nna ke vĩ, à tↄ́n Yonadabu, Dauda vĩ̀i Simɛa nɛ́mɛ. Yonadabu ↄ̃ndↄ̃ gbãa, 4 ben à Aminↄ là à bè: À kɛ̀ dia n kínɛ'ina n mɛ̀ ègↄ̃ busana lán guu e dↄↄ nà lɛɛ? Nɛ́ omɛroo? Ben Aminↄ wèàla à bè: Má ye ma dãaro Abusalomu dãre Tamazimɛ. 5 Ben Yonadabu bènɛ: Ǹ gá ǹ daɛ n gádoa lán gyãreen n ũu bà. Tó n de mↄ̀ n gwa, ǹ onɛ ń yezi n dãre Tama mↄ́ à pↄ́blee kpámma. À mↄ́ à kɛkɛ n wáa lɛ n wɛ́ɛ gↄ̃ ee, gbasa à nannɛ n ↄzĩ. 6 Ben Aminↄ dàɛ lán gyãree bà. Kɛ̀ kí mↄ̀ à gwa, ben à bènɛ: Ǹ tó ma dãre Tama mↄ́ à kàra kɛmɛ ma wáa, à kpáma kↄ̃n a ↄↄo. 7 Ben Dauda gbɛ̃ zĩ̀ Tamaa a bɛ à bè: Ǹ gá n vĩ̀i Aminↄ kpɛ́n ǹ pↄ́blee kɛnɛ. 8 Kɛ̀ Tama gɛ̃̀ à kpɛ́n, à à lè daɛna, ben à wísiti yà à kàra kàsao à wáa. 9 Ben à taa sɛ̀ à kàra pì kànnɛ. Aminↄ gì sózi à bè: Ǹ pɛ́ gbɛ̃nↄa aↄ̃ bↄɛ ń píngi. Kɛ̀ gbɛ̃ kɛ̀ aↄ̃ kúonↄ bↄ̀ɛ ń píngi, 10 ben à bè Tamanɛ: Ǹ mↄ́ kↄ̃n pↄ́blee pìo kpɛ́nɛ guu kɛ̀ ǹ kpáma. Ben Tama kàra kɛ̀ à kɛ̀ sɛ̀ à gɛ̃̀o a vĩ̀i Aminↄ pì kiia kpɛ́nɛ guu. 11 Kɛ̀ à sↄ̃̀zi, èe mↄↄ kpáa à só, ben à a dãre pì kũ̀ à bè: Ǹ tó mà daɛnyo.

12 Ben à bè a vĩ̀i pìnɛ: Auo! Ǹton gbãa mↄ́mɛro. Zaakɛ wa Isarailinↄ weè yã beee taka kɛro. Ǹton yã dↄ̀rↄsai beee taka kɛmɛro. 13 Mɛ́ gɛ̃ mámɛ kↄ̃n wíyã beeeo? Mmↄn sↄ̃, Isarailinↄ é n diɛ gbɛ̃ pãa ũ. Ǹ sùu kɛ! Ǹ yã o kínɛ, eé gí ma kpámmaziro. 14 Èe we à à yã màro. À gbãa mↄ̀nɛ, ben à kùsia à dàɛo. 15 Ben Aminↄ zàn pãsĩpãsĩ. Zangu kɛ̀ à sɛ̀ kↄ̃n Tama pìo dɛ yenzi kɛ̀ à vĩo yãala. Ben à bènɛ: Ǹ fɛɛ ǹ bↄ. 16 Ben nↄgbɛ̃ pì bè a vĩ̀i pìnɛ: Auo! N pɛnama taari bíta dɛ pↄ́ kɛ̀ ń kɛ̀mɛɛla. Baa kↄ̃n beeeo èe we à à yã màro. 17 Ben Aminↄ a zĩkɛri gↄ̃kparɛ sìsi à bè: Ǹ pɛ́ nↄgbɛ̃ kɛ̀a à bↄmɛ ma kpɛ́n, ǹ gbà tata ǹ à mↄ̀nɛ ká. 18 Ben à zĩkɛri pì à sɛ̀ à bↄ̀o bàazi, à gbà tàta à à mↄ̀nɛ kà. Nↄgbɛ̃ pì uta gbã̀a dana, zaakɛ uta beee takan kí nɛ́nↄkparɛ lɛziinↄ ègↄ̃ dana. 19 Ben Tama túbu gbɛ̃̀ a mìa, à a uta gbã̀a kɛ̀ à dana pì gà à kɛ̃̀ à ↄ dì a musu, èe ↄ́ↄ dↄↄ èe taa.

20 À dãgↄ̃ dadↄ̃nkↄ̃de Abusalomu bènɛ: N dãgↄ̃ Aminↄ dàɛnyon yↄ́? Ǹton o gbɛ̃ke maro, zaakɛ n dãgↄ̃mɛ. Ǹtongↄ̃ yã pì kũna n swɛ̃̀ guuro. Ben Tama vɛ̃̀ɛ a dãgↄ̃ Abusalomu bɛ nↄ̀sɛo yakana. 21 Kɛ̀ kí Dauda yã pì mà, à pↄ fɛ̃̀ maamaa. 22 Abusalomu e yãke o Aminↄnɛro, yã zaaa ke à maaa. À zàn, kɛ̀ à kùsi a dãre Tamaa yãnzi.

Aminↄ dɛna

23 Wɛ̃̀ plaa gbɛra Abusalomu kú Baali Azo, Ɛflaimu bùsu lɛ́n kↄ̃n a sãkãkɛ̃ɛrinↄ, ben à kína nɛ́nↄ sìsi pↄnna pↄ́bleea ń píngi. 24 Ben à gàa à kí lè à bè: Kí, wèe mamↄma n zↄ̀bleri sãanↄ kã kɛ̃ɛɛ. Mpi kↄ̃n n ìbanↄ é tɛ́maziroo? 25 Ben kí wè a nɛ́ pìla à bè: Auo! Wé fↄ̃ wà gá wa píngiro. Wé kɛnnɛ asoo ũ. À nàkↄ̃rɛa, mↄde èe gáro, ben à sa maaa ònɛ. 26 Ben Abusalomu bè: Tó nɛ́ gáro, ǹ tó ma vĩ̀i Aminↄ gáwao. Kí à là à bè: Bↄ́yãnzi ń yezi à gányozi? 27 Abusalomu nàkↄ̃rɛa, ben kí tò Aminↄ gàao kↄ̃n a nɛ́ kpaaanↄ ń píngi.

28 Abusalomu yã dìɛ a gbɛ̃nↄnɛ à bè: À swã kpá! Tó í Aminↄ kũ̀, tó má òare à à zↄ̃, à à dɛ. Àton tó vĩa a kũro. Mámbe ma a dan! À zɛ gbãa à gↄ̃gbɛ̃kɛɛ kɛ. 29 Abusalomu gbɛ̃nↄ kɛ̀ lán à dìɛńnɛ nà aↄ̃ à dɛ̀, ben kína nɛ́ kpaaanↄ fɛ̀ɛ wà dì ń bãagãsↄ̃nↄ kpɛɛ aↄ̃ bàa lɛ̀. 30 Gurↄↄ kɛ̀ aↄ̃ↄ tɛ́ zɛ́n, Dauda à baaru mà wà bè: Abusalomu kí nɛ́nↄ dɛ̀dɛ ń píngi, aↄ̃ gbɛ̃kee e gↄ̃ro. 31 Dauda fɛ̀ɛ à a pↄ́kãsãanↄ gà à kɛ̃̀, ben à dàɛ tↄↄtɛ. À ìba kɛ̀ aↄ̃ↄ zɛzɛzinↄ ń pↄ́kãsãanↄ gà wà kɛ̃̀kɛ̃ se. 32 Ben Dauda vĩ̀i Simɛa nɛ́ Yonadabu bè: Baa, ǹtongↄ̃ daa wà n nɛ́ gↄ̃kparɛnↄ dɛ̀dɛ píngiro, Aminↄ ado bé à gà. Wà yã pì dↄ̃̀ Abusalomu wɛ́ɛa zaa gurↄↄ kɛ̀ Aminↄ kùsi a dãre Tamaamɛ. 33 Ma dii kí, ǹtongↄ̃ yã pì kũna n nↄ̀sɛ guuro. N nɛ́gↄ̃gbɛ̃nↄↄ e gaga píngiro, séde Aminↄ ado. 34 Abusalomu sↄ̃ bàa lɛ̀.

Kɛ̀ gↄ̃kparɛ gudãkpari wɛ́ɛ zù, à è wà tɛ́ Oronaimu zɛ́n sĩ̀sĩgɛɛzi paripari. À gàa à bè kínɛ: Ma gbɛ̃nↄ è tɛ́ sĩ̀sĩgɛɛzi Oronaimu kpa. 35 Ben Yonadabu bè kínɛ: Ń èↄ́? N nɛ́nↄ bé aↄ̃ↄe suu gwe lán má ònnɛ nà. 36 Kɛ̀ à yã pì ò à yã̀a, ben kína nɛ́ pìnↄ kà gↄ̃ↄ, aↄ̃ↄe sósobi ↄ́ↄ dↄↄ. Kí kↄ̃n a ìbanↄ ↄ́ↄ dↄ̀ ń píngi maamaa dↄ.

37 Abusalomu bàa lɛ̀ à tà Amiudu nɛ́ Talamai, Gesuu kína kiia. Kí Dauda sↄ̃ ègↄ̃ a nɛ́ ga ↄ́ↄ dↄↄ gurↄ píngi. 38 Kɛ̀ Abusalomu bàa lɛ̀ à tà Gesuu, à kú gwe ai wɛ̃̀ aagↄ̃. 39 Kɛ̀ kí Dauda nↄ̀sɛ kpàɛ Aminↄ ga yã musu, ben èe Abusalomu bɛgɛ kɛɛ sa.

<- 2 SAMUƐLI 12 2 SAMUƐLI 14 ->